شابۋىل جاسالعانىن يەمەندىك توپ راستاپ وتىر. ولار ساۋد ۇكىمەتىنە تيەسىلى «ارامكو» مۇناي كومپانياسىن, اسكەري اۋماقتاردى نىساناعا العانىن ايتادى. يران ەلىنىڭ جاقتاس توبى بۇل ارەكەتى ابدۋلازيز پاتشاعا قارسى ەكەنىن مالىمدەدى. وسىلايشا داممام, نارجان, اسير قالالارىنداعى اسكەري اۋماقتارعا سوققى جاسالعان. سونداي-اق راس تانۋرا, رابيح, يانبۋ, جيزان قالالارىنداعى «ارامكو» كومپانياسىنىڭ وبەكتىلەرى نىساناعا ىلىنگەن.
ء«ال-ارابيا» ارناسى ساۋد ارابياسىنىڭ اسكەري كۇشى نارجان قالاسىنىڭ ماڭىندا بالليستيكالىق زىمىران تاپقانىن حابارلادى. شابۋىل ورتكە سەبەپ بولعان. بىرنەشە تانك ورتكە ورانعان. دەگەنمەن, ساۋد ۇكىمەتى جاپا شەككەن ناقتى ايماقتاردى اتاماي وتىر. ەلدىڭ قورعانىس ءمينيسترى مۇناي وبەكتىلەرىن ساقتاپ قالۋ ءۇشىن كۇش جۇمسايتىنىن حابارلادى.
دۇيسەنبىدە ساۋد ارابياسى حۋسيتتەرگە شابۋىلدى توقتاتۋعا قاتىستى ەكى ۇسىنىس جاسادى. دەگەنمەن, قارسى تاراپتىڭ بارلىق شارتى تولىق ورىندالمايدى. ساۋد ۇكىمەتى تەك سانا قالاسىنداعى اۋەجايدىڭ اشىلۋىنا جاعداي جاسايتىنىن مالىمدەدى. ويتكەنى يەمەن استاناسىنداعى اۋەجاي 2015 جىلدان بەرى كوممەرتسيالىق رەيستەردى قابىلدامايدى. وسىلايشا يەمەندىكتەردىڭ الەممەن بايلانىسى ۇزىلگەن. ەكىنشى ۇسىنىسى سالىق ماسەلەسىنە قاتىستى. ساۋد ارابياسى مۇناي يمپورتىنان تۇسكەن سالىق پەن باسقا دا قاراجاتتى يەمەن ورتالىق بانكىنە تۇسىرەتىن بولادى. ول اقشا حۋسيتتەرگە دە بەرىلمەك. ولار بۇل قارجىدان مەملەكەتتىك قىزمەتشىلەرگە جالاقى تولەمەك. الايدا بۇل حۋسيتتەردىڭ شابۋىلى ورىندى دەگەندى بىلدىرمەيدى. ەكىنشى تاراپ ازىرگە جاۋابىن ايتقان جوق.
ال يەمەن حۋسيتتەرى بۇل شاراعا ساۋد ارابياسى تاراپىنان جاسالاتىن ۇستەمدىك پەن قىسىمنان قۇتىلۋ ءۇشىن بارعانىن ايتادى. كورشىلەس ەلدەر بۇعان قاتىستى پىكىر بىلدىرمەگەنىمەن, اقش يەمەندى قولدايدى. ولارعا ءتىپتى كومەك كورسەتۋگە دە ءازىر. يەمەن حالقى بولسا, شەتەلدىك كومەكتەن قاشپايتىنىن, كەرىسىنشە قۋانىشپەن قابىل الاتىنىن جەتكىزدى.
