ەكونوميكا • 02 ءساۋىر، 2021

قازاقستاندىق بانكتەر ەۋروپالىق تاسىلمەن تەكسەرىلەدى

25 رەت كورسەتىلدى

وتاندىق ەكىنشى دەڭگەيلى بانكتەردىڭ جۇمىسىن قارجى نارىعىن رەتتەۋ جانە دامىتۋ اگەنتتىگى باقىلايدى.  2021 جىلى نەگىزگى باسىمدىقتاردىڭ ءبىرى ءار بانك ءۇشىن تاۋەكەلدى باعالاۋ بولعالى تۇر.  بۇل تۋرالى اگەنتتىكتىڭ باسشىسى مادينا ابىلقاسىموۆا مالىمدەدى، دەپ حابارلايدى Egemen.kz

م. ابىلقاسىموۆا جۋرناليستەرمەن كەزدەسكەن كەزدە 2021 جىلى اگەنتتىك تاۋەكەلدەردى باعالاۋدىڭ جاڭا ادىستەمەسى – ءار بانكتىڭ جاعدايىن زەرتتەيتىنىن جانە بانكتەردى تاۋەكەل بويىنشا بولۋگە مۇمكىندىك بەرەتىن SREP تاۋەكەلگە نەگىزدەلگەن قاداعالاۋ جۇيەسىن ەنگىزۋ جۇمىسىن جالعاستىراتىنىن ايتتى.

م. ابىلقاسىموۆا ناقتىلاپ وتكەندەي، باستى نازار اكتيۆتەردىڭ ساپاسىن باعالاۋ ەلەمەنتتەرىن (AQR) جانە قاداعالاۋشى سترەسس-تەستىلەۋدى (NST) بىرىكتىرۋ ارقىلى تاۋەكەلگە نەگىزدەلگەن باقىلاۋ قۇرالدارىن كەڭەيتۋگە باعىتتالادى. بۇل ءتاسىلدى ەۋروپالىق ورتالىق بانك كەشەندى باعالاۋ پروتسەسىنىڭ بولىگى رەتىندە پايدالانادى جانە سترەسس-تەست ناتيجەلەرىنىڭ سەنىمدىلىگىنىڭ كەپىلى رەتىندە قىزمەت ەتەدى. 

اگەنتتىك تاۋەلسىز اۋديتورلاردى، باعالاۋشىلاردى جانە كونسۋلتانتتاردى تارتپاي، AQR نەگىزگى ەلەمەنتتەرىن قولدانا وتىرىپ، بانكتەرگە اۋديت جۇرگىزەدى.  «اكتيۆتەردىڭ ساپاسىن باعالاۋ ناتيجەلەرى ءبىرىنشى كەزەكتە سترەسس جاعدايىندا بانكتەر كاپيتالىنىڭ جەتكىلىكتىلىگىن باعالاۋ ماقساتىندا كەلەسى قاداعالاۋ سترەسس-تەستىلەۋ ءۇشىن پايدالانىلاتىن بولادى. بيىلعى جىلى اگەنتتىك تۇراقتى باقىلاۋ پروتسەسىنە NST ەنگىزۋدى جوسپارلاپ وتىر. ول ءۇشىن 2020 جىلى ساراپتامالىق باعالاۋ نەگىزىندە وتكىزىلگەن سترەسس-تەستىلەۋ ادىستەمەسى جەكە تاۋەكەلدەردى سترەسس-تەستىلەۋدىڭ ستاتيستيكالىق مودەلدەرىن ازىرلەۋ تۇرعىسىنان جەتىلدىرىلەدى. الەمدەگى كوپتەگەن رەتتەۋشى قولداناتىن NST ەكى ساتىلى مودەلى نەگىزگە الىنادى»، دەدى ابىلقاسىموۆا.

سونداي-اق اعىمداعى جىلى بانكتەردىڭ تاۋەكەلدىك بەيىنىنە بايلانىستى جەكە قاداعالاۋ كاپيتالى بويىنشا سىياقى تولەۋ ادىستەمەسىن ازىرلەۋ جوسپارلانىپ جاتىر. بانكتىك ەمەس سەكتوردا قارجىلىق رەتتەۋشى قاداعالاۋ ساياساتىندا ۇقساس تاسىلدەردى قولدانادى. وسى جىلى باعالى قاعازدار نارىعىنداعى نەگىزگى باسىمدىقتار ساندىق جانە ساپالىق كريتەريلەردى تالداۋ، پرۋدەنتسيالدىق رەتتەۋدى ىرىقتاندىرۋ جانە سارالاۋ، تاۋەكەلدەردى باسقارۋ جۇيەسى جانە ەسەپ بەرۋ راسىمدەرى نەگىزىندە باعالى قاعازدار نارىعىنا كاسىبي قاتىسۋشىلاردىڭ تاۋەكەلدەرىن باعالاۋعا باعىتتالعان. ساقتاندىرۋ سالاسىندا ىشكى قاداعالاۋ جۇيەسى تاۋەكەلدى ساپالىق جانە ساندىق باعالاۋدى تالداۋعا نەگىزدەلگەن، ونىڭ نەگىزىندە ءار ساقتاندىرۋ ۇيىمىنا تاۋەكەلگە باعىتتالعان قاداعالاۋ دەڭگەيى بەلگىلەنەدى.

ابىلقاسىموۆا ناقتىلاپ وتكەندەي، باعالاۋ قاداعالاۋ رەسۋرستارىن قاۋىپتى ايماقتارعا شوعىرلاندىرۋعا مۇمكىندىك بەرەدى.  بيىل ءبىرىنشى رەت ساقتاندىرۋ كومپانيالارى تاۋەكەلدەردى تاۋەلسىز باعالاۋدى جۇرگىزگەلى وتىر. باعالاۋ ناتيجەلەرىن ساقتاندىرۋ ۇيىمدارىنىڭ ديرەكتورلار كەڭەسى مەن اكتسيونەرلەرى قارايدى، بۇل مەنەدجمەنت پەن مەنشىك يەلەرىنىڭ ءوز قىزمەتتەرىنىڭ ناتيجەلەرى ءۇشىن جاۋاپكەرشىلىگىن ارتتىرادى. وسى باعالاۋدىڭ ناتيجەلەرى اگەنتتىككە ۇسىنىلادى.

سوڭعى جاڭالىقتار

جارىس پەن تابىس

ەكونوميكا • بۇگىن، 00:00

اقىلدىڭ ازابى

تاريح • كەشە

مەيرامحانالار جانە پاندەميا

كوروناۆيرۋس • كەشە

جۇرت جاعاجاي ىزدەپ ءجۇر

ايماقتار • كەشە

ۇقساس جاڭالىقتار