قىستا جولدىڭ جاعدايىنا باقىلاۋ جاساۋ – پوليتسيانىڭ سۋىق تۇسە كەزەك كۇتتىرمەيتىن مىندەتتەرىنىڭ ءبىرى. سولتۇستىك قازاقستان وبلىسىنىڭ اۋماعى ارقىلى وتەتىن حالىقارالىق جانە رەسپۋبليكالىق ماڭىزى بار جولدارعا «قازاقاۆتودور» جشس قىزمەت كورسەتەدى, كۇن سايىن قار تازالايتىن 60 تەحنيكا شىعادى.
وبلىستىق جانە اۋداندىق ماڭىزى بار جولداردى كۇتىپ ۇستاۋ ءۇشىن «پەتروپاۆل جولدارى» جشس-ءنىڭ مەن ءۇش قوسالقى مەردىگەر ۇيىمنىڭ 114 تەحنيكاسى قىزمەت كورسەتەدى. پەتروپاۆلدىڭ كوشە-جول جەلىسىنە 22 كوممۋنالدىق ۇيىم قارايدى. بيىلعى قىس جول قىزمەتتەرىن اۋرە-سارساڭعا سالدى. كۇن سايىن وبلىس ورتالىعىنىڭ كوشەلەرىن تازارتۋعا 500-گە دەيىن تەحنيكا شىقتى. قالانىڭ كولىك جۇرەتىن جولدارىن تازالاپ ۇلگەرىپ تۇردى, ەندى كاسىپورىندار تروتۋارلاردى تازارتۋعا كوشتى.
جۇمىس جوسپارلارى سولتۇستىك قازاقستان وبلىسى اكىمشىلىك پوليتسيا باسقارماسى جول جانە تەحنيكالىق ينسپەكتسيا ءبولىمىنىڭ قىزمەتكەرلەرى كۇندەلىكتى جۇرگىزەتىن تەكسەرىس ناتيجەلەرىنە سايكەس جۇرگىزىلەدى.
تەكسەرىس ناتيجەلەرى بويىنشا كەمشىلىكتەردى جويۋ جونىندە ۇيعارىم جولدانادى. مىسالعا, ناۋرىز ايىنىڭ باسىندا قيزاتوۆ كوشەسىنىڭ بويىنداعى ومبى اينالما جولى مەن بوركي كەنتىنە دەيىنگى ارالىقتا تەرەڭ دوڭگەلەك ىزدەرى پايدا بولعانى انىقتالدى. قىزمەت كورسەتەتىن كاسىپورىنعا قاتىستى ۇيعارىم شىعارىلدى, كۇشەيتىلگەن جۇمىس ناتيجەسىندە التى ساعاتتىڭ ىشىندە كەمشىلىك جويىلدى. جىل باسىنان بەرى پوليتسەيلەر مۇددەلى ۇيىمدارعا 223 ۇيعارىم جولدادى. جولدار مەن جول قۇرىلىستارىن قاناعاتتانارلىقسىز دەڭگەيدە كۇتىپ-ۇستاعانى ءۇشىن 60 ونىڭ ىشىندە ۇيعارىمداردى ورىنداماعان ءۇش لاۋازىمدى تۇلعا جاۋاپكەرشىلىككە تارتىلدى.
