اۋدان ورتالىعى قاراۋىلدا اشىلعان جاڭا مەشىت «قۇنانباي قاجى» دەگەن اتاۋعا يە بولدى. قۇلشىلىق ءۇيىنىڭ اشىلۋىندا ءسوز العان باس ءمۇفتي ءتالىم مەن تاربيەگە نەگىزدەلگەن مەشىتتىڭ ءمانىن كوپشىلىككە جەتكىزىپ, قۇنانباي قاجىنىڭ پاراسات پايىمىنا دا توقتالىپ ءوتتى.
ء«بىز ۇنەمى ابايدى بيىك دارەجەدە ايتىپ كەلەمىز. ونىڭ اقىل-پاراسات, دانىشپاندىق, اقىندىق قاسيەتى جوعارى ەكەنىن بىلەمىز. اباي اركەز ادىلدىكتى قالادى. بىراق وسى ابايدىڭ بيىك دارەجەگە جەتۋىندە اكە مەكتەبى تۇرعانىن ۇمىتپاعان ءجون. بۇگىنگى ابايتانۋشىلار دا وسىنى ءجيى ايتىپ ءجۇر. ويتكەنى ءجۇز مەكتەپتىڭ تاربيەسىنە تەڭ كەلەتىن قۇنانبايدىڭ قاسيەتىن كورىپ وسكەن بالا اباي ۇلتىنا ادال قىزمەت ەتتى. قۇنانباي بولىس بولا ءجۇرىپ, مەملەكەتتىك قىزمەتپەن قاتار تاربيە ىسىنە دە ارالاستى. «ەسكى تام» دەگەن جەردە مەكتەپ سالعىزدى, كەيىن مەدرەسە, قارقارالىدا مەشىت سالدىردى. مىنە, اللاعا شۇكىر ارعى بابالارىمىزدىڭ ەسىمىن ەرلىك كورىپ, ناسيحاتتايتىن كەزگە جەتتىك. بۇل اۋەلى اللا, ەكىنشى تاۋەلسىزدىگىمىزدىڭ ارقاسى. ءدىني باسقارمانىڭ قۇرىلعانىنا 30 جىل جانە بيىلعى تاۋەلسىزدىكتىڭ 30 جىلدىعى قارساڭىندا ءار ايماقتاعى مەشىتتەرىمىزگە تاريحي تۇلعالار, ءدىن جاناشىرلارى, باتىرلاردىڭ ەسىمىن بەرۋدى ۇيعارعان ەدىك. مىنە «قۇنانباي قاجى» مەشىتى دە بۇگىن ەسىگىن اشتى. قۇتتى بولسىن. ءىشى جاماعاتقا تولسىن, جاماعاتى اۋىزبىرشىلىكتە بولسىن» دەپ اقجارما تىلەگىن ايتىپ, جاڭا مەشىتكە ءدىني باسقارما اتىنان سىي-سياپات تابىستادى.
اشىلۋ راسىمىندە ءسوز العان اباي اۋدانىنىڭ اكىمى جارقىنبەك بايسابىروۆ قۇلشىلىق ءۇيىنىڭ اشىلۋىنا مۇرىندىق بولعان جەرگىلىكتى دەمەۋشى ازاماتتارعا اۋدان حالقى اتىنان ريزاشىلىعىن جەتكىزدى. سونداي-اق اباي مەرەيتويى قارساڭىندا ۇلەس قوسقان بىرنەشە ازاماتتى «ABAI» مەدالىمەن ماراپاتتادى. ونىڭ ىشىندە ارنايى توسبەلگىگە باس ءمۇفتي ناۋرىزباي قاجى تاعان ۇلى دا يە بولدى.
قۇرىلىسى سوڭعى ءبىر جىلدا قارقىن الىپ, جەرگىلىكتى كاسىپكەر دۋمان امانتاي ۇلىنىڭ دەمەۋشىلىگىمەن اياقتالعان. بۇعان دەيىن اۋدان حالقى وسى جەردەگى كونە مەشىتتە قۇلشىلىق جاساپ كەلگەن بولاتىن. 500 ادامعا شاقتالعان مەشىت جانىندا بوكەنشى بابا ۇرپاقتارى سالدىرعان حاتىمحانا بار.
ايتا كەتەيىك سالتاناتتى شاراعا قمدب اپپارات باسشىسى عىلىمبەك جادىگەر ۇلى, زەكەت جانە قايىرىمدىلىق قورىنىڭ ديرەكتورى تالعات وماروۆ قاتىستى.
