مەديتسينالىق ساقتاندىرۋ قورى اتالعان شاعىم نەگىزىندە جان-جاقتى ساراپتاما جۇرگىزدى. اقپاراتتىق جۇيەلەردەگى دەرەككە سۇيەنسەك, 24 قاڭتاردا شەتەلدەن كەلگەن ەۆگەني مۇحامەدجانوۆ پەن ونىڭ جۇبايى «استانا ينتەر وتەل» قوناقۇيىنە ورنالاستىرىلىپ, COVID-19 ينفەكتسياسىنا تەست تاپسىرعان. باس سانيتارلىق دارىگەردىڭ 2020 جىلى 23 قازانداعى قاۋلىسى بويىنشا شەتەلدەن كەلگەن ازاماتتار COVID-19 ينفەكتسياسىنا پتر-اناليز تاپسىرماسا, 2 تاۋلىككە دەيىن كارانتيندىك ستاتسيونارعا جاتقىزىلۋى ءتيىس. مۇحامەدجانوۆتار دا وسى ءتارتىپ بويىنشا كارانتينگە جاتقىزىلعان, بۇل قىزمەت اقپاراتتىق جۇيەگە «اۋرۋعا كۇدىك تۋىنداۋىنا بايلانىستى باقىلاۋ جۇرگىزۋ» دەگەن اتاۋمەن ەنگىزىلگەن.
«استانا ينتەر وتەل» قوناقۇيى COVID-19 جۇقتىرعان جانە كوروناۆيرۋستىڭ الدىن الۋعا قاتىساتىن دەنساۋلىق ساقتاۋ نىساندارى مەن مەديتسينالىق ەمەس ۇيىمدار تىزىمىنە ەنگەن. بۇعان الماتى قوعامدىق دەنساۋلىق باسقارماسى مەن سانيتارلىق-ەپيدەميولوگيالىق باقىلاۋ كوميتەتىنىڭ الماتى دەپارتامەنتى اراسىنداعى كەلىسىم نەگىز بولىپ وتىر.
مەديتسينالىق ساقتاندىرۋ قورىنىڭ مالىمەتىنشە, COVID-19 ينفەكتسياسىن ەمدەۋ, الدىن الۋ شارالارىنىڭ اقىسى جۇقپالى اۋرۋلار ءپروفيلى بويىنشا ليتسەنزياسى بار ەمدەۋ مەكەمەلەرى ارقىلى تولەنەدى. سوندىقتان اتالعان ازاماتقا كورسەتىلگەن قىزمەت «يزاتيما جەكەنوۆا اتىنداعى قالالىق كلينيكالىق جۇقپالى اۋرۋلار اۋرۋحاناسى» ارقىلى تولەنگەن.
ساراپتاما بارىسىندا شاعىمدانۋشىنىڭ كارانتيندىك ستاتسيونارعا جاتقىزىلعانى راستالدى. وعان قوسا, شەتەلدەن ورالعان ازاماتتاردى ورنالاستىرۋمەن اينالىسقان مەديتسينا ۇيىمى ءتيىستى دەرەكتەردى اقپاراتتىق جۇيەگە كەش ەنگىزگەن. بۇل ماسەلە قوعامدىق دەنساۋلىق باسقارماسىنا حابارلاندى, الداعى ۋاقىتتا جاۋاپتى ماماندارعا شارا قولدانىلۋى ءتيىس.
ەسكە سالا كەتسەك, كلينيكالار مەديتسينالىق قىزمەت كورسەتىلدى دەپ جالعان اقپار تىركەگەن جاعدايدا قوردىڭ 1406 بىرىڭعاي بايلانىس ورتالىعى مەن Qoldau 24/7 ءموبيلدى قوسىمشاسى ارقىلى شاعىمدانۋعا بولادى.
2020 جىلى الەۋمەتتىك مەديتسينالىق ساقتاندىرۋ قورىنىڭ ماماندارى مەديتسينالىق قىزمەتتەردىڭ ساپاسى مەن كولەمى بويىنشا 1,2 ملن-نان اسا كەمشىلىكتى انىقتاعانى تۋرالى حابارلادى. مونيتورينگ كورسەتكەندەي, ەڭ كوپ تارالعان بۇزۋشىلىق (60%) – بۇل كومەك كولەمىنىڭ جاساندى ءوسۋى. كەلەسى كەزەكتە – ەسەپ قۇجاتتارىن قاتە تولتىرۋ, بۇل بارلىق جايتتىڭ 15%-ى, ال ەمدەۋ جانە دياگنوستيكا شارالارىن ورىنداۋ بارىسىندا ستاندارتتار مەن كلينيكالىق پروتوكولداردان نەگىزسىز اۋىتقۋ – 9,6%. سونداي-اق ناۋقاستاردىڭ دياگنوزىن جاساندى قيىنداتۋ, اۋرۋحاناعا جاتقىزباۋ نەمەسە مەديتسينالىق كومەك كورسەتپەۋ, قىزمەتتەر مەن ءدارى-دارمەكتەردى «بەرىلدى» دەپ جالعان تولتىرۋ جايتتارى كەزدەسەدى.
2020 جىلدىڭ قورىتىندىسى بويىنشا امسق 21 مىڭنان استام قىزمەتتىڭ شىن مانىندە ورىندالماعانىن انىقتادى, ونىڭ جالپى قۇنى 290,9 ملن تەڭگەگە (ەكونوميكالىق شارالاردى ەسكەرگەندە) جەتەدى. ونىڭ ىشىندە امبۋلاتورلىق-پوليكلينيكالىق كومەك, كەڭەس بەرۋ جانە دياگنوستيكا قىزمەتتەرى دەڭگەيىندە – 167 ملن تەڭگە سوماعا 20 122 كەمشىلىك انىقتالدى. بيىل قور ساپانى باقىلاۋ جۇيەسىنە وزگەرىستەر ەنگىزۋدى جوسپارلاپ وتىر. مەديتسينالىق قىزمەتتەردى كورسەتۋ ءتارتىبى مەن پاتسيەنتتەردىڭ قۇقىعىن بۇزۋعا اكەپ سوعاتىن جاعدايلار مەن سەبەپتەردى انىقتاۋ جانە الدىن الۋعا باعىتتالعان پرواكتيۆتى مونيتورينگ ەنگىزىلەدى.
