پرەزيدەنت • 03 ناۋرىز، 2021

باۋىرلاستىق بايلانىستار بەكي بەرەدى

54 رەت كورسەتىلدى

مەملەكەت باسشىسى قاسىم-جومارت توقاەۆ ەلىمىزگە مەملەكەتتىك ساپارمەن كەلگەن قىرعىز رەسپۋبليكاسىنىڭ پرەزيدەنتى سادىر جاپاروۆپەن كەزدەسىپ، كەلىسسوزدەر جۇرگىزدى. دوستىق، ءوزارا سەنىم سيپاتىندا وتكەن كەلىسسوزدەر بارىسىندا مەملەكەتتەر باسشىلارى ستراتەگيالىق ارىپتەستىك پەن وداقتاستىقتى ودان ءارى نىعايتۋ كەلەشەگىن تالقىلاپ، وڭىرلىك جانە حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى، سونداي-اق بىرقاتار ماڭىزدى قۇجاتقا قول قويىلدى.

ءداستۇرلى دوستىق سالتانات قۇرا بەرەدى

اقوردا رەزيدەنتسياسىندا قىرعىز پرەزيدەنتى سادىر جاپاروۆتى سالتاناتتى قارسى الۋ ءراسىمى ءوتتى. ەكى ەلدىڭ مەملەكەتتىك ءانۇراندارى ورىندالعاننان كەيىن قۇرمەت قاراۋىلى روتاسىنىڭ باستىعى قازاقستان مەن قىرعىزستان پرەزيدەنتتەرىنە راپورت بەردى. مەملەكەتتەر باسشىلارى قۇرمەت قاراۋىلىنىڭ الدىنان ءوتىپ، شاعىن قۇرامدا كەلىسسوزدەر جۇرگىزۋ ءۇشىن رەزيدەنتسيانىڭ «شىعىس زالىنا» باردى.

شاعىن قۇرامدا وتكەن كەلىسسوزدەر بارىسىندا قاسىم-جومارت توقاەۆ سادىر جاپاروۆتىڭ پرەزيدەنت رەتىندە العاشقى مەملەكەتتىك ساپارىن قازاقستاننان باس­تاعانىنىڭ ماڭىزى زور ەكەنىن اتاپ ءوتتى.

– بۇل قازاقستانعا دەگەن ۇلكەن قۇرمەت. ساپارىڭىزدىڭ ءرولى، ماعىناسى ايرىقشا دەپ ايتۋعا بولادى. سەبەبى بۇل ساپار ەكى ەل اراسىنداعى قارىم-قاتىناستارعا ۇلكەن سەرپىن بەرەدى. شىن مانىندە ساپارىڭىزدىڭ باعدارلاماسى اۋقىمدى. سوندىقتان ءبىز بۇگىن ەڭ وزەكتى ماسەلەلەر بويىنشا پىكىر الماسامىز. قۇداي قالاسا، ەكى حالىقتىڭ مۇددەسىنە ساي ءتيىستى كەلىسىمدەرگە قول جەتكىزەمىز دەپ ويلايمىن، – دەدى مەملەكەت باسشىسى.

قاسىم-جومارت توقاەۆ قازاق-قىرعىز بايلانىستارى اراسىندا ءداستۇرلى دوس­تىق­تىڭ بار ەكەنىنە، سونداي-اق قىرعىزستان – ەلىمىز ءۇشىن تەك وداقتاس مەملەكەت قانا ەمەس، باۋىرلاس مەملەكەت ەكەنىن جەتكىزدى.

– بۇل ءداستۇردى جوعارى باعالايمىز. الدىمىزدا تۇرعان مىندەتىمىز – وسى ءداستۇردى جالعاستىرۋ، نىعايتۋ. سوندىقتان بۇگىنگى كەلىسسوزدەردىڭ ماڭىزى زور، – دەدى مەملەكەت باسشىسى.

