وبلىستىق ورمان شارۋاشىلىعى جانە جانۋارلار الەمى اۋماقتىق ينسپەكتسياسىنىڭ مالىمەتىنشە, كيىك قىستاپ قالعان قورعالجىن مەن تسەلينوگراد اۋداندارىنىڭ اۋماعىنان قار ۇستىندە ءولىپ جاتقان 34 كيىك تابىلعان. مامانداردىڭ جورامالداۋىنشا, تىستەرىنە تيەر تالشىق تابا الماي, اشتان ولگەنگە ۇقسايدى. بۇل پىكىر قيسىنعا ابدەن كەلەدى. كيىككە تالعاجاۋ ەتەر قارا وت جوق. انشەيىندە قار تۇرا قويمايتىن قىرات-قىرقالار دا, ىقتاسىن بولار ساي-سالا دا قارعا مەلتەكتەپ تۇر. «پو وحوتزووپروم» رەسپۋبليكالىق مەملەكەتتىك قازىنالىق كاسىپورنىنىڭ ورتالىق وڭىرلىك فيليالى ينسپەكتورلارى قورعالجىن اۋدانىنداعى ساۋمال كولى ماڭىنان, تسەلينوگراد اۋدانىنداعى اقمول اۋىلى جانىنان 20 كيىكتىڭ ولىمتىگىن تاپقان. بۇل كوزگە تۇسكەنى عانا. قاھارلى قىستىڭ سوڭىندا ادام اياعى باسا بەرمەيتىن كوزدەن تاسا, كوڭىلدەن جىراق جەردە قانشاسى وپات بولعانىن ەشكىم انىق ايتا المايدى.
وسى ءبىر وقىس وقيعاعا وراي كيىكتى امان الىپ قالۋ ءۇشىن وبلىستىق مامانداندىرىلعان تابيعاتتى قورعاۋ پروكۋراتۋراسى كيىك ورەتىن بىرنەشە اۋدان اكىمدەرىنە ورمان باۋىرىنداعى, كيىك جايىلاتىن ورىستەگى قاردى تازالاۋ جونىندە ۇسىنىس جاسادى.
وسىدان بىرەر كۇن بۇرىن قار قىسپاعىندا قالعان كيىكتەردىڭ ەلدى مەكەندەرگە كىرگەنى تۋرالى دا حابار ەمىس-ەمىس ەستىلگەن بولاتىن. كوككە اۋزى جەتكەنشە كيەلى اڭعا قامقورلىق كەرەك-اق بولىپ تۇر.
اقمولا وبلىسى
