كوز الدىمىزدا «كوكتەم» كارتيناسى. بوياۋعا ورانعان بيازى ارۋ كەيپىندە. جانعا ساۋلە, كوڭىلگە نۇر قۇيادى. دۇنيە سوعان قاراعان سايىن وزگەرىپ كەتەردەي ءارتۇرلى تۇستەردىڭ قوسىندىسى جانىڭا شۋاق سىيلايدى.
اتالمىش تۋىندىنىڭ اۆتورى – قازاقستان مەملەكەتتىك سىيلىعىنىڭ لاۋرەاتى, قازاق ۇلتتىق ونەر اكادەمياسىنىڭ پروفەسسورى اعىمسالى دۇزەلحانوۆ.
ول – ايەل بەينەسىن ءجيى سالاتىن سۋرەتشىلەردىڭ ءبىرى. ونىڭ بارلىق تۋىندىسىنان تابيعات, ءومىر, ماحاببات, سۇلۋلىق, پاكتىك سىندى ايەل سيمۆولدارى كورىنىس تاپقان. بۇل شىعارماسىندا دا اۆتور ايەلدى كوكتەم كەيپىندە بەينەلەپ, مەرەيلى مەزگىلگە تەڭەيدى.
شىنىندا, كوكتەم – تابيعات جاڭا تىرشىلىك ءۇشىن ويانىپ, تازالىق جانە بالعىندىقپەن تىنىستايتىن جىلدىڭ ەڭ ساۋلەلى مەزەتى. كوكتەمكوز ارۋدىڭ جانارىنا ۇيا سالعان عاجايىپ ءسات. ارماندارىڭنىڭ باستاۋحاتىنداي.
كارتينادان كۇمىسپەن, اسىل تاستارمەن بەزەندىرىلگەن ۇلتتىق كيىم كيگەن جاس ايەلدى كورەمىز. ونىڭ اينالاسىندا قۇستار مەن كوبەلەكتەر ۇشىپ ءجۇر, ارتىندا ءبۇر جارعان جاسىل بۇتاقتار. ءساندى, سالتاناتتى ساۋكەلەسىن گۇلدەپ تۇرعان الما بۇتاقتارى كومكەرىپ تۇر. سۋرەت سۇلۋلىق قوسا جاڭا كەلگەن كوكتەمدى سەزىندىرەدى.
كويلەك پەن فوننىڭ اشىق سارى ءتۇسىن جايلى جاسىل ءتۇس كومكەرگەن. سۋرەتشى تۇستەردىڭ سيمۆوليزمىنە جۇگىنگەنىن ايتىپ ءوتۋ كەرەك. قازاق حالقىندا سارى ءتۇس قوزعالىستى, شەكسىز ءومىردى, كەڭدىكتى جانە سابىردى بىلدىرەدى. حالىق تۇسىنىگىندە جاڭا كۇندەردىڭ باستاۋى ەسەبىندە سانالادى. جاسىل ءتۇس قاشاندا جاستىق شاقتىڭ سيپاتىندا.
سۋرەتشى سان الۋان تۇستەر مەن جاس قىزدىڭ بەينەسى ارقىلى كوكتەمنىڭ ويانعان ءساتىن كەنەپكە تۇسىرگەن. ىشىندە جازدى قۋانا كۇتكەن جاننىڭ جۇرەك ءلۇپىلى دە بار.
