ۇكىمەتارالىق كەڭەس وتىرىسىندا ساۋدا-ەكونوميكالىق, ينۆەستيتسيالىق, اۋىل شارۋاشىلىعى, سۋ-ەنەرگەتيكالىق, ترانزيتتىك-كولىك, تۋريستىك, عارىش جانە IT سالالارىنداعى, ونەركاسىپتىك كووپەراتسياداعى, سونداي-اق ءبىلىم بەرۋ, مادەنيەت, دەنساۋلىق ساقتاۋ, حالىقتى الەۋمەتتىك قورعاۋ جانە ەڭبەك كوشى-قونى, قورشاعان ورتانى قورعاۋ, وڭىرارالىق جانە شەكارا ماڭى ىنتىماقتاستىعى, ەاەو جانە باسقا دا ينتەگراتسيالىق بىرلەستىكتەر شەڭبەرىندەگى ءوزارا ءىس-قيمىل سالالارىنداعى ىنتىماقتاستىقتىڭ وزەكتى ماسەلەلەرى قارالدى.
تاراپتار «قاراسۋ – اق تىلەك» وتكىزۋ پۋنكتىندە «الاتاۋ» بىرلەسكەن ترانسشەكارالىق ساۋدا ورتالىعىن (تسو) قۇرۋ پەرسپەكتيۆاسىن تالقىلادى. ورتالىق بازاسىندا جەمىس-كوكونىس ونىمدەرىنىڭ زاماناۋي قويمالارىن, سونداي-اق سەرتيفيكاتتاۋ, سانيتارلىق جانە فيتوسانيتارلىق باقىلاۋ ورگاندارىن ورنالاستىرۋ كوزدەلىپ وتىر, بۇل اوك ونىمدەرىن قايتا وڭدەۋدەگى ىنتىماقتاستىقتى دامىتۋعا ىقپال ەتەتىن بولادى. تسو الاڭىندا قازاقستان مەن قىرعىزستان ونەركاسىپتىك كووپەراتسياسىن دامىتۋ ءۇشىن يندۋستريالىق ايماق قۇرۋ جوسپارلانۋدا.
قىرعىزستاننىڭ شۋ جانە ىستىقكول وبلىستارىندا جالپى ينۆەستيتسيا كولەمى $25 ملن قۇرايتىن جانە اۋىستىرىپ تيەۋ قۋاتى جىلىنا 26 مىڭ توننا بولاتىن كوتەرمە-تاراتۋ ورتالىقتارىن سالۋ ماسەلەسى قارالدى.
اۋىل شارۋاشىلىعى سالاسىنداعى ىنتىماقتاستىقتى دامىتۋ پەرسپەكتيۆاسى, «بەساعاش – كيچي كاپكا» وتكىزۋ پۋنكتىن جانە قازاقستان-قىرعىزستان شەكاراسىنداعى باسقا دا وتكەلدەردى جاڭعىرتۋ, ەكى ەلدىڭ وڭىرارالىق ىنتىماقتاستىق فورۋمىن وتكىزۋ, تاۋ باعىتتارى بويىنشا تۋريستىك توپتار ۇيىمداستىرعان مەملەكەتتىك شەكارانى كەسىپ ءوتۋ ءتارتىبى تۋرالى ۇكىمەتارالىق كەلىسىم جاساسۋ جانە ت.ب. تالقىلاندى.
قازاقستان ۇكىمەتىنىڭ باسشىسى ينفراقۇرىلىمدا, كولىكتە, ونەركاسىپتىك كووپەراتسيادا ترانسشەكارالىق بايلانىستاردى كۇشەيتۋگە, سونداي-اق ازىق-ت ۇلىك قاۋىپسىزدىگىن نىعايتۋعا باعىتتالعان اۋقىمدى تولاسسىز ينتەگراتسيالىق جوبالاردى ىسكە اسىرۋ ارقىلى ەاەو شەڭبەرىندە ەكى ەلدىڭ ينۆەستيتسيالىق ىنتىماقتاستىعىن ارتتىرۋدىڭ ماڭىزدىلىعىن اتاپ ءوتتى.
ا.مامين سونداي-اق ناۆيگاتسيالىق پلومبالاردى پايدالانۋ تاجىريبەسىن كەڭەيتۋ جانە فيسكالدىق ورگانداردىڭ مالىمەتتەرىمەن ونلاين الماسۋ ارقىلى ەكى ەل اراسىندا تاۋارلاردىڭ ءوتۋى ءۇشىن «جاسىل ءدالىز» قۇرۋ قاجەتتىگىنە نازار اۋداردى.
مەملەكەت باسشىسى قاسىم-جومارت توقاەۆتىڭ تاپسىرماسى بويىنشا قازاقستان جاقىندا قىرعىزستانعا 10 مىڭ توننا بيداي ۇنى جانە 1 مىڭ توننا كۇزدىك بيدايدىڭ ونىمدىلىگى جوعارى تۇقىمى تۇرىندە گۋمانيتارلىق كومەك كورسەتەدى.
كەلىسسوزدەر قورىتىندىسى بويىنشا قازاقستان-قىرعىز ۇكىمەتارالىق كەڭەسىنىڭ 9-شى وتىرىسىنىڭ حاتتاماسىنا, سونداي-اق «قورعاس» شىحو» اەا مەن قىرعىزستاننىڭ «نارىن» اەا اراسىنداعى ىنتىماقتاستىق تۋرالى مەموراندۋمعا قول قويىلدى.
ۇكىمەت باسشىلارى جاڭعىرتىلعان «قورداي (قازاقستان) – اق جول (قىرعىزستان)» وتكىزۋ پۋنكتىنىڭ اشىلۋ راسىمىنە قاتىستى.
2020-2021 جىلدارى جۇرگىزىلگەن قايتا جوندەۋدەن كەيىن وتكىزۋ پۋنكتىنىڭ قۇرىلىس الاڭى 3,5 ەسە, 4,9 مىڭ شارشى مەترگە دەيىن, قوزعالىس جولاقتارىنىڭ سانى 2-دەن 8-گە دەيىن, پاسپورتتىق باقىلاۋ كابينالارىنىڭ سانى 13-تەن 34-كە دەيىن ۇلعايتىلدى, زاماناۋي ينسپەكتسيالىق-تەكسەرۋ كەشەندەرى ورناتىلدى. قابىلدانعان شارالاردىڭ ناتيجەسىندە پۋنكتتىڭ وتكىزۋ مۇمكىندىگى تاۋلىگىنە 1 مىڭنان 2,5 مىڭ اۆتوموبيلگە دەيىن جانە 6 مىڭنان 25 مىڭ ادامعا دەيىن ءوستى, بۇل قازاقستان رەسپۋبليكاسى مەن قىرعىز رەسپۋبليكاسىنىڭ ساۋدا-ەكونوميكالىق ىنتىماقتاستىعىن دامىتۋعا مۋلتيپليكاتيۆتىك اسەر ەتەدى.
