وبلىستىق كوپبەيىندى اۋرۋحاناسىنىڭ ونكولوگيالىق بولىمىنە وڭەشتىڭ قاتەرلى ىسىگى اسقىنعان 52 جاستاعى شۋ اۋدانىنىڭ تۇرعىنى كەلىپ تۇسكەن. دارىگەرلەردىڭ مالىمەتىنشە, بويى مەن سالماعى قالىپتى نورماعا سايكەس كەلمەيتىن ناۋقاستىڭ جاعدايى العاشىندا وتە ناشار بولعان. الايدا, تۇرعىننىڭ ءومىرىن ساقتاپ قالۋ ءۇشىن شۇعىل تۇردە شەشىم قابىلدانىپ, اتالعان ناۋقاسقا تاجىريبەلى دارىگەر جاندوس سەيداحمەتوۆتىڭ باسشىلىعىمەن وتا جاسالدى.
وبلىستىق دەنساۋلىق ساقتاۋ باسقارماسىنىڭ مالىمەتىنشە, وتا بارىسىندا وڭەشكە توتالدى رەزەكتسياسىمەن قورەكتىك تۇتىكشە ورناتىلىپ, وڭەش بويىنداعى وسكىندەر الىنىپ تاستالىپتى. سونداي-اق, اسقازاندى جۇمىلدىرۋ ەم-شارالارى جۇرگىزىلگەن. العاشقى وتادان كەيىن-اق ناۋقاستىڭ جاعدايى جاقسارىپ, ارنايى تۇتىكشە ارقىلى تاماقتانا باستاعان. «ناۋقاسقا بىرنەشە مارتە وپەراتسيا جاساۋ قاجەت. كەلەسى جولى ءبىز توق ىشەكتىڭ كەسىندىسىنەن وڭەش ارقىلى قورەكتىك زاتتاردىڭ وتكىزگىشتىگىن قالپىنا كەلتىرمەكپىز. ياعني, تابيعي جولمەن تاماقتانۋىن جولعا قويامىز», دەيدى وبلىستىق كوپبەيىندى اۋرۋحاناسى حيرۋرگيا ءبولىمىنىڭ مەڭگەرۋشىسى جاندوس سەيداحمەتوۆ.
بۇگىندە ناۋقاستىڭ جاعدايى جاقسارىپ, ۇيىنە شىعارىلدى. وتا ءساتتى وتكەندىكتەن, وعان ەندى حيميالىق تەراپيا قابىلداۋ قاجەت ەمەس. ايتا كەتەيىك, جامبىل وبلىستىق كوپبەيىندى اۋرۋحاناسى ونكولوگيالىق قۇرىلىمىنىڭ دارىگەرلەرىمەن العاش رەت ءۇشىنشى ساتىداعى ونكوناۋقاستارعا جاسالعان ەكى وتا دا ءساتتى وتكەن.
