ءوز ءىسىنىڭ كاسىپقويى تامارا مۇحتارحانقىزى Nur Otan پارتياسى جەتىسۋ اۋدانى بويىنشا باقىلاۋ كوميسسياسىنىڭ, اۋداندىق ارداگەرلەر كەڭەسىنىڭ ءتورايىمى جانە
اۋدان اكىمدىگى جانىنداعى كامەلەتكە تولماعانداردىڭ قۇقىقتارىن قورعاۋ جونىندەگى كوميسسيانىڭ مۇشەسى رەتىندە كوپتەگەن قوعامدىق جۇمىستىڭ بەل ورتاسىندا ءجۇر.
ەڭبەك جولىن وتكەن عاسىردىڭ 80-جىلدارىنىڭ باسىندا الماتى اۆتومەحانيكالىق كوللەدجىندە وندىرىستىك وقىتۋ شەبەرىنەن باستاعان جاس مامان تاباندى ەڭبەگىنىڭ ارقاسىندا ديرەكتورلىققا دەيىن كوتەرىلدى. وتىز جىلدان استام ۋاقىتتا تامارا مۇحتارحانقىزى كوللەدجدىڭ وقۋ-وندىرىستىك الەۋەتىن ساپالى دەڭگەيگە كوتەرۋمەن قاتار تۇلەكتەردى وتانسۇيگىشتىككە باۋلىدى. بۇگىندە كوللەدجدى تامامداعان كوپتەگەن تۇلەك ەلىمىزدىڭ دامۋىنا سۇبەلى ۇلەس قوسىپ, ەكونوميكامىزدىڭ سان-سالاسىندا تابىستى ەڭبەك ەتىپ كەلەدى.
بىلىكتى باسشىنىڭ تاعىلىمدى ىستەرى, تالاپشىلدىعىنىڭ ارقاسىندا كوللەدج ءۇش جىل قاتارىنان رەسپۋبليكادا تەحنيكالىق جانە كاسىپتىك ءبىلىم بەرەتىن ۇزدىك وقۋ ورنى اتانىپ, باس جۇلدەنى ەنشىلەدى. «ايەل باسقاراتىن ۇزدىك كاسىپورىن» رەتىندە رەسپۋبليكالىق بايقاۋدىڭ جەڭىمپازى بولدى. وسىنداي يگى ىستەردىڭ ارقاسىندا اتالعان وقۋ ورنى تاۋەلسىزدىكتىڭ 10 جىلدىعىنا وراي «التىن كىتاپقا», الماتى قالاسىنا ارنالعان مەرەيتويلىق باسىلىمدا ء«بىلىم كوشباسشىسى» رەسپۋبليكالىق جيناعىنا ەندى. تۇڭعىش پرەزيدەنت – ەلباسى ن.نازارباەۆتىڭ اتىنان ون شاقتى رەت العىس الىپ, پرەزيدەنت ق.توقاەۆتىڭ ەكى رەت العىس حاتىنا يە بولعان تامارا مۇحتارحانقىزى شاكىرت تاربيەلەۋ ىسىندەگى ەرەن ەڭبەگى ءۇشىن «ى.التىنسارين» بەلگىسىنىڭ, ء«بىلىم بەرۋ ءىسىنىڭ قۇرمەتتى قىزمەتكەرى» جانە ء«بىلىم بەرۋ ءىسىنىڭ ۇزدىگى» بەلگىسىنىڭ يەگەرى اتاندى.
وسى جىلداردا العان ءبىلىمى مەن تاجىريبەسىن ءوندىرىس سالاسىنا كاسىبي مامانداردى دايارلاۋ ىسىنە ارناعان بىلىكتى باسشى ءالى كۇنگە جاستار مەن جاسوسپىرىمدەر ءىسىن ىلگەرى جىلجىتۋ باعىتىنداعى قوعامدىق جۇمىستاردا بەلسەندىلىك تانىتىپ كەلەدى.
تامارا مۇحتارحانقىزى ساپالى ءبىلىم ىزدەپ شەتەلدەرگە كەتكەن جاستارىمىزدى ەلگە قايتارۋ ءۇشىن قولايلى جاعداي جاساۋ, مەكتەپتەر مەن كاسىپتىك-تەحنيكالىق ءبىلىم بەرۋ كوللەدجدەرىنىڭ ماتەريالدىق-تەحنيكالىق بازاسىن زامان تالابىنا ساي جاراقتاندىرۋ ماسەلەسىنىڭ كەزەك كۇتتىرمەيتىنىنە الاڭداۋشىلىق ءبىلدىردى. ونىڭ ايتۋىنشا, بىلىكتى مامان, ونەگەلى ۇرپاق تاربيەلەۋدە ءبىلىم وشاقتارىنىڭ عانا ەمەس, اتا-انالاردىڭ جاۋاپكەرشىلىگىنە كوڭىل ءبولۋدى ماقسات ەتە وتىرىپ, ونىڭ زاڭنامالىق تۇرعىدا كۇشەيتىلۋىنە باستى نازار اۋدارۋ قاجەتىن اتاپ ءوتتى. جاھاندانۋ كەزىندە بالا تاربيەسىنە بارىنشا كوڭىل ءبولۋ ءبىلىم وشاقتارىنىڭ عانا ەمەس, وتباسى مۇشەلەرى ءرولىنىڭ ارتۋىمەن تىعىز بايلانىستى. وسى ورايدا تاجىريبەلى ۇستاز اكە مەن انانىڭ بالا تاربيەسىنە, ساپالى ءبىلىم الۋىنداعى ءرولىنىڭ جوعارى ەكەندىگىن نەگىزگە الا وتىرىپ, «اكە كورگەن – وق جونار, شەشە كورگەن – تون پىشەر» دەگەن حالىق دانالىعىنىڭ ومىرشەڭدىگىن ەسكە سالدى. اڭگىمەسىن «ۇيادا نە كورسەڭ, ۇشقاندا سونى ىلەسىڭ» دەگەن دە تاعىلىمدى تىركەسپەن جالعاعان تامارا مۇحتارحانقىزى «اتا-بابالارىمىز ەرتە عاسىرلاردان-اق ۇل مەن قىز تاربيەسىنە ەرەكشە نازار اۋدارعان, ال جاھاندانۋدىڭ جات كورىنىستەرىنە قارسى تۇرا الاتىن ۇلتىمىزدىڭ ونەگەسى تاعىلىمدى تاريحى مەن مادەنيەتىمەن بايلانىستى», دەپ اتاپ ءوتتى. ۇرپاق تاربيەسىنە بەيجاي قارامايتىن ءوز ءىسىنىڭ كاسىپقويى زەينەت جاسىنا قاراماستان, قوعامدىق جۇمىستاردىڭ بەل ورتاسىندا ءجۇرىپ, وزەكتى ماسەلەلەرگە وراي ورىندى ۇسىنىستارىن بىلدىرۋمەن قاتار ونىڭ جۇزەگە اسۋىنا بارىنشا اتسالىسىپ كەلەدى.
الماتى
