ەل قامقورلىعىنا يە بولعان وتاندىق تەننيسشىلەر وسى ءبىر 5-10 جىلدىقتا ATP مەن WTA ساناتىنا جاتاتىن بىرقاتار جارىستا بوي كورسەتىپ, الەمنىڭ ۇزدىك تەننيسشىلەرىمەن يىق تىرەستىرە ونەر كورسەتۋدە. ءتىپتى وتانداستارىمىز كەي جارىستاردا ەل مەرەيىن اسىرىپ, ايتۋلى تۋرنيرلەردە توپ جارىپ ءجۇر. اتاپ ايتار بولساق, 2015 جىلى الەمنىڭ 31-راكەتكاسى اتانعان زارينا دياس بۇگىنگە دەيىن ءبىر مارتە WTA, سەگىز مارتە ITF ساناتىنداعى جارىستاردا باس جۇلدەنى ولجالادى. ال قازاقستاننىڭ ءبىرىنشى راكەتكاسى ەلەنا رىباكينا ەكى رەت WTA, ءتورت رەت ITF جارىستارىندا الدىنا جان سالمادى. سونداي-اق جەرلەستەرىمىز دەۆيس كۋبوگىندا دا ءتاۋىر ويىن كورسەتىپ ءجۇر. ەرلەر قۇراماسى 2011, 2013, 2014, 2015 جانە 2018 جىلدارى اتالعان ءتۋرنيردىڭ شيرەك فينالىنا دەيىن جەتسە, 2019 جىلى يسپانيانىڭ باس شاھارى – مادريدتە ۇيىمداستىرىلعان جاڭا فورماتتاعى دەۆيس كۋبوگىنىڭ فينالدىق كەزەڭىندە وينادى.
مىنە, وسىنداي ناتيجەلەردەن كەيىن كاسىپقوي تەننيسشىلەر قاۋىمداستىعى الەمدىك دەڭگەيدەگى تەننيس تۋرنيرلەرىن قازاقستاندا دا وتكىزۋگە مۇمكىندىك بەردى. ماسەلەن, وتكەن جىلدىڭ سوڭىندا نۇر-سۇلتاندا قازاقستان سپورت تاريحىنداعى العاشقى ATP 250 Astana Open ءتۋرنيرى ۇيىمداستىرىلدى. اتر 250 الەمدىك تۋرى ءبىر جىلدا 40 كاسىبي ەرلەر جارىسىن وتكىزەدى. الايدا وتكەن ماۋسىمدا پاندەمياعا بايلانىستى ونىڭ تەك 17-ءسى عانا ءوتتى. نۇر-سۇلتانداعى تۋرنير ءىس جۇزىندە جىلدىڭ سوڭعى جارىسى جانە تەننيسشىلەرگە اتر رەيتينگىنە جاعدايىن دۇرىستاپ الۋ ءۇشىن بەرىلگەن سوڭعى مۇمكىندىك بولاتىن.
جۋىردا ەلوردا تورىندە تاعى ءبىر الەمدىك دەڭگەيدەگى تەننيس ءتۋرنيرى ۇيىمداستىرىلدى. ەل تاۋەلسىزدىگىڭ 30 جىلدىعىنا وراي وتكىزىلگەن ATP Challenger Tour سەرياسىنىڭ Forte Challenger 100 جانە Forte Challenger 125 دوداسى كوپتىڭ كوڭىلىنەن شىقتى. بەدەلدى جارىسقا الەمدىك رەيتينگتىڭ ۇزدىك جۇزدىگىنە ەنگەن ويىنشىلار قاتىستى. ال قازاقستان قۇراماسىنىڭ نامىسىن ميحايل كۋكۋشكين, دميتري پوپكو, الەكساندر نەدوۆەسوۆ, دەنيس ەۆسەەۆ, تيموفەي سكاتوۆ, گريگوري لوماكين جانە باسقالار قورعادى.