قىرعىزستان پرەزيدەنتى ءوز كەزەگىندە قاسىم-جومارت توقاەۆقا قازاقستانعا مەملەكەتتىك ساپارمەن شاقىرعانىنا ريزاشىلىعىن ءبىلدىردى. سادىر جاپاروۆ ەكى ەل اراسىنداعى قارىم-قاتىناستاردىڭ تەرەڭ ەكەنىن سيپاتتاي وتىرىپ، قازاقتىڭ بەلگىلى اقىنى جۇبان مولداعاليەۆتىڭ سوزدەرىن ەسكە الدى.

– مەن – قازاقپىن، قىرعىز ول – تۋىس­قانىم، بىرگە تارتقان تارلاننىڭ قۇيىس­قانىن. انامىز دا قارا كوز ءبىر قىز، بالكي، ءبولىپ بەرگەن ەگىزگە ۋىس نانىن، – دەپ قازاق اقىنىنىڭ پوەماسىنان ءۇزىندى كەلتىردى قىرعىز پرەزيدەنتى.

سادىر جاپاروۆ قازاقستان مەن قىر­عىزستان اراسىندا ىنتىماق پەن باۋىر­لاستىق ورناپ، ەشقاشان شەشىلمەيتىن ماسەلەلەر بولماۋى كەرەك ەكەنىن ايتتى.

سادىر جاپاروۆ قاسىم-جومارت توقاەۆتى وزىنە ىڭعايلى ۋاقىتتا قىر­عىزستانعا ساپارمەن كەلۋگە شاقىردى.

كەزدەسۋ بارىسىندا قازاقستان مەن قىرعىزستان پرەزيدەنتتەرى ەكىجاقتى ستراتەگيالىق سەرىكتەستىكتىڭ اۋقىمدى ماسەلەلەرى، اتاپ ايتقاندا، ساياسي، ساۋدا-ەكونوميكالىق، ينۆەستيتسيالىق، كولىك-لوگيستيكالىق، سۋ-ەنەرگەتيكالىق، كوروناۆيرۋس ىندەتىنە قارسى بىرلەسكەن شارالار، مادەني-گۋمانيتارلىق باعىتتار، سونداي-اق، ەۋرازيالىق ينتەگراتسيا جانە كوپ جاقتى قۇرىلىمدار اياسىنداعى بايلانىستاردى تالقىلادى.

بۇدان كەيىن قاسىم-جومارت توقاەۆ پەن سادىر جاپاروۆ كەڭەيتىلگەن قۇرامدا كەلىسسوزدەر جۇرگىزدى.

 

ءوزارا ىقپالداستىقتى ارتتىرۋ – ورتاق مۇددە

مەملەكەتتەر باسشىلارى سترا­تەگيالىق سەرىكتەستىك پەن وداقتاستىقتى ودان ءارى نىعايتۋدىڭ پەرسپەكتيۆالارىن تالقىلادى. سونداي-اق وڭىرلىك جانە حالىقارالىق وزەكتى ماسەلەلەر بويىنشا پىكىر الماستى. كەڭەيتىلگەن قۇرامداعى كەلىسسوزدەردە ساۋدا-ەكونوميكالىق بايلانىستاردى ارتتىرۋعا جانە ساياسي، ەنەرگەتيكالىق، مادەني-گۋمانيتارلىق سالالاردا تىعىز ىقپالداستىق ورناتۋعا باسىمدىق بەرىلدى.

قىرعىز دەلەگاتسياسىنا ءىلتيپات بىل­دىر­گەن قاسىم-جومارت توقاەۆ ەكى ەلدى باۋىر­لاستىق، دوستىق جانە سەرىكتەستىكتىڭ ءداس­تۇرلى جولى بايلانىستىراتىنىن اتاپ ءوتتى. مەملەكەت باسشىسى قىرعىزستان پرە­­زي­دەنتىنىڭ بۇل ساپارىنىڭ ماڭىزى زور ەكەنىن جانە ەكى ەل اراسىنداعى ءوزارا ىن­تى­ماقتاستىققا تىڭ سەرپىن بەرەتىنىن ايتتى.

– ءبىز قىرعىز اعايىندارىمىزدى قول­داۋعا جانە جان-جاقتى كومەك كورسەتۋگە ءاردايىم دايىن ەكەنىمىزدى اتاپ وتكىم كەلەدى. ءبىز باعزى زاماننان تاتۋ كورشىمىز، دوستىعىمىز بەن ىنتىماعىمىز جاراسقان باۋىرلاس ەلدەرمىز. «قازاق-قىرعىز ءبىر تۋعان» دەگەن ناقىل ءسوز ارامىزداعى زور سەنىم مەن كەڭ پەيىلدى ايقىن كورسەتەدى، – دەدى قازاقستان پرەزيدەنتى.

مەملەكەت باسشىسى شاعىن فورماتتا وتكەن كەلىسسوزدەر بارىسىندا ەكى ەل اراسىنداعى ىقپالداستىقتىڭ نەگىزگى باعىتتارى انىقتالعانىن جەتكىزدى.

– ەلدەرىمىز اراسىندا شەشىلمەيتىن قانداي دا ءبىر ماسەلەنىڭ جوق ەكەنى كوڭىل قۋانتادى. كەرىسىنشە، ءبىز ءوزارا ىقپالداستىقتىڭ كەز كەلگەن باعىتىن جەدەل ءارى بايىپپەن قاراستىرۋعا دايىن ەكەنىمىزدى بىلدىردىك. قىرعىزستان ءسىزدىڭ باسشىلىعىڭىزبەن بارلىق ماسەلەنى ءتيىمدى شەشۋگە جانە بۇعان دەيىن قول جەتكىزىلگەن ۋاعدالاستىقتاردى جۇزەگە اسىرۋعا ءازىر ەكەنىن ناقتىلاعانىن دۇرىس قابىلدادىق. ءوز تاراپىمنان قازاق­ستاننىڭ ەكى ەل اراسىنداعى ستراتەگيالىق سەرىكتەستىك پەن وداقتاستىق قارىم-قاتىناستاردى كەشەندى تۇردە تەرەڭدەتۋگە بەيىل بولىپ قالا بەرەتىنىن ايتقىم كەلەدى، – دەدى قاسىم-جومارت توقاەۆ.

كەزدەسۋدە قازاقستان پرەزيدەنتى قازاق پەن قىرعىز بايلانىسىنىڭ تامىرى تەرەڭدە ەكەنىن ايتا كەلىپ، ۇلى اباي مەن ماعجان جۇماباەۆتىڭ سوزدەرىن تىلگە تيەك ەتتى.

– ۇلى اباي ايتقانداي، «ەش قازاق قىر­عىز بەن قازاقتىڭ ءبىر تۇقىمداس ەكەنىنە تالاسپايدى». قوس حالىقتىڭ رۋحا­ني تۋىستىعىن دالەلدەيتىن مىسالدار جەت­كىلىكتى. بۇل بايلانىستار اۋەزوۆ پەن ايتماتوۆ، جامبىل مەن توقتاعۇل، كەنەن مەن وسپانقۇل سياقتى الىپ تۇلعالارىمىزدىڭ تۇسىندا نىعايا ءتۇستى. قازاقتىڭ ايگىلى اقىنى ماعجان جۇماباەۆ «قىرعىز – تاۋدىڭ تارپاڭى، قازاق – قىر­دىڭ قۇلانى» دەپ جىرلاعان. مۇنىڭ ءبارى ءبىزدىڭ ارعى تەگىمىزدىڭ ءبىر ەكەنىن اڭعارتادى، – دەدى قازاقستان پرەزيدەنتى.

ءوز كەزەگىندە قىرعىز رەسپۋبليكاسىنىڭ پرەزيدەنتى قازاقستان باسشىلىعى مەن حالقىنا كوروناۆيرۋسقا قارسى كۇرەستە قولداعانى ءۇشىن جانە الداعى ۋاقىتتا دا اۋقىمدى كومەك كورسەتە بەرەتىنىنە العىس ايتتى.

– بۇگىنگى كەلىسسوزدەر ءداستۇر بويىنشا مەملەكەتتەرىمىز اراسىنداعى ءوزارا قارىم-قاتىناستاردى سيپاتتايتىن وداق­تاستىق بايلانىستار مەن ستراتەگيالىق سەرىكتەستىك رۋحىندا وتۋدە. شاعىن فورماتتا وتكەن كەزدەسۋدە ءبىز قاسىم-جومارت كەمەل ۇلىمەن ەكىجاقتى ىنتىماقتاستىق پەن وڭىرلىك جانە حالىقارالىق ۇيىمدار اياسىنداعى ەلدەرىمىزدىڭ ءوزارا ءىس-قيمىلىنىڭ بىرقاتار ماڭىزدى ماسەلەلەرىن قوزعادىق. ەكى ەل اراسىندا ەشقانداي ساياسي قايشىلىق جوق ەكەنىن مالىمدەيمىن، – دەدى سادىر جاپاروۆ.

كەلىسسوزدەر بارىسىندا تاراپتار ىسكەرلىك بايلانىستاردى جان-جاقتى كەڭەيتۋگە، ينۆەستيتسيالىق ىقپالداس­تىق­تى دامىتۋعا، ەكى ەلدىڭ كولىك-ترانزيتتىك الەۋەتىن بىرلەسىپ پايدالانۋعا، سونداي-اق، تسيفرلاندىرۋ سالاسىنداعى بىرلەسكەن جوبالاردى جۇزەگە اسىرۋعا ۋاعدالاستى. 

پرەزيدەنتتەر قوس حالىقتىڭ مادەنيەتى مەن تاريحىنىڭ جانە ءتىلىنىڭ ۇقساستىعىن ەسكەرە وتىرىپ، عىلىم، ءبىلىم، دەنساۋلىق ساقتاۋ، مادەنيەت، تۋريزم جانە سپورت سالالارىنداعى ىنتىماقتاستىقتى ودان ءارى دامىتۋعا بەيىلدى ەكەنىن ناقتىلادى.

كەلىسسوزدەر قورىتىندىسى بويىنشا تومەندەگى قۇجاتتارعا قول قويىلدى:

قازاقستان رەسپۋبليكاسىنىڭ پرە­زيدەنتى مەن قىرعىز رەسپۋبليكاسى پرە­زيدەنتىنىڭ بىرلەسكەن مالىمدەمەسى;

قازاقستان رەسپۋبليكاسىنىڭ ۇكى­مەتى مەن قىرعىز رەسپۋبليكاسى ۇكىمە­تىنىڭ ارا­سىنداعى قايتارىمسىز اسكەري-تەح­نيكالىق كومەك كورسەتۋ تۋرالى كەلىسىم;

قازاقستان رەسپۋبليكاسى مادەنيەت جانە سپورت مينيسترلىگى مەن قىرعىز رەس­پۋبليكاسى ۇكىمەتىنىڭ جانىنداعى جاستار ءىسى، دەنە شىنىقتىرۋ جانە سپورت جونىندەگى مەملەكەتتىك اگەنتتىك اراسىنداعى ۇلتتىق سپورت تۇرلەرى مەن حالىق ويىندارىن دامىتۋ تۋرالى ۆەدومستۆوارالىق كەلىسىم;

قازاقستان رەسپۋبليكاسى مەن قىرعىز رەسپۋبليكاسىنىڭ سىرتقى ىستەر مي­نيس­تر­لىكتەرى اراسىنداعى 2021-2022 جىلدارعا ارنالعان ىنتىماقتاستىق باع­دارلاماسى;

قازاقستان رەسپۋبليكاسىنىڭ تسيفر­لىق دامۋ، يننوۆاتسيالار جانە اەروعارىش ونەركاسىبى مينيسترلىگى مەن قىرعىز رەس­پۋب­­ليكاسى ۇكىمەتىنىڭ جانىنداعى تسيفر­لىق دامۋ مەملەكەتتىك قىزمەتى اراسىنداعى ءوزارا تۇسىنىستىك تۋرالى مەموراندۋم;

قازاقستان رەسپۋبليكاسى ساۋدا جانە ينتەگراتسيا مينيسترلىگى مەن قىرعىز رەس­پۋبليكاسى ۇكىمەتىنىڭ جانىنداعى ەكو­لوگيالىق جانە تەحنيكالىق قاۋىپسىزدىك جونىندەگى مەملەكەتتىك ينسپەكتسيانىڭ 2021-2022 جىلدارعا ارنالعان بىرلەسكەن ءىس-شارالار جوسپارى;

قازاقستان رەسپۋبليكاسى ەنەرگەتيكا ءمينيسترىنىڭ، ەكولوگيا، گەولوگيا جانە تابيعي رەسۋرستار ءمينيسترىنىڭ جانە قىر­عىز رەسپۋبليكاسى ەنەرگەتيكا جانە ونەر­كاسىپ ءمينيسترىنىڭ اراسىنداعى ەلەكتر­ەنەرگياسىمەن تاۋار الماسۋ تۋرالى حاتتاما;

قازاقستان رەسپۋبليكاسىنىڭ قورعا­نىس مينيسترلىگى مەن قىرعىز رەسپۋب­ليكاسىنىڭ قورعانىس مينيسترلىگىنىڭ اراسىنداعى 2021 جىلعا ارنالعان ىنتىماقتاستىق باعدار­لاماسى.

كەلىسسوزدەردەن كەيىن شاعىن جانە كەڭەي­تىلگەن قۇرامداعى ەكىجاقتى كەلىس­سوز­­دەردىڭ قورىتىندىسى بويىنشا قاسىم-جومارت توقاەۆ پەن سادىر جاپا­روۆ بۇ­قارالىق اقپارات قۇرالدارى ءۇشىن بىرلەس­كەن ءباسپاسوز ءماسليحاتىن وتكىزدى.

 

بىرلەسكەن ءىس-قيمىل – سەنىمدى سەرىكتەستىك

قاسىم-جومارت توقاەۆ سادىر جاپا­روۆتىڭ قىرعىزستان پرەزيدەنتى رەتىندە قازاقستانعا جاساعان العاشقى مەملەكەتتىك ساپارىن قازاق ەلىنە كورسەتىلگەن ايرىقشا قۇرمەتى دەپ باعالايتىنىن ايتتى.

– قىرعىزستان – ءبىز ءۇشىن وداقتاس مەملەكەت، سونداي-اق تاتۋ كورشى، باۋىرلاس ەل ءارى سەنىمدى سەرىكتەس، – دەدى قازاقستان پرە­­زي­دەنتى.

قاسىم-جومارت توقاەۆ ەكى اعايىن ەلدىڭ قارىم-قاتىناسىن دامىتۋعا ولشەۋسىز ۇلەس قوسقان قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ تاريحي ءرولىن ەرەكشە اتاپ ءوتتى.

مەملەكەت باسشىسى قىرعىزستان پرە­زي­دەنتىنىڭ بۇل ساپارى قوس مەملە­كەتتىڭ تاۋەلسىزدىك العانىنا 30 جىل تولعان مە­رەيلى كەزەڭىمەن تۇسپا-تۇس كەلۋىنىڭ سيم­ۆولدىق ءمانى بار ەكەنىن ايتىپ، بۇگىنگى كەلىسسوزدەر قورىتىندىسى قازاق-قىرعىز ستراتەگيالىق سەرىكتەستىگىن دامىتۋعا تىڭ سەرپىن بەرەتىنىنە سەنىم ءبىلدىردى.

– ساياسي، ەكونوميكالىق، گۋمانيتارلىق جانە اسكەري-تەحنيكالىق سالالارداعى مۇددەمىز ۇقساس. وسى ۋاقىتقا دەيىن ەكى ەل اراسىندا 180-گە جۋىق قۇجاتقا قول قويىلعان. ءبىز بۇگىن دە بىرلەسكەن مالىمدەمە قابىلداپ، بىرقاتار ماڭىزدى كەلىسىم-شارتقا قول قويدىق. قازاقستان مەن قىرعىزستان ەۋرازيا ەكونوميكالىق وداعى اياسىندا بەلسەندى ارەكەت ەتۋدە. ورتالىق ازياداعى تۇراقتىلىق پەن قاۋىپسىزدىكتى ساقتاۋ ءۇشىن اۋقىمدى جۇمىستاردى بىرگە اتقارىپ كەلەمىز، – دەدى قاسىم-جومارت توقاەۆ.

كەلىسسوزدەر بارىسىندا كوروناۆيرۋسقا قارسى بىرلەسكەن جۇمىستار تالقىلاندى. قازاقستان قىرعىز حالقىنا كەزەكتى گۋما­نيتارلىق كومەك رەتىندە مەديتسينالىق قۇرالدار مەن ءدارى-دارمەكتەر جولداۋعا دايىن ەكەنىن راستادى. سونىمەن قاتار مەملەكەت باسشىسى قىرعىزستاننىڭ قارۋلى كۇشتەرىنە اسكەري-تەحنيكالىق كومەك كورسەتىلەتىنىن مالىمدەدى.

قاسىم-جومارت توقاەۆ قازاقستان قىر­­عىزستاننىڭ ەڭ ءىرى ساۋدا سەرىكتەس­تەرىنىڭ ءبىرى جانە كوش باستاۋشى ينۆەس­تور­لارىنىڭ قاتارىنا كىرەتىنىن جەتكىزدى.

– ءبىز سوڭعى 15 جىلدا بۇل ەلگە 1 ملرد دوللاردان استام قارجى قۇيدىق. قازاق ينۆەستورلارى قىرعىز ەكونوميكاسىنىڭ ماڭىزدى سالالارىن وركەندەتۋگە، الەۋ­مەتتىك احۋالىن جاقسارتۋعا قوماقتى ۇلەس قوسىپ كەلەدى. اتاپ ايتقاندا، جاڭا جۇمىس ورىندارىن اشىپ، ءوندىرىس سەكتورى مەن قارجى نارىعىن دامىتۋعا ەرەكشە كوڭىل بولۋدە. وسى ورايدا ءبىز ءوزارا ينۆەستيتسيا­لاردى قولداۋعا جانە قورعاۋعا كەلىستىك، – دەدى قازاقستان پرەزيدەنتى.

مەملەكەت باسشىسى ساۋدا كەدەرگىلەرىن ازايتۋ، ەكى ەلدىڭ كەدەن جانە سالىق ورگاندارى اراسىنداعى ءوزارا ءىس-قيمىلدى نىعايتۋ، ولاردىڭ جۇمىسىنا تسيفر­لى تەحنولوگيا ەنگىزۋ جونىندە كەلىسىم جاسالعانىن جەتكىزدى.

قاسىم-جومارت توقاەۆ ەكى ەلدىڭ ەكس­پورتتىق الەۋەتىن نىعايتىپ، شاعىن جانە ورتا بيزنەس اراسىنداعى بايلانىستاردى كەڭەيتۋ ءۇشىن جاقىن ارادا قازاقستان دەلەگاتسياسى قىرعىزستانعا ارنايى ساپارمەن باراتىنىن اتاپ ءوتتى.

ەكىجاقتى بايلانىستاردىڭ كۇن تارتى­بىندەگى ماڭىزدى مىندەتتىڭ ءبىرى – ازامات­تاردىڭ بارىس-كەلىسى مەن الىس-بەرىسىن جاقسارتۋ.

