جوبانىڭ ماقساتى – شىعارماشىل جاستاردىڭ نازارىن تابيعي مۇرانى ساقتاۋ جانە جاڭعىرتۋعا اۋدارۋ. سيۆەرس الماسىنىڭ تاريحى ەجەلگى داۋىردەن باستالادى. كورمەگە كۇردەلىلىگىمەن جانە كوركەمدىك تاسىلدەرىنىڭ الۋان تۇرلىلىگىمەن ەرەكشەلەنەتىن اكۆارەل تەحنيكاسىندا ورىندالعان قىرىقتان استام جۇمىس قويىلدى. قازاقستان ونەرىندەگى اكۆارەل داستۇرلەرىن ءا.قاستەەۆ, و.تاڭسىقباەۆ, ا.يسمايلوۆ, ۋ.اجيەۆ سياقتى كورنەكتى شەبەرلەر قالىپتاستىردى دەيتىن بولسا, بۇل كوركەم مۇرانى قازىرگى اۆتورلار دامىتىپ كەلەدى.
بيىلعى جىلى COVID-19 ۆيرۋسىنىڭ پاندەمياسى سۋرەتشىلەرگە دە, الەمدىك مادەنيەتكە دە كەرى اسەرىن تيگىزدى. «Cultural Dialogue» قق ديرەكتورى جاننا مامبەتوۆا اتاپ وتكەندەي, كورمەنىڭ ماقساتى جاس كاسىبي سۋرەتشىلەردى قولداۋ. وسى ورايدا ون سۋرەتشىنىڭ جۇمىسى قازاق جەمىس-كوكونىس شارۋاشىلىعى عزي عيماراتىندا تۇراقتى ەكسپوزيتسيا ءۇشىن تاڭداپ الىنعان ءارى قالاماقى تولەنگەن.
قازاق جەمىس-كوكونىس شارۋاشىلىعى عزي كەڭەسىنىڭ توراعاسى سەرىك سادىقوۆتىڭ ايتۋىنشا, قازاقستان الما مەن قىزعالداقتىڭ وتانى. شىعارماشىلىق كورمە الما داقىلدارىنىڭ گەندىك قورىن ساقتاۋ, جەرگىلىكتى الما اعاشىن قالىڭ بۇقارا اراسىندا جاڭعىرتۋدى دارىپتەۋگە نەگىزدەلەدى.
«المالى جۇماق» قق باسشىسى اجار دجاندوسوۆا «سيۆەرس الماسىن قازاقستاننىڭ تابيعي مۇراسى رەتىندە ساقتاۋ تاقىرىبىن ىلگەرىلەتۋگە جانە الماتىنى المانىڭ وتانى رەتىندە تانىمال ەتۋگە, اتاپ ايتقاندا, «الماتى + تى» سيمۆوليكالىق اتاۋىمەن شىعارماشىلىق جوبالار ارقىلى بارلىق مۇددەلى قاتىسۋشىلاردىڭ كۇش-جىگەرىن بىرىكتىرۋگە ۇمتىلامىز», دەپ اتاپ ءوتتى. كورمە كۋراتورى – ونەرتانۋشى ۆيولەتتا ۆولوگودسكايا «الماتى» قوناق ۇيىندە ورنالاسقان كورمە ناۋرىز ايىنىڭ سوڭىنا دەيىن جالعاساتىندىعىن ايتتى.
