بەلسەنىپ شىعىپ, بىرلىكتىڭ بەرەكەسىن كەلتىرىپ, جاقسى ىستەرگە ۇيىتقى بولىپ جۇرگەن جانى جايساڭ جانداردى كورگەندە قاي كوكىرەكتە بولسىن ءۇمىت وتىنىڭ مازداي لاۋلايتىنى بار. قاي زاماندا بولسىن, ەل بولعان سوڭ كومەككە ءزارۋ ادامداردىڭ دا كەزدەسەرى اقيقات. ال ەڭ ءسۇيىنىشتىسى اتىمتاي جومارتتار ودان دا كوپ ەكەن. جالپاق الەمدى تىتىرەنتكەن جامان تۇماۋدىڭ زۇلمات حابارى ەل شەتىنە جەتكەندە اۋداندا ەرىكتىلەر توبى شوقتاي ەكشەلىپ, الدارىنا اسقارالى مىندەت قويىپ, بىرىگىپ, بىرلەسە تۇسكەن. وسى ءبىر ادەمى ارەكەت كەيبىر كەۋدەدەگى مۇزداعان جۇرەكتى ءجىبىتتى, قولدان سۋسىپ شىعىپ بارا جاتقان تىرشىلىكتىڭ تۇيىندەرىن بەكەمدەدى.
وسىدان ءبىر جارىم جىل بۇرىن قۇرىلعان, ەل ىشىندەگى ەرىكتىلەردى توپتاستىرعان «قايىرىمدى ىستەر» كلۋبىنىڭ جەتەكشىسى نۋرسايت ماشانلو ەدى. جەرلەستەرىنىڭ ايتۋىنا قاراعاندا, نۋرسايت بويىنداعى بار كۇش-قۋاتىن, ەرىك-جىگەرىن وسى ءبىر ىسكە جۇمساعان. ۇيىمداستىرۋ قابىلەتىنىڭ مولدىعىنا وراي, جانىنداعى جۇرتقا ىزگىلىك شاراپاتىن توگە الاتىن ادامداردى شوقتاي ەكشەپ العان. جاقسىلىق جايىلماي, ۇلگى بولماي, ونەگەسى ورىستەمەي تۇرا الا ما؟ ەرىكتىلەردىڭ ەلگە تيگىزىپ جاتقان كومەگىنەن قۇلاقتانعان, كوزدەرىمەن كورگەن جەرلەستەرى دە قول قۋسىرىپ قاراپ تۇرا الماي, ورتاق ىسكە بەلسەنە جۇمىلعان. وسىلايشا, شاعىن عانا اۋداندا قامقورلىق جاساۋدان ءلاززات الاتىن, مۇقتاج جانداردى دەمەپ, تىلەۋ بولا العانىن تىرشىلىگىنىڭ ءمانى دەپ سانايتىن 200-گە جۋىق ادام كلۋب مۇشەلەرى قاتارىنا ەندى.
ەرىكتىلەر اۋداندا بىرنەشە مارتە اكتسيا وتكىزدى. «ارداگەرلەردى ارداقتايىق», «قولدان قولعا», «يگى ءىس» ءتارىزدى باستامالار اياسىندا مۇقتاج جاندارعا ءدارى-دارمەكتەر جەتكىزىلىپ, دەرتتەن قالاي قورعانۋ كەرەكتىگى ءتۇسىندىرىلدى. قايىرىمدىلىقتان قاريالار عانا ەمەس, بالالار دا قۇر الاقان قالعان جوق. اۋدانداعى ءبىلىم وشاقتارى وقۋشىلارىنىڭ وسى ءبىر قيىن كەزدە لايىقتى ءبىلىم الۋىنا قولعابىستارىن تيگىزدى. بيىلعى قىس بويى جالعىزىلىكتى جانداردىڭ ءتىزىمى جاسالىپ, قاتال قىستان قىسىلماي شىعۋلارىنا سەپتىكتەرىن تيگىزدى. ۋاقتىلى وتىن-شوپتەرىن ءۇيىپ, قوراداعى مالىنا قارايلاسىپ, اۋلالارىن تازالاپ بەرۋدى ءوز مىندەتتەرىنە الدى. ناۋرىز مەرەكەسىندە بەلسەندى توپ مۇشەلەرى جەرگىلىكتى اتقارۋشى ورگان وكىلدەرىمەن بىرلەسە وتىرىپ, اۋدان جۇرتشىلىعىن قۇتتىقتاپ, اق تۇيەنىڭ قارنى جارىلعان كۇنى تاماشا تارتۋ جاسادى. ءدامى ءتىل ۇيىرەتىن پالاۋ باسىپ, باۋىرساق ءپىسىرىپ, حالىققا اۋىز تيگىزدى.
– ەڭ باستىسى, ەل ءىشىنىڭ ىنتىماعى, – دەيدى كلۋب جەتەكشىسى نۋرسايت ماشانلو, – ەگەر ءبىز ازىق-ت ۇلىك سەبەتتەرىن جەتكىزىپ, قولىمىزدان كەلگەنىنشە قاجەتتى بۇيىمدارىن تاۋىپ بەرىپ جاتساق, ەل كۇنىن كورە الماي وتىر دەگەن ءسوز ەمەس. قازىر اۋدان تۇرعىندارى باقۋاتتى, ءبىز تەك وسى ءبىر از عانا كومەگىمىز ارقىلى بىرلىگىمىزدى, ىنتىماعىمىزدى بەكەمدەي تۇسكىمىز كەلەدى.
ەرىكتىلەردىڭ ەسەلى ءىسىن كورگەن جەرلەستەرى دە ولاردىڭ ىقىلاس-نيەتىنە ءدان رازى. جارىق دۇنيەدە جانىڭداعى ىزگى ادامنىڭ جان شۋاعىن سەزىنىپ جۇرگەنگە جەتەر نە بار؟!
اقمولا وبلىسى,
شورتاندى اۋدانى
