ءبىلىم • 24 ناۋرىز، 2021

اقتوبەدەگى عاسىرمەن قۇرداس مەكتەپتەردىڭ جاي-كۇيى تالقىلاندى

128 رەت كورسەتىلدى

اقتوبە قالاسىنداعى ءۇش اۋىسىمدى مەكتەپتەر ماسەلەسى وزەكتىلىگىن جويعان جوق. سونىڭ ىشىندە ءالى  كۇنگە دەيىن ۇزدىكسىز ءبىلىم بەرىپ كەلە جاتقان كەڭەس وكىمەتىنىڭ العاشقى جىلدارى سالىنعان ءبىلىم بەرۋ مەكەمەلەرى عيماراتتارىنا كۇردەلى ساراپتاما جاساۋ قاجەت بولىپ وتىر. ءۇش اۋىسىمدى مەكتەپتەر ماسەلەسىنىڭ تۇبىرىمەن شەشىلمەۋىنە قالا  تۇرعىندارى سانىنىڭ جىل سايىن كوبەيىپ جاتقاندىعى دا اسەر ەتىپ كەلەدى. وبلىستىق ءبىلىم باسقارماسىنىڭ باسشىسى جولداس باتىرحان الداعى وقۋ جىلىندا مەكتەپتەر جۇكتەمەسىن ازايتۋ تاقىرىبىندا قالاداعى بارلىق ورتا مەكتەپ ديرەكتورلارىمەن جيىن وتكىزدى، دەپ حابارلايدى Egemen.kz.

جيىندا الداعى ۋاقىتتا ءۇش اۋىسىمدىق وقۋدى بولدىرماۋ ءۇشىن مەكتەپ عيماراتتارىنىڭ جانىنان قوسىمشا قۇرىلىس سالۋ جۇمىستارى پىسىقتالدى. بيىل اتالعان مەكتەپتەرگە جاپسارلاس قۇرىلىستار سالۋ ءۇشىن  جوبالاۋ-سمەتالىق قۇجاتتار ازىرلەۋگە وبلىستىق بيۋدجەتتەن قارجى ءبولىندى. قالا مەكتەپتەرىنىڭ ديرەكتورلارى 1975-80 جىلدارى ەسكى تيپتىك ۇلگىدە سالىنعان  مەكتەپتەر اۋماعىنداعى  بوس ورىندارعا جاڭا سپورتزالدار مەن شەبەرحانالار سالعان جاعدايدا نەگىزگى عيماراتتا پاندىك وقۋ كابينەتتەرىنە ورىن بوسايتىندىعىن اتاپ ءوتتى.

جولداس باتىرحان ەڭ ءبىرىنشى كەزەكتە كۇردەلى جوندەۋدى قاجەت ەتەتىن   قالاداعى №2 جانە №51  مەكتەپ-گيمنازيالارى مەن №8، №12، №14، №22 ورتا مەكتەپ عيماراتتارىنىڭ قازىرگى جاي-كۇيلەرىنەن تولىق اقپارات الا وتىرىپ، وتە ەسكى، اپاتتى مەكتەپتەر ماسەلەسىن شەشۋگە باسىمدىق بەرىلەتىندىگىن حابارلادى. بۇگىندە №14 جانە №22 ورتا مەكتەپ عيماراتتارىنىڭ جاي-كۇيىنە اتا-انالار تاراپىنان الاڭداۋشىلىق كوپ. بۇلار كەڭەس وكىمەتىنىڭ العاشقى جىلدارى سالىنعان ءبىلىم وردالارى. ماسەلەن، 1936 جىلى 320 بالانىڭ ءبىلىم الۋىنا ارناپ سالىنعان №14 ورتا مەكتەپتە قازىر 1274 وقۋشى وقيدى. ءار جىلدارى وقۋ كورپۋسىنا جوندەۋ جۇمىستارى جۇرگىزىلىپ كەلە جاتقانىنا قاراماستان، «ەسكىنىڭ اتى ەسكى» دەيدى وسى مەكتەپتىڭ ديرەكتورى. 2018 جىلى وسى وقۋ ورنىنىڭ شاتىرى جاڭارتىلىپ، 2020 جىلى كۇردەلى جوندەۋدەن وتسە دە، عيماراتتىڭ تارلىعى جىلدان جىلعا وقۋشىلار مەن مۇعالىمدەرگە ىڭعايسىزدىق تۋدىرىپ كەلەدى.

بۇگىندە 1025 وقۋشى ءبىلىم الىپ جاتقان №22 ورتا مەكتەپ 1923 جىلى سالىنعان. بىرنەشە جىل بۇرىن  مۇنداعى نەگىزگى وقۋ كورپۋسىنىڭ قاسىنا ەكىنشى قۇرىلىس  سالىندى. 2007 جىلى وسى مەكتەپتىڭ جىلۋ جۇيەسى، 2012 جىلى شاتىرى مەن تەرەزەلەرى اۋىستىرىلدى. الايدا   قازىرگى كەزدە مۇنداعى پاندىك كابينەتتەردىڭ تارلىعى مەن جەتىسپەۋشىلىگى ءبارىبىر وزەكتىلىگىن جويعان جوق.

جيىن سوڭىندا وسى وقۋ جىلى اياقتالعان بويى  قالاداعى №12، №14، №22، №47 ورتا مەكتەپتەرىنە قوسىمشا عيماراتتار سالۋ جۇمىستارى باستالاتىندىعى بەلگىلى بولدى.

   

سوڭعى جاڭالىقتار

تمد ءسامميتى قازان ايىندا وتەدى

پرەزيدەنت • بۇگىن، 19:56

ۇقساس جاڭالىقتار