– وسى رەتتە شەكارا بەكەتتەرىنىڭ وتكى­زۋ مۇمكىندىگىن ارتتىرۋ ءۇشىن شارالار قابىلدانۋدا. مىسالى، ەڭ ءىرى «قورداي» (اقجول) بەكەتىن جاڭعىرتۋ جۇمىستارى – سو­نىڭ ايقىن دالەلى. ەندى جۇرتتىڭ شەكارادان قينالماي وتۋىنە جاعداي جاسالماق. بەكەتتىڭ جابدىقتارى جاڭارتىلدى. 8 جولاقتى اۆتوجول سالدىق. بۇل جۇمىس ءوز جالعاسىن تابادى. پاسپورتتىق-باقىلاۋ رەجى­مىن جەتىلدىردىك. مۇنىڭ بارلىعى ەكى ەل اراسىنداعى جولاۋشىلار مەن كولىك­تەر­دىڭ سانىن ەداۋىر ارتتىرۋعا مۇمكىندىك بەرەدى. قازاقستان بۇل نىساندى جاقىن ارا­دا اشۋعا دايىن. كەلىسىم بويىنشا، قىر­عىز تاراپى دا ءتيىستى جۇمىستى تەز ارادا اياقتايتىن بولدى، – دەدى مەملەكەت باس­شىسى.

قازاقستان پرەزيدەنتى ءوزارا بايلانىس­تى نىعايتۋ ءۇشىن ىرگەلەس جاتقان ايماق­­تاردىڭ ىنتىماقتاستىق اياسىن كەڭەي­تۋ جونىندە كەلىسىم جاسالعانىنا توقتالدى. ونىڭ ايتۋىنشا، وڭىرارالىق ىنتى­ماقتاستىقتىڭ ءبىرىنشى فورۋمىن جۋىق ارادا وتكىزۋ قاجەت، سونداي-اق شەكارا ماڭىندا تاۋاردى رەسىمدەپ، وڭ­دەيتىن ساۋدا-لوگيستيكالىق ورتالىق قۇرۋ كەرەك.

كەلىسسوزدەردەگى تاعى ءبىر وزەكتى ماسەلە – سۋ-ەنەرگەتيكا سالاسىنداعى ىقپال­داستىق.

– اتاپ وتەتىن جايت، بۇگىندە شۋ جانە تالاس وزەندەرىنىڭ اڭعارى بويىنشا ىق­­پالداستىعىمىز كوپتەگەن ەلگە ۇلگى بولىپ وتىر. مەملەكەتارالىق سۋ شارۋا­شىلىعى نىساندارىن پايدالانۋ جو­نىندەگى بىرلەسكەن كوميسسيامىز بار. قازاقستان بۇل نىسانداردى جوندەۋ جانە پايدالانۋ جۇمىستارىنا جىل سايىن قارجىلاي كومەك كورسەتىپ وتىر. سوڭعى ون جىلدا وسى ماقساتقا 1 ملرد تەڭگەدەن استام قاراجات بولدىك. ءبىز اتالعان ماسەلە بويىنشا جۇمىس­تى ەكىجاقتى فورماتتا، سونداي-اق، وڭىر­دەگى باسقا دا ارىپتەستەرىمىزبەن جالعاس­تىرامىز. وزەندەر بويىنشا ءبىز ءوزارا ءتيىمدى ءىس-قيمىل جاساۋىمىز كەرەك، سوندا عانا ەشقانداي كەلىسپەۋشىلىك بولمايدى، – دەدى قاسىم-جومارت توقاەۆ.

مەملەكەت باسشىسى ءوز سوزىندە مادەني-گۋمانيتارلىق ىنتىماقتاستىقتىڭ پەرسپەكتيۆالارىنا دا توقتالدى.

– قازاقستان مەن قىرعىزستاننىڭ مادەني كۇندەرىن وتكىزۋگە ۋاعدالاستىق. بىشكەكتە – ابايعا، نۇر-سۇلتان قالاسىندا ماناس پەن شىڭعىس ايت­ماتوۆقا ارنالعان ەسكەرتكىشتەر بوي كوتەرەدى. وعان قوسا بىرەگەي تاريحي مۇرا­­لارى­مىزدى دارىپتەۋ ءۇشىن كۇش-جىگە­رىمىز­دى جۇمىلدىراتىن بولدىق، – دەدى قازاق­ستان پرەزيدەنتى.

كەلىسسوزدەر قورىتىندىسى بويىنشا ەكى ەل جاستارى اراسىنداعى بايلانىستاردى جانداندىرۋعا ۋاعدالاستىق جاسالدى. مەملەكەت باسشىسى ەلىمىزدىڭ جوعارى وقۋ ورىندارىندا قىرعىز جاس­تارىنا بولىنەتىن ءبىلىم كۆوتاسىن 10 ەسەگە كوبەيتۋ جونىندە تاپسىرما بەرگەنىن، سونىڭ ارقاسىندا مۇنداي گرانتتاردىڭ سانى 50-گە جەتەتىنىن، سونداي-اق، بىش­كەكتە قازاقستاننىڭ بەدەلدى جوعارى وقۋ ور­نىنىڭ فيليالىن اشۋ تۋرالى باس­تا­ما قاراستىرىلىپ جاتقانىن ايتتى.

قازاقستان مەن قىرعىزستاننىڭ كوش­باسشىلارى وڭىرلىك جانە جاھاندىق ماسەلەلەر جونىندەگى پىكىر الماستى. قاسىم-جومارت توقاەۆتىڭ پىكىرىنشە، كوپ­تەگەن ماسەلەلەر بويىنشا ەكى ەلدىڭ ۇستانىمدارى ۇقساس. ورتالىق ازيا ەلدەرى باسشىلارىنىڭ كونسۋلتاتيۆتىك كەزدەسۋىن ودان ءارى دامىتۋدىڭ ماڭىزدىلىعى ايتىلدى. مەملەكەت باسشىسى ازياداعى ءوزارا ىقپالداستىق جانە سەنىم شارالارى كەڭەسىنىڭ الەۋەتىن نىعايتۋ جونىندەگى قازاقستاننىڭ باستاماسىنا قولداۋ كورسەتكەنى ءۇشىن سادىر جاپاروۆقا ريزا­شىلىعىن ءبىلدىردى.

پرەزيدەنت ءسوزىنىڭ سوڭىندا كەلىسسوز قورىتىندىسى قازاقستان مەن قىرعىزستان اراسىنداعى دوستىق، سەنىم جانە تاتۋ كور­شىلىككە قۇرىلعان قارىم-قاتىناستاردى قوس تاراپ تا ودان ءارى نىعايتا بەرۋگە بەيىلدى ەكەنىن كورسەتتى دەدى.

– ءبىزدىڭ مەملەكەتتەرىمىز بەن حا­لىق­تارىمىز توننىڭ ىشكى باۋىنداي ارا­لاسىپ كەتكەن. بۇل جۇرتتىڭ بارىنە بەلگىلى. مەملەكەت باسشىلارىنىڭ مىندەتى – ەكىجاقتى قارىم-قاتىناستاردى ىنتىماقتاستىقتىڭ ۇلگىلى مودەلىنە اينالدىرۋ. بۇگىنگى كەلىسسوزدەر اتالعان ماقساتتى شەشۋگە ارنالدى. پىكىر الماسۋلار وتە پايدالى ءارى تابىستى بولدى. ءبىز ەكىجاقتى ىنتىماقتاستىقتىڭ باس­تى باعىتتارىن ايقىندادىق، وڭىرلىك جانە حالىقارالىق قۇرىلىمدار اياسىن­­داعى ءىس-قيمىلداردى ارتتىرۋ ماسەلە­سىن تالقىلادىق. ەكى ەل اراسىن­داعى ىقپالداستىق بويىن­شا كەز كەلگەن ماسە­لەنى باۋىرلاس حالىق­تاردىڭ ەجەل­دەن قالىپتاسقان مۇددە­لەرىن ەسكەرە وتىرىپ، شۇعىل شەشۋگە كەلىس­تىك. قىر­عىزستان پرەزيدەنتى سادىر نۋرگوجو ۇلى جاپاروۆتىڭ ساپارى تابىس­تى ءوتتى دەپ ايتۋعا تولىق نەگىز بار، – دەدى قاسىم-جومارت توقاەۆ.

سوڭعى جاڭالىقتار

75،7 ملن ادام ايتۆ جۇقتىردى

مەديتسينا • كەشە

2021 جىلعى ورازا كەستەسى

رۋحانيات • كەشە

ۇقساس جاڭالىقتار