ۇكىمەت • 05 ناۋرىز، 2021

ۇكىمەتتە «Nur Otan» پارتياسىنىڭ سايلاۋالدى باعدارلاماسىن ىسكە اسىرۋ جونىندەگى شتابتىڭ وتىرىسى ءوتتى

11 رەت كورسەتىلدى

ۇكىمەتتە پرەمەر-ءمينيستردىڭ ءبىرىنشى ورىنباسارى ءاليحان سمايىلوۆتىڭ توراعالىعىمەن «Nur Otan» پارتياسىنىڭ «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسىن ىسكە اسىرۋ جونىندەگى شتابتىڭ كەزەكتى وتىرىسى ءوتتى.

وتىرىستىڭ كۇن تارتىبىندە جوو تۇلەكتەرىنىڭ جۇمىسقا ورنالاسۋى، جاڭا مەكتەپتەر سالۋ جانە بيزنەستى قولداۋ ماسەلەلەرى قارالدى. 2025 جىلعا قاراي ەلىمىزدە 800 جاڭا مەكتەپ سالىنادى، شاعىن قالالارداعى، وبلىس ورتالىقتارى مەن اۋىلدارداعى تاعى 5000 مەكتەپ جاڭارتىلادى.

بارلىق اۋىل مەكتەپتەرى جىلدامدىعى جوعارى ينتەرنەتپەن قامتاماسىز ەتىلەدى. پرەمەر-ءمينيستردىڭ ءبىرىنشى ورىنباسارى ءا. سمايىلوۆ اپاتتى جانە ءۇش اۋىسىمدى مەكتەپتەر پروبلەمالارىن جويۋ ءۇشىن بارلىق مەحانيزمدەردى قولدانۋ قاجەت ەكەندىگىنە نازار اۋداردى.

اتاپ ايتقاندا، ءمجا تەتىگى، جەكەمەنشىك مەكتەپتەر اشۋ، مەملەكەتتىك بيۋدجەت جانە جۇمىسپەن قامتۋدىڭ جول كارتاسى ەسەبىنەن نىسانالى قۇرىلىس سالۋ ۇسىنىلادى. وسى تارماقتار بويىنشا ءبىلىم جانە عىلىم مينيسترلىگىنە نۇسقاۋ بەرىلدى. جۇمىس تاجىريبەسى جوق ۋنيۆەرسيتەت تۇلەكتەرىن جۇمىسقا ورنالاستىرۋ ماسەلەلەرى دە شتابتىڭ باستى نازارىندا. ەڭبەك جانە حالىقتى الەۋمەتتىك قورعاۋ مينيسترلىگى «العاشقى جۇمىس ورنى» جوباسىن ىسكە قوسادى، جىلىنا ورتا ەسەپپەن 5000 ادام قامتىلماق.

ءا. سمايىلوۆ بۇل تارماقتاردىڭ ماڭىزدىلىعىن اتاپ ءوتىپ، قازىرگى كەزدە جاس مامانداردىڭ ۋنيۆەرسيتەتتى نەمەسە كوللەدجدى بىتىرگەننەن كەيىن بىردەن جۇمىس تابا المايتىنىن، جۇمىس بەرۋشىلەردىڭ جۇمىس تاجىريبەسى بار كادرلارعا باسىمدىق بەرەتىنىن باسا ايتتى. ەڭبەك جانە حالىقتى الەۋمەتتىك قورعاۋ مينيسترلىگى NEET ساناتىنداعى جاستار مەن جۇمىسسىز جاستاردىڭ ستاتيستيكاسىن ۇسىندى.

ۆيتسە-پرەمەر جەرگىلىكتى اتقارۋشى ورگاندارعا جۇمىسسىز جاستاردى جۇمىسپەن قامتۋ ماسەلەسىن ودان ءارى شەشۋ ءۇشىن ولاردىڭ سانىنا تالداۋ ۇسىنۋدى، سونداي-اق وسى تارماقتى ىسكە اسىرۋ ءۇشىن جەرگىلىكتى بيۋدجەتتەن قاراجات ءبولۋدى قامتاماسىز ەتۋدى تاپسىردى. سونداي-اق، شتابتا جاس كاسىپكەرلەر ءۇشىن جاڭا بيزنەس-يدەيالاردى ىنتالاندىرۋ ماسەلەسى قارالدى.

اتاپ ايتقاندا، شتاب بۇل بيزنەستى قولداۋدىڭ ءتيىمدى قۇرالدارىنىڭ ءبىرى ەكەنىنە سەنىمدى. تەك 2020 جىلدىڭ وزىندە 45 مىڭ گرانت ءبولىندى، ونىڭ ىشىندە 11 مىڭ گرانتتى جاس كاسىپكەرلەر الدى. 2025 جىلعا دەيىن جىل سايىن 10 مىڭ گرانت بولىنەدى دەپ شامالانۋدا. ءا. سمايىلوۆ ساپالى ءبىلىم بەرۋ ينفراقۇرىلىمىن دامىتۋ حالىقتى جۇمىسپەن قامتىلۋىن قولداۋ سياقتى ماڭىزدى ماسەلە ەكەنىن اتاپ ايتتى.

سونىمەن قاتار پرەمەر-ءمينيستردىڭ ءبىرىنشى ورىنباسارى پارتيانىڭ سايلاۋالدى باعدارلاماسىنىڭ ۋاقتىلى جانە ساپالى ورىندالۋىن قامتاماسىز ەتۋ ءۇشىن بارلىق دەڭگەيدەگى اتقارۋشى ورگانداردىڭ ۇيلەسىمدى ءوزارا ارەكەتتەستىگى قاجەت ەكەنىن اتاپ ءوتتى. وسىنداي ءوزارا ارەكەتتەستىكتى ۇيىمداستىرۋدىڭ ەڭ ءتيىمدى ءادىسى - جوبانى باسقارۋ. وسىعان بايلانىستى قر ۇكىمەتى ۇلتتىق جوبالاردىڭ ىسكە اسىرىلۋىنا مونيتورينگ جۇرگىزۋ ءۇشىن ارنايى كەڭسە قۇردى.



سوڭعى جاڭالىقتار

ءسوزدىڭ جەتى بوياۋى

تانىم • كەشە

ورازانىڭ ءار ءساتى ساۋاپ

رۋحانيات • كەشە

ۇقساس جاڭالىقتار