ەكولوگيا • 20 ناۋرىز، 2021

شالقار كولىنىڭ ءتۇبىن تازارتۋ جۇمىستارى باستالدى

232 رەت كورسەتىلدى

بۇل تۋرالى وڭىردەگى وزەكتى ەكولوگيالىق ماسەلەلەردى شەشۋگە ارنالعان  جيىندا بەلگىلى بولدى، دەپ حابارلايدى Egemen.kz.

«شالقار كولىنىڭ ءتۇبىن تازارتۋ جۇمىستارىنا سۋ ماماندارى مەن ساراپشىلاردى تارتتىق. بىلتىر جوبالىق-سمەتالىق قۇجاتتامانى ازىرلەۋ جۇمىستارى اياقتالعان بولاتىن. ۇكىمەت اتالمىش جوبانى قولداپ، بيىل  ونى جۇزەگە اسىرا باستايمىز. اۋقىمدى جوبا ءۇش جىلعا جوسپارلانعانىمەن، جۇمىستى ىجداعاتتاپ، ەكى جىلدا اياقتاۋعا بولادى. كولدى قالپىنا كەلتىرۋ جۇمىستارىنىڭ رەكرەاتسيالىق جانە شارۋاشىلىق تۇرعىدان وزەكتىلىگىن ايتپاعاننىڭ وزىندە، ايماق ەكولوگياسى ءۇشىن ماڭىزدىلىعى زور»، دەپ اتاپ ءوتتى جيىندا وبلىس اكىمى وڭداسىن ورازالين.

شالقار اۋدانى تۇرعىندارى ارناسى جىلدان-جىلدان ازايىپ بارا جاتقان شالقار كولىنىڭ ءتۇبىن تازارتۋ ماسەلەسىن بىرنەشە جىلدان بەرى كوتەرىپ ءجۇر. وتكەن جىلدىڭ سوڭىندا سەنات دەپۋتاتتارى كولدى قالپىنا كەلتىرۋدىڭ  ايماق ەكولوگياسى ءۇشىن  وزەكتىلىگىن ماقۇلداپ، رەسپۋبليكالىق بيۋدجەتتەن 3 ميلليارد تەڭگە بولۋگە  ىقپال ەتتى. دەپۋتاتتاردىڭ جەدەل ءىس-قيمىلىنىڭ ارقاسىندا بيىلعى جىلدىڭ باسىندا 432،95 ملن  تەڭگە كولەمىندە العاشقى ترانش ءبولىندى.

ايتا كەتۋ كەرەك، شالقار كولى ء تۇبىنىڭ تارتىلىپ، باتپاقتانۋى 1990-شى جىلداردىڭ باس كەزىندە باستالدى. وعان جىلما-جىل  كوكتەمدە كولگە قۇيىلاتىن سۋ مولشەرىنىڭ ازايۋى دا سەبەپشى بولدى. ساراپشىلار ءبىر-بىرىمەن جالعاسقان ۇلكەن جانە كىشى شالقار كولدەرىنىڭ تارتىلۋ سەبەپتەرىن  اعىندى سۋلاردىڭ ازدىعىنان، سۋ ءۇستى جانە سۋ استى وسىمدىكتەرى كوبەيۋىنەن بۇلاق كوزدەرىنىڭ بىتەلىپ، سۋ ساپاسىنىڭ ناشارلاۋىنان كورەدى. باستاۋىن  مۇعالجار قىراتتارىنىڭ بويىنداعى قار سۋىمەن تولىعاتىن بۇلاقتاردان الاتىن ۇلكەن جانە كىشى شالقار كولدەرىنىڭ قازىرگى ۋاقىتتا قاتتى  تارتىلعانى سونشالىق،  جاعالاۋدان بىرنەشە شاقىرىمعا الىستاپ، قۇرعاعان ارنالارىن قامىس مەن قوعا باستى.  

ەكولوگيالىق  جوبانىڭ باس مەردىگەرى – «TOLAGAI-2050» جشس-ءى ساراپشىلار مەن گيدرولوگ مامانداردىڭ قاتىسۋىمەن تالداۋ جۇمىستارىن باستاپ كەتتى. ەندى قار كەتىسىمەن كولگە سۋ كەلەتىن اڭعارلار مەن بۇلاق باستاۋلارىن تولىق زەرتتەۋ جۇمىستارى باستالماقشى. وعان تابيعات قورعاۋ مەكەمەسىنىڭ ماماندارى دا اتسالىسىپ، قالپىنا كەلتىرۋ جوباسىنىڭ كولدى قۇرتۋ جوباسىنا اينالىپ كەتپەۋىن قاتاڭ قاداعالاۋى قاجەت. جەرگىلىكتى تابيعات جاناشىرلارى، سونىڭ ىشىندە شالقار اۋدانىنىڭ بەلسەندى ازاماتتارى  كولدى تازارتۋ جۇمىستارىنىڭ قورشاعان ورتاعا زيان  كەلتىرمەي جۇرگىزىلۋىن ەرەكشە باقىلاۋدا ۇستاۋى ءتيىس.

سوڭعى جاڭالىقتار

15169 ادام كوروناۆيرۋس جۇقتىردى

كوروناۆيرۋس • بۇگىن، 09:17

ۇقساس جاڭالىقتار