وزەكتى ماسەلەنى شەشۋ جولدارى بۇگىن شىمكەنت قالاسى اكىمىنىڭ ورىنباسارى ەرعالي بىلىسبەكوۆتىڭ توراعالىعىمەن وتكەن ءماجىلىس بارىسىندا قارالدى. توزىعى جەتكەن ۇيلەردىڭ ء18–ى ت.الىمقۇلوۆ كوشەسى بويىنداعى 2 قاباتتى ۇيلەر. ءماجىلىس بارىسىندا 50-60 جىلدارى سوعىلعان ۇيلەردى ءسۇرىپ, جاڭاسىن سوعۋ جايى قاراستىرىلدى.
-توزىعى جەتكەن ۇيلەردىڭ جىرتىعىن جاماپ, كۇردەلى جوندەۋ جۇمىستارىن جۇرگىزۋ ارقىلى ماسەلەنى تۇبەگەيلى شەشە المايمىز. دۇرىسى ولاردى ءسۇرىپ, ورنىنا جاڭا تۇرعىن ۇيلەردى سوعۋىمىز قاجەت. ناتيجەسىندە شاھاردىڭ ساۋلەتىنە دە ءسان كەلەدى. ىسكە كىرىسپەس بۇرىن ءار تۇرعىننىڭ پىكىرىن جەكە تىڭداپ, قالاۋىمەن ساناساتىن بولامىز. قۇرىلىس كەزىندە ۋاقىتشا باسپانامەن قامتاماسىز ەتىلەدى نەمەسە ورنىنا تەڭ پاتەر قاراستىرىلادى, -دەدى قالا اكىمىنىڭ ورىنباسارى ەرعالي داۋلەتبەك ۇلى.
جيىندا اتاپ كورسەتىلگەنىندەي, توزىعى جەتكەن ۇيلەردى رەنوۆاتسيالاۋ ماقساتىندا بەكىتىلگەن مەحانيزمدەر ارقىلى ءىس-شارالاردى جۇرگىزۋ ۇيىمداستىرىلاتىن بولادى. قازىرگى تاڭدا, «Shymkent» اكك» اق تاراپىنان بۇل ىسكە ينۆەستورلاردى تارتۋ جۇمىستارى جۇرگىزىلۋدە.
سونداي-اق, بيىل «نۇرلى جەر» مەملەكەتتىك باعدارلاماسى بويىنشا رەسپۋبليكالىق بيۋدجەت ەسەبىنەن قالادا 35 كوپپاتەرلى تۇرعىن ۇيگە كۇردەلى جوندەۋ جۇمىستارىن جۇرگىزۋ جوسپارلانعان. شىمكەنت قالالىق تۇرعىن ءۇي باسقارماسىنىڭ باسىم باعىتتارىنىڭ ءبىرى - تۇرعىن ءۇي قورىن جاڭعىرتۋ اياسىندا كوممۋنالدىق مەنشىكتەگى 29 كوپقاباتتى تۇرعىن ۇيگە دە اعىمداعى نەمەسە كۇردەلى جوندەۋ جۇمىستارىن جۇرگىزۋ كوزدەلىپ وتىر.
