قازاقتا ۇلتقا ادال ەڭبەك ەتۋدىڭ وزىق ۇلگىسىن كورسەتكەن تەكتى ازاماتتار از ەمەس. سولاردىڭ ءبىرى دە بىرەگەيى كورنەكتى قوعام جانە مەملەكەت قايراتكەرى, عالىم, اكادەميك, تەحنيكا عىلىمدارىنىڭ دوكتورى ومىربەك جولداسبەكوۆ ەكەنى داۋسىز. كۇنى كەشە ءبىرتۋار تۇلعانىڭ تۋعانىنا 90 جىل تولدى.
جالپى, ومىربەك جولداسبەكوۆ دەسە, ەڭ الدىمەن, ەسكە ەلىمىزدەگى كوپتەگەن ازامات ءبىلىم العان قارا شاڭىراق قازىرگى قازاق ۇلتتىق ۋنيۆەرسيتەتى, بۇرىنعى كازگۋ تۇسەدى. ويتكەنى ومىربەك ارىسلان ۇلى 16 جىل بويى وسى ۋنيۆەرسيتەتتى باسقارىپ, ونى ەلىمىزدىڭ عانا ەمەس, بۇكىل كەڭەس وداعىنىڭ ماڭدايالدى جوعارى وقۋ ورىندارىنىڭ بىرىنە اينالدىردى. جاڭا ماماندىقتار, كافەدرالار جانە زەرتحانالاردىڭ ءدال وسى جولداسبەكوۆتىڭ تۇسىندا كوپتەپ اشىلعانى بارشاعا بەلگىلى. ال, كازگۋ قالاشىعىنىڭ سالىنۋىنا سىڭىرگەن ەڭبەگى ءوز الدىنا بولەك اڭگىمە.
ومىربەك ارىسلان ۇلىنىڭ نەبارى 39 جاسىندا ەلدەگى ەڭ باستى جوعارى وقۋ ورنىنىڭ تىزگىنىن ۇستاۋى ونىڭ قانشالىقتى ءبىلىمدى ءارى بىلىكتى بولعانىن اڭعارتادى. قايراتكەر 1986 جىلى رەكتورلىقتان كەتكەنىمەن, 1988 جىلعا دەيىن كازگۋ-دە ەڭبەك ەتتى. ءبىز دە ءدال سول جىلى وسى ۋنيۆەرسيتەتكە وقۋعا تۇسكەن ەدىك. ول كەزدەر ءبىلىم ورداسىندا جولداسبەكوۆ ءداۋىرىنىڭ جالىنى ءالى باسىلا قويماعان كەزەڭ بولاتىن. سوندىقتان ايگىلى رەكتوردىڭ دۇرىلدەپ تۇرعان شاعىندا وقىماساق تا, ونىڭ شەبەر ۇيىمداستىرۋشى, ناعىز رەفورماتور ەكەنىن ستۋدەنت كەزىمىزدەن ساناعا توقىدىق. كازگۋ-ءدىڭ تۇلەگى رەتىندە ومىربەك ارىسلان ۇلىنىڭ جاستارعا جاساعان جاقسىلىقتارىن ەشقاشان ۇمىتپايمىز.
اعامىزبەن ءومىر جولىمىز 1994-1995 جىلدارى تاۋەلسىز قازاقستاننىڭ جوعارعى كەڭەسىندە ءتۇيىستى. مەن ول كەزدە اتالعان ورگاننىڭ اپپاراتىندا جۇمىس ىستەيمىن. ال ومىربەك جولداسبەكوۆ جوعارعى كەڭەستىڭ دەپۋتاتى, عىلىم, ءبىلىم جانە جاڭا تەحنولوگيالار كوميتەتىنىڭ توراعاسى ەدى. سول جىلدارى ومىربەك ارىسلان ۇلىنىڭ ىسكەرلىگىنە, تاباندىلىعىنا جانە پاراساتتىلىعىنا كۋا بولدىق. ونىڭ ءبارى بىزگە ومىرلىك ازىققا اينالعان ساباق بولدى دەسەم, قاتەلەسپەيتىن شىعارمىن.
كەيىن ەلىمىزدە قوس پالاتالى پارلامەنت قۇرىلىپ, ومىربەك جولداسبەكوۆ ءماجىلىس دەپۋتاتى بولدى. سول ارقىلى وتاندىق پارلامەنتاريزمنىڭ قالىپتاسۋىنا جانە ءوزى اڭساعان تاۋەلسىزدىكتى نىعايتۋعا ۇلكەن ۇلەس قوستى. بار ءبىلىمى مەن تاجىريبەسىن, قاجىر-قايراتى مەن قارىم-قابىلەتىن ەگەمەن ەلىنىڭ ەرتەڭى ءۇشىن جۇمساعان اعامىز ءومىرىنىڭ سوڭىنا دەيىن حالقىنا قالتقىسىز قىزمەت ەتتى.
سوندىقتان قاشاندا ۇلتتىق مۇددەنى بارىنەن بيىك قويعان, باتىل باستامالارى ارقىلى ەلىمىزدىڭ عىلىمى مەن بىلىمىنە تىڭ سەرپىن بەرگەن, ينجەنەرلىك اكادەميانىڭ جانە مەحانيكا-ماتەماتيكا ينستيتۋتىنىڭ نەگىزىن قالاعان, عالىمدىعىن بۇكىل دۇنيە ءجۇزى مويىنداعان تاۋ تۇلعانىڭ ونەگەلى ءومىرى مەن عىلىمي مۇراسىن دارىپتەۋ, ۇستاز رۋحىنا تاعزىم ەتۋ – بۇگىنگى بۋىن مەن كەلەر ۇرپاقتىڭ ابىرويلى مىندەتى. اعامىزدىڭ جاتقان جەرى جارىق, توپىراعى تورقا بولسىن.
