قازاقستان • 31 ناۋرىز، 2021

ءماجىلىس دەپۋتاتى دەنساۋلىق ساقتاۋ مينيسترلىگىنىڭ جۇمىسىن سىنادى

42 رەت كورسەتىلدى

ءماجىلىس دەپۋتاتى يرينا ۋنجاكوۆا Nur Otan پارتياسى فراكتسياسىنىڭ اتىنان كوروناۆيرۋس ينفەكتسياسىنان حالىقتى ۆاكتسيناتسيالاۋدىڭ باياۋ ءجۇرىپ جاتقانىن ايتىپ، ماسەلە كوتەردى، دەپ حابارلايدى Egemen.kz

ءماجىلىس وكىلى دەنساۋلىق ساقتاۋ مينيسترلىگى بۇل ناۋقاندى جۇيەلى ۇيىمداستىرماي وتىر دەگەن سىن ايتتى.

«كەشە دەنساۋلىق ساقتاۋ ءمينيسترى حالىقتى ۆاكتسينالاۋعا ۇندەدى. بىراق قايدا بارىپ ۆاكتسينا الۋعا بولاتىنىن ەل بىلمەيدى. سەبەبى وڭىرلەردەگى ەمحانالاردا ۆاكتسينا جوق»،  دەدى دەپۋتات. يرينا ۋنجاكوۆا قازىرگى احۋالدى بىلتىرعى جاعدايمەن سالىستىردى.

«بىلتىر ادامدار شاتاسىپ، پتر-تەست قايدا جانە قاشان تاپسىرۋعا بولاتىنىن بىلمەدى. ال بيىل ۆاكتسيناتسيانى قايدا جانە قاشان الۋعا بولاتىنىن بىلمەي وتىر. دەنساۋلىق ساقتاۋ مينيسترلىگى بيىل الدىن الا ءىس-قيمىل الگوريتمىن جاساي المادى ما؟ كوپتەگەن ادامنىڭ كوكەيىندە وسىنداي سۇراق تۇر»، دەدى ءماجىلىس وكىلى. يرينا ۋنجاكوۆا يزرايل، ۇلىبريتانيا، سلوۆاكيا، سلوۆەنيا، سەربيا، سينگاپۋر جانە باسقا دا بىرقاتار ەلدەردە حالىقتىڭ جارتىسىنان 90%-نا دەيىن ۆاكتسينا الىپ ۇلگەرگەنىن اتاپ ءوتتى. ال قازاقستاندا دەنساۋلىق ساقتاۋ مينيسترلىگىنىڭ اقپاراتى بويىنشا، 134 مىڭنان استام ادام ۆاكتسيناتسيالانعان.

«دەنساۋلىق ساقتاۋ مينيسترلىگى شۇعىل تۇردە ءتيىستى شارالار قابىلداۋى كەرەك. ايتپەسە ءبىز وتكەن جازداعىداي پاندەميامەن كۇرەسكە تولىق دايىن بولماي شىعۋىمىز مۇمكىن»، دەدى يرينا ۋنجاكوۆا.

وسى دەپۋتاتتىق ساۋال ارقىلى «Nur Otan» پارتياسى فراكتسياسىنىڭ مۇشەلەرى وڭىرلەر بويىنشا ۆاكتسينا جەتكىزۋدىڭ ناقتى جوسپارىن، حالىقتىڭ بارلىق توپتارىن ۆاكتسينالاۋ كەستەسىن، سونداي-اق ۆاكتسيناتسيانىڭ بارلىق پۋنكتەرى تۋرالى، ءتىپتى، ونىڭ ىشىندە، تولىق اقپارات بەرۋدى تالاپ ەتىپ وتىر.

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار