شقو پد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى «دارمەك» جەدەل-پروفيلاكتيكالىق ءىس-شاراسى اياسىندا №5518 اسكەري ءبولىمىنىڭ ارنايى جاساعىمەن جانە جارما اۋداندىق ىشكى ىستەر ءبولىمىنىڭ قىزمەتكەرلەرىمەن بىرلەسىپ, جارما اۋدانى قالباتاۋ كەنتىنىڭ ماڭىندا «الماتى-وسكەمەن» اۆتوجولىندا Volvo-580 ماركالى اۆتوكولىكتى ۇستادى.
اتالعان اۆتوكولىك سالونىندا جامبىل وبلىسىنىڭ 39 جاستاعى تۇرعىنى مەن اۆتوكولىك جۇرگىزۋشىسى بولعان.
– جەڭىل اۆتوكولىكتى ءتىنتۋ بارىسىندا اۆتوكولىك ىشىنەن اۆتوماشينانىڭ ەكى قوسالقى دوڭگەلەگى تابىلدى, ولاردىڭ ىشىنەن سكوتچپەن ورالعان, كەپتىرىلگەن ماريحۋانا سالىنعان 19 بۋما تابىلدى, – دەدى شقو پد باستىعىنىڭ ورىنباسارى تالعات شاياحمەتوۆ.
تەرگەۋ بارىسىندا كۇدىكتىنىڭ تانىسىنا ءمان-جايدى ايتپاي, ونىڭ اۆتوكولىگىمەن وسكەمەن قالاسىنا دەيىن قوسالقى دوڭگەلەكتەردى جەتكىزىپ بەرۋدى وتىنگەنى انىقتالدى. بۇعان دەيىن اتالعان ەر ادام پوليتسيا قىزمەتكەرلەرىنىڭ نازارىنا ىلىكپەگەن. جەدەل ۋاكىلدەر كۇدىكتىنىڭ جامبىل وبلىسىنان ەسىرتكى جەتكىزۋ ارناسىن ۇيىمداستىرۋعا تىرىسقانىن انىقتادى. ءتارتىپ ساقشىلارى ەسىرتكى ارناسىنا قاتىسى بار ادامداردىڭ جەكە باسىن انىقتاپ جاتىر.
شقو بويىنشا سوت ساراپتاماسى ينستيتۋتىنىڭ قورىتىندىسىنا سايكەس تاركىلەنگەن ەسىرتكىنىڭ جالپى سالماعى شامامەن 19,5 كەلىنى قۇرايدى. كۇدىكتى قاماۋعا الىندى, قر قك-ءنىڭ 297-بابىنىڭ 3-بولىگى (ەسىرتكى, پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز دايىنداۋ, قايتا وڭدەۋ, يەمدەنۋ, ساقتاۋ, تاسىمالداۋ, جونەلتۋ نە وتكىزۋ) بويىنشا سوتقا دەيىنگى تەرگەۋ جۇرگىزىلىپ جاتىر. اتالعان قىلمىس ءۇشىن مۇلكىن تاركىلەي وتىرىپ, 15 جىلعا دەيىن باس بوستاندىعىنان ايىرۋ جازاسى كوزدەلگەن.
