تمد ەلدەرىنىڭ سىرتقى ساياسي ۆەدومستۆولارىنىڭ باسشىلارى حالىقارالىق كۇن تارتىبىندەگى وزەكتى ماسەلەلەردى, ونىڭ ىشىندە وڭىرلىك قاۋىپسىزدىك پروبلەماتيكاسىن, ەكونوميكالىق جانە مادەني-گۋمانيتارلىق سالالارداعى ىنتىماقتاستىقتىڭ جاي-كۇيى مەن پەرسپەكتيۆالارىن تالقىلادى. 2020 جىلى دوستاستىق مەملەكەتتەرى سىرتقى ىستەر مينيسترلىكتەرىنىڭ بەيىندى دەپارتامەنتتەرىنىڭ ءوزارا ءىس-قيمىلى تۋرالى اقپارات تىڭدالدى.
وتىرىسقا قاتىسۋشىلار قاۋىپسىزدىك پەن قۇقىقتىق ءتارتىپتى قامتاماسىز ەتۋ سالاسىنداعى كوپجاقتى ىنتىماقتاستىقتى كەڭەيتۋدى كوزدەيتىن قۇجاتتاردى ماقۇلدادى.
تمد ۇكىمەت باسشىلارى كەڭەسىنىڭ شەشىمىن ورىنداۋ ءۇشىن سىرتقى ىستەر مينيسترلەرى دەنە شىنىقتىرۋ جانە سپورت سالاسىنداعى, سونداي-اق تۋريزم جانە جاستار بايلانىستارى سالاسىنداعى كوپجوسپارلى ىنتىماقتاستىقتى دامىتۋ جونىندەگى قىسقا مەرزىمدى ءىس-شارالار جوسپارىن بەكىتتى. تاراپتار 1941-1945 جىلدارداعى ۇلى وتان سوعىسىنىڭ باستالۋىنىڭ 80 جىلدىعىنا بايلانىستى تمد مەملەكەتتەرى باسشىلارىنىڭ دوستاستىققا قاتىسۋشى مەملەكەتتەر حالىقتارىنا جانە الەمدىك قوعامداستىققا ۇندەۋىنىڭ جوباسىن كەلىستى.
تمد سىمك وتىرىسى اياسىندا م.تىلەۋبەردى تۇرىكمەنستان مينيسترلەر كابينەتى توراعاسىنىڭ ورىنباسارى – سىرتقى ىستەر ءمينيسترى راشيد مەرەدوۆپەن ەكىجاقتى كەلىسسوزدەر جۇرگىزدى. تاراپتار قازاقستان-تۇرىكمەن قاتىناستارىنىڭ جوعارى قارقىنىن اتاپ ءوتتى, سونداي-اق ەكى مەملەكەت باسشىلارىنىڭ قاتىسۋىمەن وتەتىن الداعى جوعارى دەڭگەيدەگى كەزدەسۋلەرگە دايىندىق ماسەلەلەرىن تالقىلادى.
