سۋرەتتە: قوس عارىشكەر قازاقتار ورتاسىندا. باي-ولكە ايماعى.
ۇلىستىڭ ۇلى كۇنى – موڭعول عارىشكەرى ءۇشىن ۇمىتىلماس داتا. جىل سايىن ناۋرىز مەرەكەسىمەن عارىشكەر ج.گۋرراگچا عالامنىڭ بار قازاعىن قۇتتىقتايدى. ءوزىنىڭ كوككە كوتەرىلگەن نۇكتەسى قازاق دالاسى ەكەنىن, ءارى قايتا ورالعاندا تاعى دا قازاق دالاسىنا امان-ەسەن تابانى تيگەنىن ماقتانىشپەن ەسكە الادى.
– ونىڭ سىرتىندا, – دەيدى موڭعول عارىشكەرى, – وتكەن عاسىردىڭ جەتپىسىنشى جىلدارىنىڭ باسىندا اسكەر قاتارىنا شاقىرىلىپ, راديو-لوكاتور پولكىنە كەلگەنىمدە, مەنى قابىلداعان روتا كومانديرىم قۇسان رۇستەم دەگەن قازاق ازاماتى ەدى. وسى كىسى كەيىن مەنىڭ اسكەري ۇشقىشتاردى دايارلايتىن فرۋنزە اتىنداعى ۋچيليششەگە وقۋعا بارۋىما قولداۋ كورسەتتى. ەگەر قۇسان كوكەم بولماسا, عارىشكەر بولماۋىم دا مۇمكىن ەكەنىن ەسكە الامىن.
موڭعول عارىشكەرىنىڭ ۇستازى اتانعان قازاق قۇسان رۇستەم ۇلى 2005 جىلى اتاجۇرتىنا ورالىپ, قاراعاندى وبلىسى, بۇحار جىراۋ اۋدانى, بايمىرزا اۋىلىندا دۇنيەدەن ءوتتى.
– بۇلاردان باسقا مەنى قازاق حالقىمەن رۋحاني بايلانىستىراتىن تاعى ەكى تۇلعا بار, – دەيدى ج.گۇرراگچا. – ونىڭ ءبىرىنشىسى, ۇزەڭگىلەس دوسىم اتاقتى عارىشكەر ۆ.جانىبەكوۆ 1942 جىلى وڭتۇستىك قازاقستان وبلىسىنىڭ ەسكەندىر (يسكاندەر) اۋىلىندا دۇنيەگە كەلگەن بولسا (بۇل ەلدى مەكەن 1956 جىلى وزبەكستان قۇرامىنا بەرىلگەن), ەكىنشىسى – ەڭ جاقىن دوسىم قازاق حالقىنىڭ ۇلكەن اقىنى مۇحتار شاحانوۆ.
قوس عارىشكەر عارىشتان امان-ەسەن ورالعان سوڭ, قويىن قۇرتتاپ, ايرانىن ۇرتتاپ جايماشۋاق وتىراتىن موڭعول جۇرتى ۇلكەن توي جاسادى. ەكى ازاماتتى قوسارلى اتتاي الىپ ءجۇرىپ, بارلىق ايماقتى ارالاتتى. وسى ساپاردى ەڭ اۋەلى موڭعوليا ۇكىمەتى باي-ولكە ايماعىنان باستادى. ايماق جۇرتى قوس عارىشكەردى تايلى-تۇياعىمەن قارسى الدى. قازاق پەن وزبەك اراسىندا وسكەن ۆ.جانىبەكوۆ جەرگىلىكتى جۇرتپەن قاداۋ-قاداۋ بولسا دا قازاقشا ءتىل قاتىسقانى ءالى كۇنى ەل ەسىندە.
موڭعول عارىشكەرى بيىل دا جىلداعى ادەتى بويىنشا قازاق حالقىن ۇلىستىڭ ۇلى كۇنىمەن قۇتتىقتايدى.
