«ەكىباستۇز» فك باس باپكەرى عالىم بايكەن سەرىك ابدۋاليەۆكە سىڭىرگەن زور ەڭبەگىن ەرەكشە اتاپ, جۇمىسىنا العىس ءبىلدىردى.
– كلۋب باسشىلىعى مەن ۇجىمى كوماندامىزدا اتقارعان ەڭبەگى ءۇشىن اسا بىلىكتى مامانعا العىس ايتادى, – دەيدى عالىم بايكەن. – كلۋب ءۇشىن كوپ تەر توكتى. كوماندامىزدىڭ دامۋىنا قوسقان ۇلەسى ءۇشىن سەرىك قايىركەن ۇلىنا راحمەت ايتامىز.
ايتا كەتەيىك, بەلگىلى قازاقستاندىق مامان 2020 جىلدىڭ قاڭتارىندا «ەكىباستۇزدىڭ» باس باپكەرى بولىپ تاعايىندالعان بولاتىن. سەرىك ابدۋاليەۆ باسشىلىعىنداعى كوماندا قۇرامى جاساردى. كومانداعا پاۆلودار وبلىسى فۋتبول مەكتەپتەرىنىڭ تۇلەكتەرى كەلىپ قوسىلدى.
بىلتىرعى ءبىرىنشى ليگاداعى چەمپيونات ناتيجەسىندە «ەكىباستۇز» ءبىرىنشى كونفەرەنتسيادا بەسىنشى ورىن الىپ, الدىنداعى ناتيجەسىن جاقسارتتى. كوماندا ايقىن تاكتيكالىق سىزبانۇسقا بويىنشا ويناپ, جۇرتشىلىق نازارىنا ىلىكتى. كوماندا ويىنشىلارى دامير مارات, ناۋرىزبەك جاگوروۆ, الەكسەي̆ سكۆورتسوۆ جانە اناتولي̆ كراسوتين قازاقستاننىڭ جاستار قۇراماسىنا شاقىرتۋ الدى.
