ايماقتار • 11 ناۋرىز، 2021

تسيفرلى ترانسفورماتسيا: پويىزدار قوزعالىسىن باسقارۋ ورتالىعى اشىلدى

139 رەت كورسەتىلدى

اقتوبە قالاسىندا اشىلعان پويىزدار قوزعالىسىن باسقارۋ ورتالىعى وتكەن جىلدىڭ جەلتوقسان ايىنان بەرى كىدىرىسسىز جۇمىس ىستەپ، اتىراۋ، باتىس قازاقستان، ماڭعىستاۋ، قىزىلوردا وبلىستارى اۋماعىنان وتەتىن پويىزداردىڭ قوزعالىسىن رەتتەپ وتىر. بۇل – «قازاقستان تەمىر جولى» ۇك» اق-تىڭ تسيفر­لى ترانسفورماتسيا باعىتى بويىنشا ەلىمىزدە ىسكە اسىرىپ وتىرعان تۇڭعىش قاناتقاقتى جوباسى. «قازاقستان تەمىر جولى» ۇك» اق كورپوراتيۆتى دامۋ جانە HR جونىندەگى باسقارما توراعاسىنىڭ ورىنباسارى سەرىك ابدەنوۆ اقتوبەگە كەلگەن ساپارىندا پويىزدار قوزعالىسىن باسقارۋ ورتالىعىندا بولىپ، ورال، اتىراۋ، ماڭعىستاۋ جانە قىزىلوردا قالالارىنان وسى ورتالىققا اۋىسىپ كەلگەن قىزمەتكەرلەردىڭ جاعدايىمەن تانىستى.

«ەلباسى نۇرسۇلتان نازارباەۆتىڭ بيزنەستى ترانسفورماتسيالاۋ باستاماسىمەن قولعا الىنعان ەلىمىزدەگى ءىرى قانات­قاقتى جوبالاردىڭ ءبىرى – پويىزدار قوز­عالىسىن باسقارۋدى تسيفرلاندىرۋ مەن اۆتوماتتاندىرۋ الەمدەگى ەڭ وزىق 300 جوبانىڭ اراسىنان ىرىكتەلىپ الىندى. ماقسات – ماگيسترالدى جەلىلەردى زاماناۋي تالشىقتى-وپتيكالىق بايلانىس­پەن قامتىپ، قاشىقتىقتا ورنالاسقان تەمىر جول بەكەتتەرىن باسقارۋدىڭ بىرىڭ­عاي ديسپەتچەرلىك ورتالىعىن قۇرۋ. جو­با باتىس ايماعىنىڭ بەس بولىمشەسى – اقتوبە، اتىراۋ، ماڭعىستاۋ، ورال جانە قىزىلوردانىڭ ديسپەتچەرلىك ور­­تا­لىق­تارىن بىرىكتىرۋ ماقساتىندا وتكەن جىلدىڭ قىركۇيەگىنەن باستاپ قول­­عا الىندى. سول كەزدەن باستاپ ءتورت ءوڭىر­­دىڭ تاجىريبەلى 186 ديسپەتچەرى اق­توبەگە قونىس اۋداردى. پويىزدار قوز­عالىسىن تسيفرلاندىرۋ جوباسىنىڭ ىسكە قوسىلعانىنا ءۇش اي ۋاقىت وتكەنىنە قا­راماستان، بۇگىندە ءوز ناتيجەسىن بەرە باس­تادى»، دەيدى س.ابدەنوۆ.

وسىعان دەيىن «قازاقستان تەمىر جولى» ۇك» اق-قا قاراستى ءاربىر تەمىر ­جول بولىمشەسىنىڭ ديسپەتچەرلەرى پويىز­داردىڭ ءجۇرۋ قوزعالىستارىن تەلەفون­مەن باسقارىپ وتىراتىن. ماسەلەن، تە­مىر ­جول بولىمشەسىنىڭ ديسپەتچەرى بەكەت ديسپەت­چەرىنەن حابارلاما العاننان كەيىن عانا پويىزدىڭ قاي جولدان وتەتىنىن بەل­گىلەپ، باعدارشامداردى قوسۋعا شەشىم قا­بىل­دايتىن. ديسپەتچەرلىك ورتالىقتار بىرىك­تىرىلگەننەن پويىز قوزعالىسى مەن باعىتىن تەلەفونمەن حابارلاۋ جۇيەسى جويىلىپ، بەس وبلىس اۋماعىنان وتەتىن پويىزدار قوزعالىسى بىردەن اقتوبەدەگى ور­­تالىققا ءتۇسىپ، بەلگىلى ءبىر ۋچاسكەگە جا­ۋاپ­تى ديسپەتچەردىڭ باقىلاۋىندا بولادى.

