ءىس-شارا بارىسىندا چوي يون سونعا پرەزيدەنت قاسىم-جومارت توقاەۆتىڭ حاتى تابىس ەتىلدى.
چوي يون سون 2019 جىلدىڭ اقپانىندا حانكۋك شەت تىلدەرى ۋنيۆەرسيتەتىن قازاق ءتىلى ماماندىعى بويىنشا ءبىتىردى. ستۋدەنتتەرمەن الماسۋ باعدارلاماسى شەڭبەرىندە 2015-2016 ءجىلدارى ال-فارابي اتىنداعى قازاق ۇلتتىق ۋنيۆەرسيتەتىندە وقىپ, 2017 جىلى «استانا ەكسپو - 2017» حالىقارالىق مامانداندىرىلعان كورمەسىندە كورەيا رەسپۋبليكاسىنىڭ پاۆيلونىندا قىزمەت ەتتى.
قازىرگى ۋاقىتتا ول حانكۋك شەت تىلدەرى ۋنيۆەرسيتەتىنىڭ عىلىمي قىزمەتكەرى رەتىندە جۇمىس ىستەپ, قازاق ءتىلىن زەرتتەۋ مەن ونى ناسيحاتتاۋ بويىنشا ەڭبەگىن جالعاستىرۋدا. ول قازاق ءتىلىن جوعارى دەڭگەيدە مەڭگەرىپ قانا قويماي, حالقىمىزدىڭ مادەنيەتى مەن داستۇرىن تەرەڭ بىلەدى.
چوي يون سون «تۇركىستان» گازەتىنە بەرگەن سۇحباتىندا قازاق ءتىلىن ۇيرەنگەنى, كورەي-قازاق سوزدىگىن قۇراستىرىپ جاتقانى, ەلىمىزدەگى وقۋ مەن ءومىر ءسۇرۋدىڭ تاجىريبەسى تۋرالى ءوز اسەرىمەن ءبولىستى. مەملەكەت باسشىسى قاسىم-جومارت توقاەۆ گازەتتە جاريالانعان سۇحباتتى وقىپ, ونى جوعارى باعالاعان بولاتىن. ءوزىنىڭ حاتىندا ول چوي يون سونعا جەكە ريزاشىلىعىن ءبىلدىرىپ, قازاق ءتىلىن زەرتتەپ, كورەي-قازاق سوزدىگىن قۇراستىرۋىن قولدايتىنىن جەتكىزگەن.
