قايىرىمدى دا باتىل جاندار قۇرمەت تورىندە

قوعام • 02 ناۋرىز، 2021

قايىرىمدى دا باتىل جاندار قۇرمەت تورىندە

10 رەت كورسەتىلدى

وزگەنىڭ قايعىسىن بولىسۋگە، رياسىز كومەككە دايىن، يگى ىستەردىڭ باستاۋشىسى بولاتىن جاندار از ەمەس. مەيىرىمدى، باۋىرمال، قايىرىمدى، جومارت ادامدار – كەز كەلگەن قوعامنىڭ نەگىزگى تىرەگى. وسى ورايدا نۇرسۇلتان نازارباەۆ قورى مەن قازاقستاننىڭ ىسكەر ايەلدەر قاۋىمداستىعى «قايىرىمدىلىق كەرۋەنى» رەسپۋبليكالىق بايقاۋىن ءۇشىنشى جىل قاتارىنان ۇيىمداستىرىپ جاتىر. اتالعان ءىس-شاراعا الماتى قالاسىنىڭ اكىمى باقىتجان ساعىنتاەۆ قاتىستى. بايقاۋ قايىرىمدىلىق يدەيالارىن ناسيحاتتاۋعا، بەلسەندى ازاماتتىق باستامانى دامىتۋعا باعىتتالعان.

دۋمان اناش

جوباعا قاتىسۋشىلار اراسىندا ۇدايى مۇقتاج ادامدارعا كومەكتەسىپ، ەكولوگيالىق ماسەلەلەردى شەشىپ، الەۋمەتتىك كاسىپكەرلىكتى جۇزەگە اسىرىپ جۇرگەن ءتۇرلى سالادا قىزمەت ەتەتىن كاسىپكەرلەر، قوعامدىق ۇيىم وكىلدەرى، ءبىلىم بەرۋ سالاسىنىڭ ماماندارى، ەرەكشە قاجەتتىلىكتەرى بار ادامدار، قۇقىق قورعاۋ ورگاندارىنىڭ قىزمەتكەرلەرى، جۋرناليستەر مەن بلوگەرلەر بار. ءداستۇرلى تۇردە بايقاۋ جەڭىمپازدارىنىڭ ەسىمدەرى بەس اتالىم اياسىندا انىقتالادى: «اسار»، «تۋعان جەر»، «مەيىرىم جولىندا»، «باتىل جۇرەك»، «قايىرىمدىلىق تاريحى». الايدا بيىل كوميسسيا مۇشەلەرى تاعى ەكى نوميناتسيا – «بالا جۇرەگى» جانە «جانۋارعا مەيىرىم» اتالىمدارىن تاعايىنداۋ تۋرالى شەشىم قابىلدادى.

بايقاۋدىڭ ماڭىزىن اتاپ وتكەن نۇرسۇلتان نازارباەۆ قورىنىڭ ديرەكتورى داريعا نازارباەۆا بايقاۋعا قاتىسۋعا نيەت ەتكەن مەيىرىمدى، قايىرىمدى ادامداردىڭ سانى جىل سايىن كوبەيىپ كەلە جاتقانىنا نازار اۋداردى. العاشقى بايقاۋ ۇيىمداستىرىلعاننان بەرگى ءۇش جىلدا قاتىسۋشىلار سانى جەتى ەسەگە ارتىپ، 2020 جىلدىڭ وزىندە 667 ادامدى قۇراعان.

– بيىلعى «قايىرىمدىلىق كەرۋەنى» ەرەكشە. كوروناۆيرۋس پاندەمياسى، كارانتيندىك شەكتەۋلەر ارقايسىمىزدىڭ ومىرىمىزگە اسەر ەتتى. بۇگىنگى شاراعا قاتىسۋشىلار اراسىندا وسى قيىن-قىستاۋ كەزەڭدە ءوز كۇشى مەن مۇمكىندىگىن اياماعان جانداردى ەرەكشە اتاپ وتكىم كەلەدى، – دەدى قور ديرەكتورى.

قور جەتەكشىسىنىڭ ايتۋىنشا، ءاربىر وقيعانىڭ ارتىندا ادام باسىنا تۇسكەن قايعى مەن مۇڭ، مەيىرىمدىلىك پەن ماحاببات تۇر. مەيىرىمدىلىك پەن ىنتىماقتاستىق بىرلەسكەن كەزدە، توتەپ بەرە المايتىن قيىندىق بولماق ەمەس.

«بايقاۋعا قاتىسۋشىلار وزگەلەرگە جاقسىلىق جاساۋدان ءلاززات تاباتىن، ومىرگە قۇشتار، كەڭ جۇرەكتى جاندار. ولار وزدەرىنىڭ جارقىن ءىس-ارەكەتتەرىمەن وسكەلەڭ ۇرپاققا ۇلگى بولىپ قانا قويماي، مەيىرىمدى بولۋعا ىنتالاندىرادى»، دەدى داريعا نۇرسۇلتانقىزى.

جەتى اتالىمنىڭ ارقايسىسى بويىنشا جەڭىمپازدار مەن جۇلدەگەرلەر انىقتالدى. سونىمەن قاتار جۇلدەلى ورىندارعا يە بولماعان ۇزدىك فيناليستەر ىنتالاندىرۋ سىيلىعىن يەلەندى. اتاپ ايتقاندا، «اسار» نوميناتسياسى بويىنشا – قازاقستاندىق جانە شەتەلدىك قوعام اراسىندا ۇلتتىق قولونەر بۇيىمدارىن دايىنداۋ ءداستۇرىن تانىمال ەتۋگە قوسقان ەرەكشە ۇلەسى ءۇشىن سەمەي قالاسىنان ابىلايحان اسىلبايعا تاپسىرىلدى. «تۋعان جەر» نوميناتسياسى – كوپ بالالى وتباسىلارعا كومەكتەسكەن، سونداي-اق كوروناۆيرۋس پاندەمياسى كەزىندە ادامداردى قۇتقارۋعا اتسالىسقان (17 ملن تەڭگەگە 185 ءوجج اپپاراتى، دارىلىك زاتتار ساتىپ الىندى، مەديتسينالىق قىزمەتكەرلەردى تاماقتاندىرۋ ۇيىمداستىرىلدى) سەمەي قالاسىنىڭ تۇرعىنى داۋرەن كۇلدىشەۆكە، ال «باتىل جۇرەك» نوميناتسياسى – 4 جاستاعى بالانىڭ باۋىرىن اۋىستىرۋعا دونور بولعان قوستاناي وبلىسىنىڭ تۇرعىنى الەكسەي سىچۋگوۆقا، «مەيىرىم جولىندا» نوميناتسياسى – كوپ بالالى جانە از قامتىلعان وتباسىلارعا تۇراقتى نەگىزدە ماتەريالدىق كومەك كورسەتكەنى ءۇشىن (قور 20 مىڭنان استام وتباسىعا كومەكتەستى، 100 توننادان استام ازىق-ت ۇلىك تاراتتى) نۇر-سۇلتان قالاسىنىڭ «شاپاعات» قايىرىمدىلىق قورىنا بەرىلدى. سونداي-اق باتىس قازاقستان وبلىسىنىڭ «سىرىم ەلى» قوعامدىق-ساياسي گازەتى «قايىرىمدىلىق تاريحى» نوميناتسياسى بويىنشا ۇزدىك دەپ تانىلدى. باسىلىم وبلىس تۇرعىندارىنىڭ پروبلەمالارىن جاريالاپ، ونى شەشۋگە سەپتىگىن تيگىزەدى. گازەتتىڭ بەلسەندى پوزيتسياسى ارقىلى 13 وتتەگى كونتسەنتراتورى مەن ءدارى-دارمەكتەر، ەكى وتباسىنا ءۇي ساتىپ الىندى. ال «بالا جۇرەگى» نوميناتسياسىندا باتىس قازاقستان وبلىسىنان كەلگەن 16 جاستاعى دانا وتەباەۆا ۇزدىك اتاندى. ماراپات ءورت كەزىندە 3 بالانى قۇتقارۋداعى ەرەن ەرلىگى ءۇشىن بەرىلدى. «جانۋارعا مەيىرىم» نوميناتسياسىندا وسكەمەن قالاسىنان كەلگەن بوريس ششەرباكوۆ اتاپ ءوتىلدى. ول شىعىس قازاقستان تابيعاتىن دارىپتەۋگە ۇلكەن ۇلەس قوستى، بوتانيكا، فاۋنيستيكا، ەكولوگيا بويىنشا 200-گە جۋىق عىلىمي جۇمىس پەن كىتاپ شىعاردى. شەشەك شاتقالىندا «مەكتەپ جانىنداعى ەكولوگيالىق قورىق» ۇيىمداستىردى، وندا جاس ناتۋراليستەر ەكولوگيالىق پراكتيكادان ءوتىپ، وزدەرىنىڭ عىلىمي ىزدەنىستەرىن جۇرگىزە الادى.

ايتا كەتەلىك، «قايىرىمدىلىق كەرۋەنى» – يگى ىستەر جاسايتىن ادامداردى انىقتاۋعا جانە ىنتالاندىرۋعا باعىتتالعان جوبا. جوبانى ىسكە اسىرۋدىڭ ءۇش جىلىندا وسىنداي 1 مىڭعا جۋىق قايىرىمدى ادام انىقتالدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز