8 ناۋرىز كۇنى 17 ساعات 30 مينۋتتا «سامارا-شىمكەنت» تاس جولىندا, باتىس قازاقستان وبلىسىنىڭ سىرىم اۋدانى اۋماعىندا اقتوبە وبلىسىنا قاراي كەتىپ بارا جاتقان جۇك كولىگى تۇرىپ قالعاندىعى جونىندە حابار العان №14 ءورت ءسوندىرۋ بەكەتى قىزمەتكەرلەرى كومەك كورسەتۋ جانە ەۆاكۋاتسيالاۋ ءۇشىن وقيعا ورنىنا جەدەل جەتكەن ەكەن.
قۇتقارۋشىلار بارعان كەزدە «سامارا-شىمكەنت» تاس جولىنىڭ 490 شاقىرىمىندا 3 فۋرا جول جيەگىنە ءتۇسىپ كەتكەن ەكەن. «كولىك جۇرگىزۋشىلەرى ەۆاكۋاتسيادان باس تارتتى. اۆتوكولىكتەردى جول جيەگىنەن شىعارۋ ءۇشىن كومەك كورسەتىلۋدە» دەپ حابارلادى وبلىستىق توتەنشە جاعدايلار دەپارتامەنتىنىڭ ءباسپاسوز حاتشىسى باكيزات ماعزەنوۆا.
ءدال وسى كۇنى 22 ساعاتتا اۋا رايىنىڭ قولايسىزدىعىنا بايلانىستى 100 كيلومەترلىك «ورال-تاسقالا-رف شەكاراسى» تاس جولى جابىلعان بولاتىن. وسى جولدىڭ بويىندا, بىرلىك كەنتى شاماسىنىڭ 80 شاقىرىمىندا 12 فۋرا مەن 3 جۇك كولىگى قۇتقارۋشىلاردىڭ باقىلاۋىندا بولىپ, كۇن رايى تۇزەلگەن سوڭ ودان ءارى جولعا شىعىپ كەتكەن.
مەرەكە كۇنى 23 ساعات 49 مينۋتتا ورال قالاسىنا قاراستى دەركول-بەلەس اۋىلدىق جولىندا كاردون كەنتىنىڭ شاماسىندا 3 جەڭىل كولىك قار قۇرساۋىندا قالعان ەكەن. بۇل كولىكتەردە 13 ادام, ونىڭ ىشىندە 3 بالا بولعان. باتىس قازاقستان وبلىستىق توتەنشە جاعدايلار دەپارتامەنترى قىزمەتكەرلەرىنىڭ كۇشىمەن كولىكتەر جولدىڭ تازارتىلعان بولىگىنە شىعارىلدى, ەشكىم زارداپ شەكپەگەن.
«2021 جىلعى 9 ناۋرىزداعى جاعداي بويىنشا 11 ساعات 15 مينۋتتا «سامارا-شىمكەنت» تاس جولىنىڭ 490-522 شاقىرىمىندا جول جيەگىنە ءتۇسىپ كەتكەن 5 فۋرا قالىپ وتىر, ونىڭ بىرەۋىنە تەحنيكالىق اقاۋلىعى جانە جول جيەگىنەن شىعارۋعا بايلانىستى كومەك كورسەتىلۋدە» دەپ حابارلايدى توتەنشە جاعدايلار دەپارتامەنتى.