«قازاقستان استاناسى ءىرى جارىستاردى قابىلداي باستادى. بۇكىل الەمدە كوروناۆيرۋس پاندەمياسىنا بايلانىستى كەستەدەگى ماتچتاردىڭ باسىم بولىگى توقتاتىلعاندىقتان, كاسىپقوي تەننيسشىلەر قاۋىمداستىعى قازاقستان تەننيس فەدەراتسياسىنان بىردەن ەكى تۋرنير وتكىزۋدى سۇرادى. بۇل سەريا اۋستراليا اشىق چەمپيوناتىندا ءوز ونەرىن اياقتاعان ويىنشىلار ءۇشىن بىردەن ەكى ۇلكەن تۋرنيرگە دايىندالۋعا جانە قاتىسۋعا تاماشا مۇمكىندىك. قازاقستان قۇراماسىنىڭ بارلىق وكىلى جارىسقا قاتىسىپ, ۇپاي الۋعا, رەيتينگتەگى ءوز پوزيتسيالارىن جاقسارتۋعا بەرىلگەن مۇمكىندىكتى جىبەرمەۋ كەرەك. ەڭ الدىمەن بۇل – وليمپيادا جولداماسىن يەلەنۋ ءۇشىن دە ماڭىزدى. ءبىز بۇعان دەيىن «چەللەندجەر» ساناتىنداعى جارىستار وتكىزگەن جوقپىز, بۇل ويىنداردا 100 جانە 125 ۇپاي ويناتىلادى. جوعارى دەڭگەيدەگى تۋرنير بولعاندىقتان, ەكى جارىسقا دا مىقتى ويىنشىلار كەلدى. سوزىمىزگە جارىسقا تىركەلگەن سپورتشىلاردىڭ ەسىمدەرى دالەل بولا الادى», دەپ اتاپ ءوتتى قازاقستان تەننيس فەدەراتسياسىنىڭ ۆيتسە-پرەزيدەنتى يۋري پولسكي ءتۋرنيردىڭ اشىلۋ سالتاناتىندا.
ءبىر اپتاعا سوزىلعان Forte Challenger 100 ءتۋرنيرىنىڭ جەكەلەي سىنىندا امەريكالىق تەننيسشى ماككەنزي ماكدونالدتىڭ باعى جاندى. تۋرنيردە قارسىلاس شىداتپاعان ماكدونالد باس جۇلدە ءۇشىن وتكەن كەزدەسۋدە اۋستريالىق يۋري روديونوۆتان ەش قيىندىقسىز ايلاسىن اسىرىپ كەتتى. ەكى سەتكە سوزىلعان باسەكەدە ول 6:1, 6:2 ەسەبىمەن باسىم ءتۇستى. سونىمەن قاتار Forte Challenger 100 جەڭىمپازى ماككەنزي 100 رەيتينگتىك ۇپاي مەن 14 400 اقش دوللارىن قانجىعاسىنا بايلادى.
ماراپاتتاۋ راسىمىندە ءسوز العان ماكدونالد Forte Challenger 100 ۇيىمداستىرۋشىلارىنا جارقىن ءارى قىزىقتى تۋرنير ءۇشىن العىسىن ءبىلدىردى. «نۇر-سۇلتانعا قايتا ات باسىن تىرەپ, بابىم مەن باعىمدى سىناۋ مۇمكىندىگىن قۋانا قابىلدادىم. بىلتىر قاراشا ايىندا Astana Open 2020 تۋرنيرىندە مەن شيرەك فينالعا دەيىن جەتىپ, قارسىلاسىمنان جەڭىلىپ قالدىم. قازاقستان استاناسىنا جاساعان ەكىنشى ساپارىم ءساتتى اياقتالدى. قوناقجاي ەلدە وتكىزگەن ءاربىر مينۋتىم ەرەكشە ءوتتى», دەدى امەريكالىق تەننيسشى ماراپاتتاۋ راسىمىندە.
ال جۇپتىق سىندا جەرلەسىمىز الەكساندر نەدوۆەسوۆ ۋكراينالىق دەنيس مولچانوۆپەن بىرگە جۇپ قۇراپ, «چەللەندجەر» ءتۋرنيرىنىڭ جەڭىمپازى اتاندى. وسى جارىستىڭ ءبىرىنشى راكەتكاسى رەتىندە تىركەلگەن قازاقستاندىق-ۋكراينالىق جۇپ فينالدا امەريكالىق ناتان پاشا مەن ماكس شنۋرمەن كەزدەستى. ءبىرىنشى پارتيادا ا.نەدوۆەسوۆ پەن د.مولچانوۆ 6:4 ەسەبىمەن باسىم تۇسسە, ەكىنشى سەتتە دە وسى ەسەپ تىركەلدى – 6:4.
وكىنىشكە قاراي, جەكەلەي سىندا ونەر كورسەتكەن قازاقستاندىقتاردان الەكساندر نەدوۆەسوۆ ىرىكتەۋ جارىسىنان ارىعا اسا الماسا, تيموفەي سكاتوۆ, ميحايل كۋكۋشكين ءتۋرنيردى ءبىرىنشى اينالىمدا, دميتري پوپكو ¼ فينالدا اقتادى.
