ەۋروپانىڭ ۇلكەن ساحنالارىندا ونەر كورسەتىپ, ەسىمى الەمگە تانىلعان بەلگىلى وپەرا انشىسىنە ءبىر وبلىستىڭ فيلارمونياسى تارلاۋ بولعان شىعار دەپ ويلادىق.
الايدا 12 ناۋرىز كۇنى ءباسپاسوز جيىنىن وتكىزىپ, جۋرناليستەرمەن كەزدەسكەن قوستاناي فيلارمونياسىنىڭ ۇجىمى باسشىمىز ارامىزداعى 2-3 ارىزقوي ادامنىڭ كەسىرىنەن جوعارى جاقتىڭ قىسىمىمەن كەتتى دەپ مالىمدەدى. ءباسپاسوز جيىنىنان كەيىن فيلارمونيا عيماراتىنىڭ الدىنا شىعىپ نارازىلىق اكتسياسىن وتكىزگەن فيلارمونيا ارتىستەرى «باسشىمىزدى قايتارىڭىزدار!» دەگەن ۇندەۋ جاريالادى.
– ءبىز بۇل شەشىمگە قارسىمىز. ويتكەنى سۇندەت بايعوجين بىزگە كەلگەلى بەرى ءوزىنىڭ ءبىلىمدى دە بىلىكتى, ءادىل باسشى, شەبەر ۇيىمداستىرۋشى ەكەنىن كورسەتە ءبىلدى. فيلارمونيانىڭ مارتەبەسى كوتەرىلدى, ەلىمىزدەگى ءىرى ونەر وردالارىمەن قانشاما مەموراندۋمدارعا قول قويىلىپ, كارانتيننەن شىقساق, ۇلكەن جوبالاردى قولعا الامىز دەپ جوسپارلاپ وتىرعان ەدىك. 9-ناۋرىز كۇنى اياق استىنان ۇجىمدى جيناپ, مەن جۇمىستان كەتۋ تۋرالى وتىنىشكە قول قويدىم دەدى. مۇنى باسشىمىزدىڭ ەمەس, جوعارى جاقتىڭ شەشىمى دەپ بىلەمىز. ءوزىنىڭ تۋعان جەرىنە قىزمەت ەتەمىن دەپ كەلىپ وتىرعان الەمدىك دەڭگەيدەگى ونەر ادامىن كەۋدەسىنەن يتەرىپ, بار, كەت دەگىزىپ قويا المايمىز, − دەدى فيلارمونيا ءانشىسى مايرا قارجاۋوۆا.
سۇندەت بايعوجين وبلىستىق فيلارمونياعا بىلتىر قىركۇيەك ايىندا باسشى بولىپ تاعايىندالعان ەدى. ءباسپاسوز جيىنىن ۇيىمداستىرۋشىلاردىڭ ايتۋىنشا, سودان بەرى ۇجىمنىڭ ىشىندەگى 2-3 ادام جاڭا باسشىنىڭ ۇستىنەن جوعارىداعىلارعا «باسشىمىز ۇلتشىل, ء بىزدى قۋدالاپ جاتىر» دەپ قايتا-قايتا ارىز جازا بەرگەن.
ء«بىز ديرەكتوردىڭ ۇلتشىلدىعىن كورگەن جوقپىز. ورىسشاعا دا, قازاقشاعا دا جەتىك. ءار ادامنىڭ كوڭىلىن تابا بىلەدى. بىراق ول كىسى كەلگەلى جۇمىسقا دەگەن تالاپ كۇشەيگەنى راس», دەيدى بۇرىنعى باسشىنىڭ ارىپتەستەرى.
− فيلارمونيا ۇجىمىنىڭ 90 پايىزى سۇندەت بايعوجيننىڭ باسشىلىعىمەن جۇمىس ىستەگىسى كەلەدى. بىراق ورتامىزدا باسشىمىزدىڭ جۇمىس ىستەۋ ءادىسىن ۇناتپايتىن بىرەن-ساران ادامدار بار. ولار ديرەكتوردىڭ كاسىبي دەڭگەيدە جۇمىس ىستەۋدى تالاپ ەتكەنىن ورىنسىز ءتيىسۋ, قۋدالاۋ دەپ تۇسىندىرەدى. ناتيجەسىندە, فيلارمونيانى العا جەتەلەيتىن ناعىز كەرەك باسشىدان ايىرىلىپ قالىپ وتىرمىز. سوندىقتان وبلىس اكىمىنىڭ ورىنباسارىنان بىزبەن كەزدەسىپ, جان ايقايىمىزدى ايماق باسشىسىنا جەتكىزۋىن تالاپ ەتەمىز. سۇندەت وسى وبلىستىڭ عانا ەمەس, بۇكىل ەلىمىزدىڭ ابىرويىن اسقاقتاتىپ جۇرگەن ءبىرتۋار ونەرپاز. مۇنداي ادامدى جۇمىستان بوساتىپ, جاي جىبەرە سالۋعا بولمايدى. ەگەر جۇمىس بارىسىندا قاتە جىبەرسە, بىردەن قىزمەتىنەن بوساتپاي, ەسكەرتۋ جاساۋ كەرەك ەدى. قازىر كارانتين تالاپتارى جەڭىلدەپ, ەندى جۇمىسقا كىرىسەمىز دەپ وتىرعاندا باسشىسىز قالىپ, نە ىستەرىمىزدى بىلمەي وتىرمىز, − دەدى فيلارمونيا ءانشىسى ارىستان قۇرمانوۆ.
ونەرپازداردىڭ پىكىرىنشە, سۇندەت بايعوجيننىڭ قىزمەتىنەن كەتۋىنە ونىڭ ورنىنا قىزىعىپ جۇرگەن باقتالاس ارىپتەستەرىنىڭ ىقپالى ءتيۋى مۇمكىن.
− بۇرىنعى باسشىمىز مارقۇم نازىمبەك مولداحمەتوۆ مەزگىلسىز قايتىس بولعان سوڭ, ءبىزدىڭ ىشىمىزدە ديرەكتورلىققا ۇلكەن تالاس باستالدى. ءبىزدى جاساندى تۇردە جىك-جىككە ءبولىپ, «سەن اناعان داۋىس بەرەسىڭ, ول مىناعان داۋىس بەرەدى» دەگەنگە دەيىن باردى. بيلىككە قىزىققانداردىڭ ىشىندە ەڭ الدىمەن قازىرگى ورىنباسار زۋحرا يمانوۆا بار. ودان كەيىن ەسكى ديرەكتور الەكساندر ەۆسيۋكوۆ, رەجيسسەر ەلەنا كريۆوۆالار تۇر. ءتۇزۋ باسشىنىڭ سىرتىنان جان-جاققا دومالاق ارىز دومالاتقاندار دا وسىلار بولۋى مۇمكىن, − دەدى فيلارمونيا ءانشىسى سەرىك ابىلەۆ.
الايدا فيلارمونيا ديرەكتورىنىڭ ورىنباسارى زۋحرا يمانوۆا ارىپتەستەرىنىڭ ءسوزىن تەرىسكە شىعارىپ, سۇندەت بايعوجيننىڭ وزىنە ەشقانداي قىسىم كورسەتپەگەنىن, ونىڭ لاۋازىمىنان كەتكەنى ءوزى ءۇشىن توسىن جاعداي ەكەنىن العا تارتىپ, ات-تونىن الا قاشتى.
سۇندەت بايعوجينگە قوڭىراۋ شالىپ ەدىك, بۇرىنعى باسشى: «مەن جۇمىس بارىسىندا وزىمە دەيىن جاسالعان كوپتەگەن زاڭعا قايشى دۇنيەلەردى تاپتىم. فيلارمونيا ديرەكتورىنىڭ ورىنباسارى زۋحرا يمانوۆا لاۋازىمىن اسىرا پايدالانىپ, ءمور باسۋعا قۇقى بولماسا دا, جۇمىس ورىندارىن زاڭسىز ۇلەستىرگەن. بۇل ۆاكانسيالاردىڭ بۇيرىعى 21-ءى كۇنى شىقسا, جۇمىسقا ورنالاسۋشىنىڭ ءوتىنىشى 22-ءسى كۇنى بەرىلگەن. بۇيرىق ءوتىنىشتىڭ نەگىزىندە شىقپاي ما؟ مۇندا كەرىسىنشە, ءبىرىنشى بۇيرىق شىعادى دا, ودان كەيىن ءوتىنىش جازىلادى. وسىلايشا ورىنباسار قول قويۋ, ءمور باسۋ قۇقى بولماسا دا بوس ورىنداردى وڭدى-سولدى ۇلەستىرگەن. ول ادامدار ورىنباسارعا اقشا تولەگەن. فيلارمونياعا تىركەلگەن ءبىر-ەكى ادام كارانتين باستالعالى رەسەيدە ءجۇر, ەشقاشان جۇمىسقا شىقپاعان. ولارعا مۇندا ايلىق تولەپ, ارتىن جاسىرىپ-جاۋىپ وتىرعان. مۇنىڭ ءبارى ديرەكتوردىڭ مىندەتىن اتقارۋشى ءىسساپاردا جۇرگەندە جاسالىپ وتىر. مەن بۇل زاڭسىز جۇمىس ورىندارىن جاۋىپ تاستادىم. ورىنباسارىم زۋحرا يمانوۆا مەنى جان-جاققا جاماناتتى عىپ, باسىنان اياعىنا دەيىن جۇمىس ىستەتكىزبەدى. ول كىسىنىڭ بىزگە ءبىلىمى دە سايكەس كەلمەيدى, مۋزىكانت ەمەس, سويتە تۇرا شىعارماشىلىق ۇجىمدا ديرەكتوردىڭ ورىنباسارى بولىپ وتىر. بۇلاي بولمايدى. قازىر ۇجىم قالاپ جاتسا, مەن قىزمەتىمە قايتىپ كەلۋگە دايىنمىن. بىراق ماعان ءبىراز دۇنيەنى رەتتەۋ كەرەك. ورىنباسار جۇمىستان كەتۋى كەرەك. وسىنىڭ ءبارىن ۇيىمداستىرىپ وتىرعان - الەكساندر ەۆسيۋكوۆ. ال كريۆوۆا ء«بىزدىڭ بيشىلەرىمىز رەسەيدە ءجۇر» دەپ مەن جۇمىسقا كەلگەن كۇنى-اق ايتۋى كەرەك ەدى. ونى مەن قۇجاتتاردى تەكسەرگەنشە, جاسىرىپ, ايلىق تولەپ كەلگەن. وسىنىڭ ءبارى ورەسكەل زاڭ بۇزۋشىلىق بولىپ تابىلادى. مەن كريۆوۆاعا قاتاڭ سوگىس دايىنداپ قويعام. بۇل ۇشەۋىنە ونەر ورداسىندا ورىن جوق. بۇلاي بولمايدى. ىشتەن ءىرىپ جاتقان جەردە قالاي ونەرمەن اينالىسۋعا بولادى؟ ەگەر ءبارى دۇرىستالسا, فيلارمونياعا مىندەتتى تۇردە كەلەم. مەن سول ءۇشىن جارتى جىلدىڭ ىشىندە قانشاما وپەرا تەاترىمەن كەلىسىم-شارتقا وتىرىپ, بۇكىل ادامداردى ورىن-ورنىنا قويىپ, ۆاكانسيالاردى دۇرىستاپ, كوركەمدىك جەتەكشىلەردى شاقىرتىپ, جارتى ايلىقپەن جۇرگەندەردى تولىق جالاقىعا كوشىرىپ, ءبارى دۇرىستالدى, ەندى كارانتين جەڭىلدەسە, جۇمىسقا كىرىسەمىز دەپ وتىرعاندا مىناداي جاعداي بولىپ وتىر. وتە وكىنىشتى», دەدى.
مادەنيەت باسقارماسىنىڭ باسشىسى ەرلان قالماقوۆتىڭ ايتۋىنشا, سۇندەت بايعوجين فيلارمونيا ديرەكتورى قىزمەتىنەن ءوز ەركىمەن كەتكەن.
− سۇندەت ءابدىراحمان ۇلى – ەسىمى قازاقستانعا عانا ەمەس, الەمنىڭ كوپتەگەن ەلىنە تانىلعان اسا تالانتتى, وتە بەدەلدى ۇلكەن ساحنانىڭ ادامى. ءبىز بىلتىر فيلارمونيا ديرەكتورى لاۋازىمىنا تاعايىنداعاندا ول كىسىگە بار كۇش-جىگەرىن سالىپ ەڭبەك ەتىپ, ۇلكەن شىعارماشىلىق ۇجىمدى جاڭا بەلەستەرگە جەتەلەيدى دەگەن سەنىم ارتقان ەدىك. الايدا جارتى جىلدان كەيىن جۇمىستان كەتۋ تۋرالى ءوز قولىمەن جازىلعان ءوتىنىشىن اكەلىپ, ءوز ەركىمەن قىزمەتىنەن كەتتى. ەڭ اۋەلى سۇندەت ءابدىراحمان ۇلى شىعارماشىلىقتىڭ ادامى ەكەنىن ءتۇسىنۋىمىز كەرەك. بىلۋىمشە, قازىردىڭ وزىندە ەلوردامىزدا تەلەۆيزيالىق جوباعا قاتىسىپ جاتىر. كارانتين اياقتالسا, ول كىسىگە ءتۇرلى شىعارماشىلىق جوبالارعا شاقىرتۋلار كوبەيەدى. ياعني ۇنەمى ساپارعا شىعۋىنا تۋرا كەلەدى. سوندىقتان سۇندەت ءابدىراحمان ۇلىنىڭ تازا شىعارماشىلىقپەن اينالىسۋ تۋرالى قابىلداعان شەشىمىن دۇرىس دەپ قابىلداپ, وتىنىشىنە قول قويدىم. ادامنىڭ ءوز ەركىمەن قابىلداعان ەرىكتى شەشىمىنەن قانداي دا ءبىر زاڭسىزدىقتى ىزدەۋ دۇرىس ەمەس. ال ەسىمى الەمگە تانىمال ادامعا قىسىم كورسەتتى دەۋ, ارينە, ارتىق ءسوز. ءتىپتى قازىر فيلارمونيادا ەڭبەك ەتىپ جۇرگەن ادامدارعا دا باسشى رەتىندە قىسىم كورسەتۋ مۇمكىن ەمەس. وزدەرىڭىز كورىپ وتىرسىزدار عوي, قاي-قايسى دا وسى وڭىرگە بەلگىلى, بەدەلدى ادامدار, ۇجىم بولىپ ءوز وي-پىكىرلەرىن ەركىن ءبىلدىرىپ جاتىر. بىراق بۇل جەردە بۇكىل ۇجىم دەگەن ءسوز ورىنسىز شىعار. ۇلكەن ونەر ۇجىمىنداعى شاعىن عانا ءبىر توپ ءوز ويىن ءبىلدىرىپ جاتىر. وبلىستىق فيلارمونيادا بۇگىندە 300-گە جۋىق ادام جۇمىس ىستەسە, سونىڭ ىشىندە 40 شاقتى ادام باسشىلارىنىڭ كەتۋىنە قارسى. ول كىسىلەردىڭ پىكىرىن قۇرمەتتەيمىز, بىراق جۇمىستان كەتۋ تۋرالى باستاما ديرەكتوردىڭ وزىنەن شىعىپ وتىر, − دەدى ە.قالماقوۆ.
فيلارمونيا ۇجىمى كەلەسى اپتادا وبلىس اكىمىنە شىعىپ, سۇندەت بايعوجيندى وزدەرىنە قايتا باسشى ەتىپ تاعايىنداۋدى وتىنبەك. بۇل ماسەلەنىڭ شەشىم تابۋ, تاپپاۋى الداعى ۋاقىتتىڭ ەنشىسىندە.
قوستاناي وبلىسى
