قازاقستاندىق وپەرا ءانشىسى مايرا مۇحامەدقىزى سەرىكتەس ەلدەردىڭ ەڭ تانىمال كلاسسيكالىق ورىنداۋشىلارى نوميناتسياسى بويىنشا جەڭىمپاز اتاندى.
قالىپتاسقان ءداستۇر بويىنشا لاۋرەاتتارعا ماراپاتتى الەمدىك دەڭگەيدەگى جۇلدىزدار, اتى اڭىزعا اينالعان وپەرا ورىنداۋشىلارى جانە شەتەلدىك ديپلوماتتار تابىستايدى. ءبىزدىڭ وتانداسىمىز سىيلىقتى قازاقستاننىڭ رەسەيدەگى ەلشىلىگىنىڭ كەڭەسشىسى ەدىل حوزە ۇلىنىڭ قولىنان الدى.
مايرا مۇحامەدقىزى وسىنداي بەدەلدى ماراپاتقا يە بولۋ توسىن سىي بولعانىن جانە ۇلكەن مارتەبە ەكەنىن ايتتى. «مەن 30 جىلدان استام شىعارماشىلىق قىزمەتىمدە كوپتەگەن بايقاۋلاردىڭ جەڭىمپازى بولعانىما قاراماستان, بۇگىنگى تاڭدا تانىمال تۇلعالاردىڭ اراسىندا تاريحي ساحنادا تۇرۋ مەن ءۇشىن وتە قىزىقتى ءارى اسەرلى بولدى», دەدى ول.
رەسەيلىك تانىمال تەلەجۇرگىزۋشى اندرەي مالاحوۆ ءوز كەزەگىندە بۇل جەڭىستى قازاق ءانشىسىنىڭ دارىنى مەن جەتىستىگىنىڭ لايىقتى دالەلى دەپ اتاپ, وعان بار جاقسىلىقتى تىلەدى.
Bravo سىيلىعىنىڭ اتقارۋشى پروديۋسەرى يۋري اندرەيچۋك قازاقستان الەمگە تاڭعاجايىپ ونەر تۇلعالارىن سىيلايتىنىن اتاپ ءوتتى. «بۇگىن ءبىز وپەرا جانە بالەت تەاترىنىڭ العاشقى ءانشى ديرەكتورى – ءبىزدىڭ سىيلىقتىڭ لاۋرەاتى مايرا مۇحامەدقىزىن قارسى العانىمىزعا قۋانىشتىمىز, بۇل ءبىز ءۇشىن اسا قۇرمەت», دەدى ول.
مايرا مۇحامەدقىزى – قازاقستاننىڭ ەڭبەك سىڭىرگەن ءارتيسى, قازاقستان رەسپۋبليكاسى مەملەكەتتىك سىيلىعىنىڭ لاۋرەاتى, كوپتەگەن تانىمال حالىقارالىق بايقاۋلاردىڭ لاۋرەاتى, پاريجدەگى «گراند وپەرانىڭ» العاشقى قازاقستاندىق ءسوليستى. وسى جىلدىڭ قاڭتارىندا ول شىمكەنتتەگى وپەرا جانە بالەت تەاترىنىڭ ديرەكتورى بولىپ تاعايىندالدى.
Bravo سىيلىعى 2017 جىلى قۇرىلدى جانە 2018 جىلدان باستاپ جىل سايىن كلاسسيكالىق جانە تانىمال مۋزىكا سالاسىندا بەرىلەدى. 2020 جىلى كوروناۆيرۋستىق پاندەمياعا بايلانىستى تاپسىرۋ ءراسىمى وتكەن جوق.
سىيلىقتىڭ ەرەكشەلىگى نومينانتتاردى ۇسىنۋ ايقىندىعى جانە ارتيستەردىڭ تانىمالدىلىعىنىڭ وبەكتيۆتى كورىنىسىن جەكە كوزقاراس بويىنشا ەمەس, مۋزىكا يندۋسترياسىنىڭ كاسىبي ماماندارى ۇسىنعان جانە كونتسەرتتەرگە ساتىلعان بيلەتتەر سانى, سينگلدەر مەن البومداردىڭ تارالىمى, اندەردىڭ راديو مەن تەلەديداردا تانىمال بولۋى, YouTube-تە قارالۋ سانى, بۇقارالىق اقپارات قۇرالدارىندا ايتىلعان مالىمەتتەر جانە ت.ب. اناليتيكالىق كورسەتكىشتەردىڭ ناتيجەلەرى بويىنشا جاساۋ بولىپ تابىلادى.