پويىزدار قوزعالىسىن باسقارۋ ورتا­لىعىنا اتىراۋ، ماڭعىستاۋ، قىزىلوردا، باتىس قازاقستان وبلىستارىنان اۋىسىپ كەلگەن 186 ديسپەتچەردىڭ باسىم بولىگى – جاس وتباسىلار. كوشىپ كەلگەندەر الەۋ­مەتتىك پاكەتپەن قامتاماسىز ەتىلگەن. تارا­تىپ ايتقاندا، ولارعا وتكەن جىلدىڭ سوڭىندا 45 ايلىق ەسەپتىك كورسەتكىش مولشەرىندە ءبىر رەتتىك وتەماقى بەرىلدى، پاتەرلەرىنىڭ جالداۋ اقىسىن ەكى جىل بويى كومپانيا تولەيدى، وتباسى مۇشە­لەرىنىڭ جۇمىسقا، بالالارىنىڭ مەكتەپ پەن بالاباقشاعا ورنالاسۋىنا جار­دەمدەسكەن. ەندى اقتوبەگە قونىس اۋدار­عان قىزمەتكەرلەر كومپانيا باسشى­لى­عىنا پاتەردىڭ جالداۋ قۇنىنا بولىنە­تىن قاراجاتتى يپوتەكانىڭ باستاپقى پايىز­دىق جارناسى تۇرىندە اۋدارۋدى ۇسىنىس ەتىپ وتىر. ويتكەنى كوپتەگەن جاس مامان اقتوبەدەن باسپانا ساتىپ الىپ، تۇراقتاپ قالۋدى جوسپارلاعان.

س.ابدەنوۆ ديسپەتچەرلىك ورتالىق­تاردىڭ بىرىكتىرىلۋىنەن سوڭ وڭتايلاندىرۋ جۇمىستارى باستالىپ كەتكەنىن دە جاسىرمادى: «بۇرىن بەس وبلىستا پويىزدار قوزعالىسىن 300 ديسپەتچەر رەتتەپ وتىراتىن. قازىر 186 قىزمەتكەر اقتوبەگە قونىس اۋداردى، 19 ادام جاسىنا بايلانىستى زەينەتكەرلىككە شىقتى. بىرىكتىرىلگەن بەكەتتەردەگى 5 قىزمەتكەر تەمىر جولدىڭ باسقا بولىكتەرىنە جۇمىسقا اۋىستىرىلسا، كەيبىرەۋلەرى كاسىبي بىلىك­تىلىكتەرىن كوتەرۋ كۋرستارىنا وقۋعا جىبەرىلدى».

پويىزدار قوزعالىسىن باسقارۋ ورتا­لى­عىنىڭ ديسپەتچەرى ارايلىم مۇقى­شەۆا ورال قالاسىنداعى تەمىر جول بو­لىم­شەسىندە ديسپەتچەر بولىپ جۇمىس ىستەگەن. ول وتكەن جىلدىڭ سوڭىندا اق­­توبەگە قونىس اۋدارعان. 12 تەمىر جول بە­كەتى مەن 7 رازەزد بويىنداعى پويىز­دار قوزعالىسىنا جاۋاپتى مامان رەسەي فەدە­راتسياسى شەكاراسىنداعى «وزينكي-قازاق­ستان» بەكەتتەرى اراسىندا ءارلى-بەرلى وتەتىن جۇك پويىزدارىنىڭ قوزعالىسىن با­قىلايدى. ناقتىراق ايت­قاندا، يلەتسك تەمىر جول بەكەتىنەن جۇك پويىز­دارىن قابىلداپ الىپ، وزينكي بەكەتىندە تاپ­سىرادى. ونىڭ ار جاعىندا  – رەسەي فەدە­راتسياسىنىڭ ساراتوۆ قالاسى.

«تەمىرجولدىڭ باتىس قازاقستان وبلىسىنداعى بولىمشەسىنەن 13 ديسپەت­چەر اۋىسىپ كەلدىك. مەنىڭ وتباسىم دا وزىممەن بىرگە كەلدى. اقتوبەدە پا­تەر جالداپ تۇرامىز، بالالارىم مەك­تەپ پەن بالاباقشاعا ورنالاستى. پاتەر­اقىمىزدى كومپانيا تولەپ وتىر. بۇرىن دا ورالداعى تەمىر جول بولىمشەسىندە «وزينكي-قازاقستان» اۋماعىنداعى جۇك پويىزدارىنىڭ قوزعالىسىنا جاۋاپتى بولاتىنمىن. باقىلاۋىمداعى وسى تەمىر جول بولىگىنىڭ ۇزىندىعى 248 شا­قىرىمدى قۇرايدى»، دەدى ا.مۇقى­شە­ۆا. ول قىزمەتكەرلەردىڭ پاتەر جال­داۋ اقىسىنا بەرەتىن كومپانيا قارجى­سىنىڭ يپوتەكاعا باسپانا ساتىپ الۋ ءۇشىن بانك­تەرگە العاشقى كەپىلدىك جارنا تۇرىندە اۋدارىلۋىن ماقۇلدايدى. «مامانداردىڭ جۇمىس ورنىن اۋىس­تىرۋى، باسقا قالاعا قونىس اۋدارۋى، پاتەر الۋى وتە جاقسى مۇمكىندىك جانە ومىر­لىك تاجىريبە»،  دەيدى مامان.

