قوعام • 15 ناۋرىز، 2021

قازاقستاندا «الەۋمەتتىك ءاميان» جوباسى ەنگىزىلەدى

12 رەت كورسەتىلدى

الەۋمەتتىك ءامياندى ەنگىزۋ قازاقستاندىقتارعا بانك كارتالارىن پايدالانۋدىڭ بالاماسى بولادى، دەپ حابارلايدى Egemen.kz ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنە سىلتەمە جاساپ.

قازىر ۇلتتىق بانك ساۋدا جانە ينتەگراتسيا، تسيفرلىق دامۋ، يننوۆاتسيالار جانە اەروعارىش ونەركاسىبى، ەڭبەك جانە حالىقتى الەۋمەتتىك قورعاۋ مينيسترلىكتەرىمەن بىرلەسىپ، قازاقستاندا الەۋمەتتىك ءامياندى ەنگىزۋ ماسەلەسىن پىسىقتاۋدا.

الەۋمەتتىك ءاميان – بانك كارتاسىنا بالاما جانە ونىڭ بانكتەردە بار بارلىق مۇمكىندىكتەرى بولادى.

الەۋمەتتىك ءامياننىڭ ارتىقشىلىعى – ول ۇلتتىق بانك جۇيەسىندە ءاربىر قازاقستاندىققا جسن بويىنشا اشىلادى. شوت اشۋ نەمەسە بانك كارتاسىن جاڭارتۋ ءۇشىن ء(اربىر 3 جىل سايىن) ەكىنشى دەڭگەيدەگى بانكتەرگە تۇراقتى تۇردە بارۋ قاجەت بولمايدى. بۇل سونداي-اق اميانعا الەۋمەتتىك تولەمدەردى پرواكتيۆتى تۇردە ەسەپتەۋگە مۇمكىندىك بەرەدى.

«ازاماتتارعا الەۋمەتتىك تولەمدەر مەن جاردەماقىلاردىڭ قايدا ەسەپتەلەتىنىن تاڭداۋ مۇمكىندىگى بەرىلەدى: الەۋمەتتىك اميانعا ەلەكتروندىق اقشامەن نەمەسە ادەتتەگى تاسىلمەن بانك كارتاسىنا اۋدارۋ. الەۋمەتتىك ءامياننان ءوز قاراجاتىن بانك كارتاسىنا اۋدارۋعا جانە ونى ادەتتەگىدەي پايدالانۋعا نەمەسە قولما-قول اقشاعا اينالدىرۋعا بولادى»، دەپ حابارلادى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەربول وسپانوۆ.

الەۋمەتتىك اميانعا ەسەپتەلگەن قاراجات «تولەمدەر جانە تولەم جۇيەلەرى تۋرالى» زاڭعا سايكەس بانكتەر، كوللەكتورلار جانە سالىق ورگاندارى تاراپىنان ءوندىرىپ الۋدان قورعالاتىن بولادى.

الەۋمەتتىك ءاميان بانكتىك تولەم قۇرالى رەتىندە بارلىق قاۋىپسىزدىك تالاپتارىنا سايكەس كەلەدى. ءبىرىنشى كەزەكتە، پايدالانۋشى تاراپىنان ەكى فاكتورلى اۋتەنتيفيكاتسيا جۇرگىزىلەدى. دەربەس دەرەكتەردىڭ قورعالۋى ساقتاۋ، وڭدەۋ دەڭگەيىندە قامتاماسىز ەتىلەدى. ەكىنشى دەڭگەيدەگى بانكتەر مەن ەلەكتروندىق تولەم جۇيەلەرىنە قويىلاتىن قولدانىستاعى بارلىق تالاپتار الەۋمەتتىك اميانمەن قامتاماسىز ەتىلەدى.

ءامياننان ءسىز ونلاين رەجيمىندە تولەم جاساي الاسىز (مىسالى، كوممۋنالدىق قىزمەتتەر، تەلەفون جانە ت.ب. ءۇشىن) نەمەسە ونى بانك كارتاسىنا بايلاپ، كارتانى پايدالانا الاسىز. ازامات الەۋمەتتىك ءامياندى، ونىڭ ىشىندە قولما-قول اقشانى پايدالانۋ كەزىندە ەشقانداي كەدەرگىلەردى سەزىنبەيدى.

سوڭعى جاڭالىقتار

ۇقساس جاڭالىقتار