ارىز-شاعىم ستانتسيوننىي, بەيبىتشىلىك شاعىن اۋداندارى مەن وبلىس ورتالىعىنىڭ ىرگەسىندەگى نۇرلىكوش, بىرلىك ەلدى مەكەندەرىنەن دە كوپ تۇسۋدە. ماسەلەنىڭ ءمانىسىن بىلمەك بولىپ حابارلاسقانىمىزدا, قالالىق تۇرعىن ءۇي-كوممۋنالدىق شارۋاشىلىعى ءبولىمى قول قۋسىرىپ قاراپ وتىرماعاندىقتارىن, ءتيىستى كومپانيالار تاۋلىك بويى قار تازالاپ جاتقاندىعىن ايتىپ اقتالدى.
وبلىستىق «جول اكتيۆتەرىنىڭ ۇلتتىق ساپا ورتالىعى» فيليالى مەن «اقمولا – ادالدىق الاڭى» جوبالىق كەڭسەسىنىڭ وكىلدەرى قالا تۇرعىندارىنىڭ ارىز-شاعىمدارىن زەردەلەپ, وكپە-نازدىڭ تۋىنداۋىنا نە سەبەپ بولىپ وتىرعاندىعىن انىقتاۋعا تىرىسۋدا. ماسەلەن, قالا شەتىندەگى شاعىن اۋداندارعا «كوكشە تازالىق» كومپانياسى قىزمەت كورسەتەدى. ايتسە دە اۋماعى كەڭ پىشىلگەن شاعىن اۋدانعا جالعىز عانا قار تازالايتىن تەحنيكا ءبولىنىپتى. قازىر تاۋ بولىپ ءۇيىلىپ قالعان قاسات قاردى تازالاۋعا قاۋقارى جەتپەي جاتىر. قارجى ءبولۋ مەحانيزمىنىڭ ءوزى كۇمان تۋعىزادى. وقىرماننىڭ كوز الدىنا ەلەستەتۋ ءۇشىن تاپتىشتەپ ايتۋعا تۋرا كەلىپ تۇر. بۇل شاعىن اۋدانعا اينالما جول جانە ءۋاليحانوۆ كوشەسى ارقىلى كىرۋگە بولادى. ءبىر تۇسىنىكسىزى ج.مۋسين اتىنداعى كوكشەتاۋ جوعارى قازاق پەداگوگيكالىق كوللەدجىن جيەكتەي وتەتىن جول ەسەپكە الىنباعان. ەسەپكە الىنباعان سوڭ قارجى دا قاراستىرىلماعان. قارجى قاراستىرىلماعان سوڭ قاسات قارعا مەلدەكتەپ قالعان جولدى كىم تازالاماق؟
ال قارجى از ەمەس. بيىل وبلىس ورتالىعىن قاردان تازالاۋعا 210 ملن تەڭگە قاراجات ءبولىنىپ وتىر.
«كوكشە تازالىق» پەن «زەرەن-2006» مەردىگەرلىك ۇيىمدارى قار تازالاۋدا. بۇل كومپانيالارمەن جاسالعان كەلىسىمشارتتا نۇرلىكوش پەن بىرلىك ەلدى مەكەندەرى قاراستىرىلماعان», دەيدى كوكشەتاۋ قالالىق تۇرعىن ءۇي-كوممۋنالدىق شارۋاشىلىعى ءبولىمىنىڭ سەكتور مەڭگەرۋشىسى ەربولات سەرىكپاەۆ.
الدىن-الا ەگجەي-تەگجەيلى ەسكەرىلمەگەندىكتەن, قار باسقان شاعىن اۋداندارداعى ەرەسەكتەر جۇمىستارىنا, وقۋشىلار مەكتەپتەرىنە جەتە الماي قينالۋدا. جەدەل جاردەم دە جەتە المايدى. كەلىسىمشارت بويىنشا مەردىگەرلەر بوران باسىلعان سوڭ 4-6 ساعات ىشىندە جولدى تازارتۋعا ءتيىس. بىراق بۇل تالاپ ساقتالا بەرمەيدى. قار باسقان كوشەلەرگە قاراپ وبلىس ورتالىعىندا جولداردى قىسقى كۇتىمىن باقىلايتىن مەكەمە مۇلدە جوق دەپ تە ايتۋعا بولادى.
– ەگەر جەرگىلىكتى اكىمدىك بىزبەن كەلىسىمشارت جاساسا, ءبىز ءوز كومەگىمىزدى ۇسىنۋعا ءازىرمىز, – دەيدى «جول اكتيۆتەرىنىڭ ۇلتتىق ساپا ورتالىعى» وبلىستىق فيليالىنىڭ ينجەنەرى يگور ستەفان, – قالانىڭ شەت جاقتاعى كوشەلەرىندە قاردىڭ كوپتىگى ءوز الدىنا, كوكتايعاقپەن كۇرەسۋ شارالارى تالاپقا ساي اتقارىلماي جاتىر. ونىڭ ەڭ باستى سەبەبى, ارنايى تەحنيكانىڭ جەتىسپەيتىندىگىندە.
تىعىرىقتان شىعار جالعىز جول, تاپسىرىس بەرۋشىنىڭ مەردىگەرلەردى مىندەتتەۋ تەتىگىن جەتىلدىرۋىندە. تۇرعىن ءۇي-كوممۋنالدىق شارۋاشىلىعى ماماندارى اپتا سايىن ءار كوشەنىڭ قاردان تازالانۋىن قاداعالاعانىمەن, جۇمىس تالاپقا ساي ەمەس. بۇگىنگى تاڭدا 70 تەحنيكا جۇمىلدىرىلعان. بىراق تابيعاتتىڭ توسىن مىنەزىمەن بەلدەسۋگە كۇش جەتىمسىز. ءار جىلدىڭ ءوز ەرەكشەلىگى بولادى. ماسەلەن, بىلتىر وبلىس ورتالىعىنان 140 مىڭ تەكشە مەتر قار شىعارىلسا, بيىل 270 مىڭ تەكشە مەتر قار تاسىمالدانىپتى. دەمەك كۇن قاباعىنا وراي قار تازالايتىن تەحنيكالار سانى كوبەيتىلۋى كەرەك ەدى.
الدا تاعى ءبىر ۇلكەن سىن بار. ول – كوكتەمگى قىزىل سۋدىڭ جۇرەر ۋاقىتى. تاۋ-تەڭىز قار استىندا جاتقان وبلىس ورتالىعىن كۇن جىلىنىسىمەن توپان سۋ باسىپ قالماس پا ەكەن؟!
كوكشەتاۋ
