قانشا جەردەن جاقىن تارتقانىمەن الىپ ءشارى اسپانىنداعى اۋا تۋعان جەردىڭ تۇتىنىنە تاتىمايدى ەكەن-اۋ.
ءبىزدى وسىنداي ويعا جەتەلەگەن قازاقستان سۋرەتشىلەر وداعىنىڭ مۇشەسى, «تارلان» سىيلىعىنىڭ لاۋرەاتى اسقار ەسداۋلەتتىڭ «اتامەكەن» تۋىندىسى. تابانىمدى توپىراعى ءسۇيىپ, ماڭدايىمدى جەلى وپكەن, كوڭىلىمدى اق جايناق كۇنى ەلىتكەن التىننان قىمبات بەسىك جۇرت. كارتيناعا قاراعاندا اۋىلداعى اقجايناق ساتتەر, ەسكى كينو لەنتاسىنداي ساعىم جىلدار, ك ۇلىمكوز كۇندەردىڭ كەرۋەنى كوز الدىڭنان ءتىزىلىپ وتەدى.
كارتينادا كەلمەس ۋاقىت بەدەرىندە كەتكەن ادەمى ساتتەردىڭ ايقايى, قيىلىس-بۇرىلىسى, اقشاڭداق جولى, اقساقال اقىلى, باياعى قوڭىر جىلداردىڭ قۋانىشى شالقىپ جاتىر. بالالىعىڭنىڭ بالاباقشاسىن كوز الدىڭا اكەلەتىنىن قايتەسىڭ, شىركىن؟! ۋاقىتتى كەرى اينالدىرىپ, ساعىنىشقا اينالعان مەرەيلى مەزەتكە قايتا ساپار شەككىن كەلەدى.
قىلقالام شەبەرى اسقار ەسداۋلەتوۆ ەلدەگى ەڭ باتىل ءارى جاڭاشىل سۋرەتشىلەردىڭ ءبىرى. سولاي دەگەننىڭ وزىندە, ءوز تۋىندىلارىندا ۇلتتىق جانە ءداستۇرلى سيۋجەتتەرگە ۇنەمى كوڭىل ءبولىپ وتىرادى. مۇنى وسى كارتينانىڭ ءوزى-اق كورسەتىپ تۇرعانداي.
«اتامەكەن» كارتيناسىنىڭ سيۋجەتى ۇرپاق ساباقتاستىعى مەن تۋعان جەرگە دەگەن ساعىنىش بيىگىندە سيپاتتالعان. ۇلكەنگە قۇرمەت, كىشىگە ىزەت, سونداي-اق بايىرعى كوشپەلىلەردىڭ ءومىرىن ءھام ءداستۇرلى تۇرمىس كورىنىستەرىن اشىپ بەرەدى. سۋرەتشى وقىرمان نازارىن تازا تۇستەرگە اۋدارۋعا تىرىسقان. كارتينا ساندىك كەسكىندەمە ستيلىمەن ورىندالعان.
نەگىزىندە, قىلقالام يەسى ءىس جۇزىندە تازا تۇستەردى ارالاستىرماي پايدالانعان. كارتينانىڭ ورتاسىنداعى قاريا مەن تۇيەدەن جىلى جانە سۋىق رەڭكتەر بايقالادى. كۇڭگىرتتەۋ سارى, ارالاس كوگىلدىر, جاسىل تۇستەر, بوياۋلاردىڭ جەڭىل رەڭكتەرى وقىرماندى تىنىشتىق پەن جاراسىمدىلىققا جەتەلەيدى.
تۇستەردىڭ قانىق قالىڭ تابىنان ءمولدىر كەڭىستىككە توگىلگەن ءارتۇرلى كەسكىندەمەلىك تاسىلدەر قولدانىلعان. بۇل اۆتوردىڭ شەبەرلىگىن ايدىكتەپ تۇرعانداي. اۆتوردىڭ كوكەيىندە جانارتاۋداي اتقىلاپ تۇرعان ەڭ ۇلى ساعىنىش – اياۋلى اتامەكەنى.