ال Forte Challenger 125 تۋرنيرىندە چەحيالىق سپورتشى توماش ماحاچتىڭ باعى جاندى. وتانداسى ءارى الەمدىك تەننيس جۇلدىزىنا اينالعان توماش بەردىحپەن اتتاس جانە ونىڭ سپورتتاعى مۇراگەرى دەپ تانىلعان توماش ماحاچ فينالعا دەيىن شۆەيتساريالىق حەنري لااكسونەندى, Forte Challenger 100 چەمپيونى امەريكالىق ماككەنزي ماكدونالدتى, وڭتۇستىككورەيالىق سۋن-ۆۋ كۆون مەن ۇندىستاندىق پرادجنەش گۋننەسۆاراندى جەڭىپ, كەرەمەت ويىن ورنەگىن كورسەتتى.
فينالدىق ماتچتا توماش ماحاچ اۋستريالىق سەباستيان وفنەرمەن باس جۇلدەنى ساراپقا سالدى. كوپشىلىك كۇتكەندەي فينالدىق كەزدەسۋ تارتىسقا تولى بولدى. العاشقى سەتتە وفنەر 6:4 ەسەبىمەن ءوز پايداسىنا جازسا, كەيىنگى سەتتە ماحاچ ءدال سونداي ەسەپپەن ەسە قايتارىپ, تارازى باسىن تەڭەستىرىپ كەتتى. شەشۋشى كەزەڭدە قارسىلاسىنا قاراعاندا ەپتىلىك تانىتقان چەح سپورتشىسى ءۇشىنشى سەتتە دە 6:4 ناتيجەسىمەن جەڭىسكە جەتتى. قورىتىندى ەسەپ – 4:6, 6:4, 6:4. توماش ماحاچ – Forte Challenger 125 ءتۋرنيرىنىڭ چەمپيونى!
– كەز كەلگەن فينالدا جەڭىسكە تالاس شيەلەنىستى جاعدايدا ءوربيدى. قارسىلاسىم وتە جاقسى وينادى, دوپتى ويىنعا قوسۋى دا ءساتتى شىقتى. بىراق ءبىرىنشى سەتتەگى قاتەلىكتەرىمە كوڭىل كۇيىم تۇسكەنىنە قاراماستان, مەن جەڭىسكە جەتتىم. ماعان قازاقستان ۇنايدى, بۇل – مەنىڭ ءتورتىنشى ساياحاتىم جانە قايتا جول ءتۇسىپ جاتسا, قۋانا قابىل الامىن», دەدى ماحاچ ماراپاتتاۋدان كەيىن.
Forte Challenger 125 تۋرنير دە قازاقستاندىقتار ءۇشىن اسا ءساتتى بولا قويعان جوق. بايراقتى باسەكەنىڭ تۇساۋكەسەر كەزدەسۋىندە كورتقا شىققان الەمنىڭ 96-شى, وسى جارىستىڭ 3-راكەتكاسى ميحايل كۋكۋشكين دۇنيەجۇزىلىك رەيتينگتە 179-ورىندا تۇرعان پورتۋگاليالىق فرەدەريكو فەررەيرا سيلۆامەن كەزدەسىپ, وتانداسىمىز قارسىلاسىنا ەكى سەتتە (3:6, 5:7) ەسە جىبەردى. ول ءبىر اپتا بۇرىن دا ەلورداداعى وسىنداي تۋرنيردە العاشقى اينالىمنان اسا الماعان بولاتىن. تاعى ءبىر قازاقستاندىق تەننيسشى دەنيس ەۆسەەۆ جاپونيالىق تاتسۋما يتودان 4:6, 6:2, 3:6 ەسەبىمەن ۇتىلدى.
جەكەلەي سىندا قازاقستاندىقتار اراسىنداعى ەڭ ۇزدىك ناتيجە تيموفەي سكاتوۆقا تيەسىلى بولدى. جارىستىڭ 1/8 فينالىنا دەيىن جەتكەن ول شيرەك فينال ءۇشىن وتكەن باسەكەدە تۋرنير ءفيناليسى – اۋستريالىق سەباستيان وفنەرگە 6:3. 6:7 ناتيجەسىمەن جول بەردى. ال جۇپتىق سىندا الەكساندر نەدوۆەسوۆ پەن سەرب ۆيكتور ترويتسكي جۇبى جارتىلاي فينالدا ءسۇرىندى. ولار امەريكالىق جۇپ ناتان پاشا مەن ماكس شنۋرمەن كەزدەسىپ, ەكى سەتتە (6:7 (5), 2:6) جەڭىلىپ قالدى.
ايتا كەتەيىك, حالىقارالىق ءتۋرنيردىڭ جۇپتىق سىنىندا امەريكالىق ناتانيەل لەممونس پەن دجەكسون ۋيتروۋ جۇبى جەڭىمپاز اتاندى.