قىزىلوردا قالاسىندا 10 جىل بويى پويىز ديسپەتچەرى بولىپ جۇمىس ىستە­گەن مۇحاممەد-حانافيا سياتوۆ قازىر «قازالى-سەكسەۋىل» جانە «سەك­سەۋىل-قوسكول» باعىتىنداعى پويىز­دار قوزعالىسىن باقىلايدى. وسى بىرىك­تىرىلگەن تەمىر جول بولىگىنىڭ جالپى ۇزىن­دىعى 456 شاقىرىمعا تەڭ. «قازالى-سەكسەۋىل» باعىتى – ەكى جو­­لاقتى، ۇزىندىعى 180 شاقىرىم، قوزعالىس اۆتوماتتاندىرىلعان جۇيەدە باسقارىلادى. ال «قوسكول-سەكسەۋىل» باعىتى ءبىر جولاقتى، وسى جول ۋچاسكەسىنىڭ ۇزىندىعى – 246 شاقىرىم. «ول جاقتان قاراعاندىعا قاراي پويىز تاپسىرامىز. قازىر كۇنىنە شالقار تەمىر جول بەكەتى باعىتىنا 15-17 پويىز وتكىزىپ، قاراعاندىدان 6-7 پويىز قابىلدايمىز. بۇل بۇرىن ەكى ۋچاسكە ەدى، قازىر ءبىر ۋچاس­كەگە بىرىكتىرىلدى. جولاۋشىلار جانە جۇك پويىزدارىنىڭ كىدىرىسسىز ءوتۋىن باقىلاپ، جولداردى اشىپ-جاۋىپ، باعدارشامداردى قوسىپ وتىرامىز. سونىمەن قاتار وسى ۋچاس­كەدەن وتەتىن جۇك جانە جولاۋشىلار پو­يىزدارىنان وزگە رەزەرۆتەگى تەپلوۆوزدار قوزعالىسىن دا باقىلايمىز. مۇنىمەن بىرگە ديسپەتچەرلەر رەلس بويىندا جۇ­مىس ىستەپ جاتقان تەمىرجولشىلاردىڭ قاۋىپسىزدىگىنە دە جاۋاپتى بولادى. اقتو­بەگە وتكەن جىلدىڭ سوڭىندا قىزىل­وردادان ايەلىم جانە ءۇش بالاممەن بىرگە كو­شىپ كەلدىم. بالالاردى بالاباقشاعا ور­نالاستىردىق. ەندى ءتورتىنشى ءسابيىمىزدى كۇتىپ وتىرمىز. بۇيىرسا ول اقتوبەلىك بولادى. «قتج» ۇك» اق باسشىلىعى پاتەراقىمىزدى تولەپ وتىر. كوشىپ كەلگەندە جۇك تاسىمالىنىڭ شىعىندارىن كوتەردى، 131مىڭ تەڭگە كولەمىندە ءبىر رەتتىك وتەماقى الدىق، دەيدى م.سياتوۆ.

«قتج جۇك تاسىمالى» جشس باس ديرەكتورىنىڭ ماركەتينگ جانە جوس­پارلاۋ جونىندەگى ورىنباسارى ۆلاديمير پەتروۆتىڭ ايتۋىنشا، پويىزدار قوزعا­لىسىن باسقارۋ ورتالىعى اشىلعالى كوم­پانيانىڭ باسى ارتىق شىعىندارى قىسقارىپ، 17 ملرد تەڭگە قارجى ۇنەم­دەلگەن. سونىڭ ىشىندە ديسپەتچەرلىك ورتا­لىقتاردى ۇستاپ تۇرۋ جانە لوكوموتيۆ پار­كىنىڭ شىعىندارى ازايعان.

پويىزدار قوزعالىسىن باسقارۋ ور­تالىعىنىڭ نەگىزگى بايلانىس كانالدارى مەن تسيفرلاندىرۋ جۇيەسىن «قتج» ۇك» اق ماماندارى جاساقتاعان. ەندى وسىنداي ورتالىقتى ەلىمىزدىڭ باس­قا وڭىرلەرىندە اشۋ جوسپاردا تۇر. وسى جىلدىڭ سوڭىنا دەيىن الماتى قالاسىندا وڭتۇستىك-شىعىس باعىت بويىنشا پويىزدار قوزعالىسىن باسقارۋ ورتالىعى اشىلادى دەپ كۇتىلۋدە. 2022 جىلى ورتالىق-سولتۇستىك باعىت بويىنشا باسقارۋ ورتالىعى نۇر-سۇلتان قالاسىندا، نە كوكشەتاۋ قالاسىندا اشىلادى دەپ جوسپارلانعان.

 

اقتوبە وبلىسى

 

سوڭعى جاڭالىقتار

كۇرەسكەر گەينە

ادەبيەت • كەشە

اجالدى جەڭگەن اسپان

ادەبيەت • كەشە

اعاش كوشەتى ەگىلدى

ايماقتار • كەشە

قاسقىر

ونەر • كەشە

ۇقساس جاڭالىقتار