سەناتوردىڭ ايتۋىنشا, جىل سايىن تۇركىستان قالاسىنا 1 ميلليوننان استام تۋريست كەلەدى. ال وبلىس حالقىنىڭ سانى 2 ميلليوننان اسادى. بۇل ەلىمىزدەگى حالىق ەڭ تىعىز قونىستانعان ايماق. بۇل رەتتە پوليتسيا قىزمەتكەرلەرىنىڭ جەتىسپەۋشىلىگى قۇقىق ءتارتىبىن قامتاماسىز ەتۋگە جانە ەسىرتكى تاسىمالىنا قارسى كۇرەسكە تەرىس اسەر ەتىپ وتىر.
«وبلىستاعى پوليتسيا قىزمەتكەرلەرىنىڭ جالپى سانى نورماتيۆتەردەن الدەقايدا تومەن, ءار قىزمەتكەردىڭ جۇكتەمەسى 2-3 ەسە جوعارى. 100 مىڭ تۇرعىنعا شاققانداعى پوليتسيا قىزمەتكەرلەرىنىڭ سانى رەسپۋبليكا بويىنشا 386 بولسا, تۇركىستان وبلىسىندا – 185. ءتىپتى حالىق سانى جاعىنان تۇركىستان وبلىسىنان ەكى ەسە از وڭىرلەردە پوليتسيا سانى ەكى ەسە جوعارى. ونداي فاكتىلەر بار. بىراق ىشكى ىستەر ورگاندارىنىڭ نەگىزگى قىزمەتى ادام قۇقىقتارى مەن قاۋىپسىزدىگىن قورعاۋ بولىپ تابىلاتىندىقتان, ولارداعى قىزمەتكەرلەر سانى دا تۇرعىندار سانىنا تىكەلەي بايلانىستى بولۋى ءتيىس», - دەپ اتاپ ءوتتى ءالي بەكتاەۆ.
وسىعان بايلانىستى, سەناتور وڭىردەگى قوعامدىق قاۋىپسىزدىگىن قامتاماسىز ەتۋدى كۇشەيتۋ ءۇشىن تۇركىستان وبلىسىنىڭ پوليتسيا قىزمەتكەرلەرىنىڭ سانىن كوبەيتۋدى سۇرايدى.
