ايماقتار • 02 ناۋرىز، 2021

داريعا نازارباەۆا تارازداعى ينكليۋزيانى قولداۋ كابينەتتەرىنىڭ جۇمىسىمەن تانىستى

52 رەت كورسەتىلدى

«نۇرسۇلتان نازارباەۆ قورىنىڭ» ديرەكتورى داريعا نازارباەۆا جۇمىس ساپارىمەن تاراز قالاسىندا بولدى. داريعا نۇرسۇلتانقىزى مەن جامبىل وبلىسىنىڭ اكىمى بەردىبەك ساپارباەۆ وبلىستىق كوپسالالى بالالار اۋرۋحاناسىنداعى «قامقورلىق» وڭالتۋ ورتالىعىنىڭ جانە تاراز قالاسىنداعى  №9 ورتا مەكتەپ پەن ا.گايدار اتىنداعى №35 ورتا مەكتەپتەرىندەگى ينكليۋزيانى قولداۋ كابينەتتەرىنىڭ جۇمىسىمەن تانىستى، دەپ حابارلايدى Egemen.kz.

وسى كابينەتتەردىڭ اشىلۋى ناتيجەسىندە بۇگىندە ەرەكشە ءبىلىم الۋعا قاجەتتىلىگى بار 22 بالا ءوز قۇرداستارىمەن بىرگە مەكتەپتە وقۋعا مۇمكىندىك العان. بۇرىن بۇل بالالار ۇيدە وقىتىلعاندىقتان، لوگوپەد، دەفەكتولوگ پەن پسيحولوگ سياقتى مامانداردىڭ جاردەمىن تۇراقتى تۇردە الا الماعان.

داريعا نازارباەۆا ەلباسىنىڭ «قامقورلىق» باستاماسىن ىسكە اسىرۋ اياسىندا وتكەن جىلدىڭ جەلتوقسان ايىندا اشىلعان وڭالتۋ ورتالىعىنىڭ جۇمىسىن كوردى. ورتالىقتاعى كابينەتتەردى ارالاپ، اتا-انالارمەن جانە بالالارمەن اڭگىمەلەستى. مۇندا نەيرو-ورتوپەديالىق اۋرۋلارى بار 80 بالا وڭالتۋدان وتۋدە. ال، اشىلعان ساتتەن باستاپ جامبىل وبلىسىنان ەرەكشە قاجەتتىلىكتەرى بار 200-گە جۋىق بالا كومەك العان. اتالعان ورتالىق ەلباسىنىڭ باستاماسى اياسىندا اشىلعان 8 ورتالىقتىڭ ىشىندەگى ەڭ ۇلكەن ورتالىقتاردىڭ ءبىرى. بۇل ورتالىق 1500 شارشى مەتردە ورنالاسقان، ىشىندە 2 باسسەينى بار. تاراز قالاسىنىڭ «قامقورلىق» وڭالتۋ ورتالىعىنىڭ ديرەكتورى رايسا قوجامجاروۆا داريعا نۇرسۇلتانقىزىنا كەشەندى وڭالتۋ تۇجىرىمداماسى مەن كورسەتىلەتىن وڭالتۋ ءىس-شارالارىنىڭ تۇرلەرى تۋرالى مالىمەت بەردى. ولاردىڭ ىشىندە دارىگەرلەردىڭ كونسۋلتاتسيالارى، مەحانوتەراپيا، ەمدىك دەنە شىنىقتىرۋ، سەنسورلىق جانە ينتەراكتيۆتى بولمەلەردە لوگوپەدتەردىڭ، دەفەكتولوگتاردىڭ، پسيحولوگتاردىڭ، ەرگوتەراپەۆتەردىڭ ساباقتارى، سونداي-اق، مينەرالدى سۋمەن ەمدەۋ، فيزيوەمدەۋ جانە باسقا دا ەم تۇرلەرى بار. «قامقورلىق» ورتالىقتارىندا ءتيىستى وقىتۋدان وتكەن بىلىكتى ماماندار جۇمىس ىستەيدى.

بىلتىر جامبىل وبلىستىق بالالار اۋرۋحاناسى جانىنداعى ورتالىقتىڭ 24 مامانى بىلىكتىلىكتى ارتتىرۋ جانە قايتا دايارلاۋ كۋرستارىن وتكەن بولسا، بيىل كوشپەلى سەمينارعا 32 قىزمەتكەر قاتىسقان. جىل سوڭىنا دەيىن رەابيليتولوگيا سالاسىنداعى وزەكتى ماسەلەلەر بويىنشا شەتەلدىك مەنتورلاردىڭ قىزمەتكەرلەرىن وقىتۋ جوسپارلانۋدا. «سونداي-اق، بالالاردى قولجەتىمدى جەردە ساپالى وڭالتۋدان وتكىزۋ ماقساتىندا قور وڭالتۋ ورتالىعىنا جەتەكشىلىك ەتۋدى جالعاستىرۋعا نيەتتى»، دەدى «قامقورلىق» قورى ديرەكتورىنىڭ مىندەتىن ۋاقىتشا اتقارۋشى ارايلىم ەركىنوۆا. ورتالىق جىل سايىن 600-دەن استام نەيرو-ورتوپەديالىق، ونىڭ ىشىندە تسەرەبرالدى سال اۋرۋى بار بالالاردى تەگىن قابىلدايتىن بولادى. مۇنداي ورتالىقتار ەلىمىزدىڭ الماتى، اتىراۋ، باتىس قازاقستان، شىعىس قازاقستان، تۇركىستان، قوستاناي وبلىستارىندا جانە نۇر-سۇلتان قالاسىندا اشىلدى.

جالپى، ەلباسىنىڭ بۇل باستاماسى جىلىنا 5000 بالانى وڭالتۋعا مۇمكىندىك بەرەدى. جاڭا 8 ورتالىقتىڭ جۇمىسى ناتيجەسىندە تسەرەبرالدى سال اۋرۋى بار بالالاردى وڭالتۋدى قامتۋ 20 پايىزعا وسكەن. «ينكليۋزيانى قولداۋدىڭ 16 كابينەتىن قۇرۋ» – ەلباسىنىڭ تاعى ءبىر باستاماسى. جوبا قازاقستاننىڭ 8 وڭىرىندە جۇزەگە اسىرىلۋدا. ءاربىر ينكليۋزيانى قولداۋ كابينەتتەرى ءۇشىن نۇرسۇلتان نازارباەۆ قورى 10 تيۋتور، ياعني جەكە اسيسستەنتتەردى دايىنداعان. پسيحولوگيالىق-پەداگوگيكالىق سۇيەمەلدەۋ قىزمەتىنىڭ بارلىق ماماندارى ءۇشىن وقىتۋ جۇرگىزىلگەن. سونىمەن قاتار، ءار مەكتەپ سەرتيفيكاتتالعان مامانداردىڭ جىلدىق كۋراتسياسىمەن قامتاماسىز ەتىلگەن.

سوڭعى جاڭالىقتار

ءمىنسىز – كىم؟

رۋحانيات • كەشە

سەمەيدەگى سەرپىلىس

ايماقتار • كەشە

ۇقساس جاڭالىقتار