قوعام • 02 ناۋرىز، 2021

ەلوردالىق مۇعالىمدەردىڭ COVID-19-عا قارسى ۆاكتسينا قابىلداعاننان كەيىنگى جاعدايى قانداي؟

مۇعالىمدەر مەن قۇقىق قورعاۋ ورگاندارىنىڭ قىزمەتكەرلەرى ءۇشىن 1 ناۋرىزدان باستاپ كوروناۆيرۋس ينفەكتسياسىنا قارسى ۆاكتسيناتسيا باستالدى. كۆي-دان العاشقى ەكپەنى ەلوردالىق №27 جانە №50 مەكتەپتەردىڭ مۇعالىمدەرى الدى، دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.

Marzhan Tileubekova

ەكپەنى العاشقىلاردىڭ ءبىرى بولىپ №27 مەكتەپ-ليتسەيىنىڭ قازاق ءتىلى مەن ادەبيەتى ءپانىنىڭ مۇعالىمى زيباگۇل قاراتاەۆا قابىلدادى. وسىعان دەيىن ول دارىگەردىڭ ءتيىستى تەكسەرىسىنەن وتكەن بولاتىن.

«مەن ۆاكتسيناتسيانى ءوز ەركىممەن العىم كەلدى. بۇل ەڭ الدىمەن ءوزىڭدى جانە تۋىستارىڭدى قورعاۋ ءۇشىن قاجەت دەپ بىلەمىن. وتباسىمدا كوروناۆيۋرس ينفەكتسياسىمەن اۋىرعان ەشكىم جوق جانە جۇقتىرماس ءۇشىن وسىنداي تاڭداۋ جاساپ وتىرمىن. بۇل ءوز دەنساۋلىعىما دەگەن جاۋاپكەرشىلىك»، - دەيدى مۇعالىم.

سونىمەن قاتار، زيباگۇل قاراتاەۆا ۆاكتسينا قابىلداۋدا ەشقانداي قورقىنىش جوق ەكەنىن ايتىپ ءوتتى.

«دارىگەرلەردىڭ ۆاكتسينا قابىلداعانى جايلى قانشاما اقپارات تارادى، ءبارىن وقىپ وتىردىق، جاعدايدى نازاردا ۇستادىق. جاعىمسىز جاعدايلار بولعان جوق. سول سەبەپتى سەنىمدى بولدىم»، - دەپ ءتۇسىندىردى مۇعالىم.

ۆاكتسينانىڭ ءبىرىنشى كومپونەنتىن №27 ورتا مەكتەپ-ليتسەيىنىڭ ديرەكتورى قانات بايسالباەۆ تا قابىلدادى. ول ءوزىن جاقسى سەزىنەتىنىن، كەرى اسەرلەرى بولماعانىن جەتكىزدى.

«ەگەر ءبىز ينفەكتسيانىڭ تارالۋىن قالاماساق، ەكپە قابىلداۋىمىز قاجەت. ونىڭ ۇستىنە وقۋشىلار بىرتىندەپ سىنىپتارىنا ورالىپ جاتىر. ال ولاردىڭ اتا-انالارىمەن ءبىز كۇن سايىن كەزدەسىپ تۇرامىز. ءبىرىن ءبىرى قاتەرگە تىگۋگە بولمايدى. مەن مەكتەپ ديرەكتورى رەتىندە ەكپە الىپ، ارىپتەستەرىمە ۇلگى كورسەتۋگە بەل بۋدىم»، - دەپ اتاپ ءوتتى قانات بايسالباەۆ.

رايىمبەك باتىر اتىنداعى №50 مەكتەپ-ليتسەيىنىڭ تاريح ءپانىنىڭ مۇعالىمى سايلاۋباي شايكەنوۆ مەملەكەت ۇسىنعان تەگىن ۆاكتسيناتسيادان ءوتۋدى ازاماتتىق پارىزى سانايدى.

«مەملەكەت بىزگە قامقورلىق جاساپ، ۆاكتسيناتسيالاۋدى ۇسىنىپ وتىر. وتكەن جىل بۇكىل ادامزات ءۇشىن قيىن كەزەڭ بولدى. ۆيرۋستىڭ سالدارىنان قانشاما ادام قايتىس بولدى. ۆاكتسينانىڭ تيىمدىلىگىنە سەنبەسەم، بۇل جەردە وتىرماس ەدىم. ءوزىمدى، وتباسىمدى جانە وقۋشىلارىمدى قاتەردەن قورعاعىم كەلەدى»، - دەيدى تاريحشى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز