قاسىم-جومارت توقاەۆقا وسى جىلدىڭ قاڭتار-اقپان ايلارىنداعى ەلىمىزدىڭ الەۋمەتتىك-ەكونوميكالىق دامۋ قورىتىندىلارى جانە ەلدەگى سانيتارلىق-ەپيدەميالىق احۋال تۋرالى ەسەپ بەرىلدى.
ۇسىنىلعان مالىمەتتەرگە سايكەس سوڭعى ەكى ايدا ەكونوميكادا تۇراقتى وڭ ديناميكا بايقالادا. اتاپ ايتقاندا, وڭدەۋ ونەركاسىبى, قۇرىلىس, اۋىل شارۋاشىلىعى سالالارى قارقىندى دامىپ كەلەدى. قىزمەت كورسەتۋ بىرتىندەپ قالپىنا كەلە باستادى. اقپارات پەن بايلانىس سالاسىندا وڭ كورسەتكىشتەرگە قول جەتكىزىلدى. ازىق-ت ۇلىك ءوندىرىسى, جەڭىل ونەركاسىپ, حيميا ونەركاسىبى, مەتاللۋرگيا, ونىڭ ىشىندە, ءتۇرلى ءتۇستى مەتال ءوندىرىسى مەن ماشينا قۇراستىرۋ, فارماتسەۆتيكا سالالارىندا تۇراقتى ءوسىم بار.
پرەزيدەنتكە وپەك+ مونيتورينگ كوميتەتى وتىرىسىنىڭ قورىتىندىلارى تۋرالى اقپارات بەرىلدى. اتالعان وتىرىستا قازاقستان ءۇشىن مۇناي ءوندىرىسىن تاۋلىگىنە 20 مىڭ باررەلگە دەيىن كوبەيتۋ تۋرالى جەكە كەلىسىم جاسالعانى ايتىلدى. بۇل تاۋ-كەن سەكتورىنداعى ءوندىرىس ءوسىمىن بىرتىندەپ ارتتىرۋعا مۇمكىندىك بەرەدى.
كەزدەسۋدە ەلدەگى سانيتارلىق-ەپيدەميالىق جاعداي تالقىلاندى. پرەمەر-ءمينيستردىڭ ايتۋىنشا, جاعداي باقىلاۋدا: رەسپۋبليكا بويىنشا ۆيرۋستىڭ ارتۋ كورسەتكىشى 0,9-دى قۇرايدى, جۇقپالى اۋرۋحانالارداعى توسەك ورىن 23 پايىزعا, جان ساقتاۋ بولىمشەلەرىندەگى ورىندار 16 پايىزعا تولعان.
مەملەكەت باسشىسىنا ينۆەستيتسيالار تارتۋ, تۇرعىنداردى جۇمىسپەن قامتۋ, الەۋمەتتىك ماڭىزى بار تاۋارلاردىڭ باعاسىن تۇراقتاندىرۋدى قامتاماسىز ەتۋ جانە ەلىمىزدىڭ الەۋمەتتىك-ەكونوميكالىق دامۋىنىڭ باسقا دا وزەكتى ماسەلەلەرى بويىنشا قابىلدانىپ جاتقان شارالار تۋرالى دا باياندالدى.
