ەلىمىزدە ەپيدەميالىق احۋال تۇراقتالىپ, ىندەت جۇقتىرعانداردىڭ قاتارى كەمىپ كەلەدى. سوڭعى دەرەك بويىنشا ءبىر تاۋلىكتە پتر ارقىلى 622 ادامنىڭ Covid-19-بەن اۋىرعانى راستالدى. سونداي-اق 547 ادام ىندەتتەن ايىققان. دەنساۋلىق ساقتاۋ مينيسترلىگى قازىرگى ۋاقىتتا 20 140 ادامنىڭ كوروناۆيرۋس ينفەكتسياسىنان ەمدەلىپ جاتقانىن حابارلادى. ونىڭ ىشىندە 4 472 ناۋقاس ستاتسيوناردا, 15 668 ناۋقاس امبۋلاتورلىق دەڭگەيدە ەم قابىلداۋدا. ىندەتكە شالدىققانداردىڭ اراسىندا 248 ادامنىڭ جاعدايى اۋىر, 50 ناۋقاستىڭ جاعدايى وتە اۋىر, 44 ناۋقاس ءوجج اپپاراتىندا جاتىر. ال كوروناۆيرۋس ينفەكتسياسىنىڭ بەلگىلەرى بار پنەۆمونيا 10 ادامنان انىقتالدى, 3 ادام وسى ىندەتتىڭ سالدارىنان دەم جەتپەي باقيلىق بولدى.
ىندەتتىڭ تارالۋ قارقىنى باسەڭدەپ, جاعداي ايتارلىقتاي وڭالىپ قالعان ەلىمىز قازىر «جاسىل ايماقتا» تۇر. «جاۋ جوق دەمە, جار استىندا» دەگەندەي, قانشا جەردەن قاۋىپتىڭ بەتى قايتقانمەن, ساقتىق شارالارىن قاتاڭ ۇستانۋدى استە قاپەردەن شىعارماعان ءجون. دەگەنمەن «سامارقاننىڭ كوك تاسىن جىبىتەتىن كۇننىڭ» جاقىنداۋىمەن قاتاڭ شارالار دا ءبىراز بوساڭسيتىن ءتۇرى بار. COVID-19 ىندەتىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيا وتىرىسىنىڭ قورىتىندىسى بويىنشا 1 ناۋرىزدان باستاپ 7 كۇن بويى «جاسىل ايماقتا» تۇرعان وڭىرلەردە تسيركتەردىڭ, بيليارد كلۋبتارىنىڭ, بالالار ويىن-ساۋىق ورتالىقتارىنىڭ جۇمىس ىستەۋىنە (تولىمدىلىعى 30%-عا دەيىن), سپورتتىق ءىس-شارالاردى وتكىزۋگە (30%-عا دەيىن), جۇما نامازىن وقۋعا (30%-عا دەيىن) جانە اس بەرۋ ءراسىمىن وتكىزۋگە (30%-عا دەيىن, 50 ادامنان ارتىق ەمەس) رۇقسات ەتىلەدى. بۇعان قوسا ءبىر اپتا «سارى ايماقتاعى» وڭىرلەردە جابىق بازارلاردىڭ (ازىق-ت ۇلىك, ازىق-ت ۇلىك ەمەس), ساۋدا جانە ويىن-ساۋىق ورتالىقتارىنىڭ, ساۋدا ۇيلەرىنىڭ, ساۋدا جەلىلەرىنىڭ جەكسەنبى كۇندەرى جۇمىس ىستەۋىنە تىيىم سالىنبايدى.
سونىمەن قاتار مونيتورينگتىك تەكسەرۋ قورىتىندىسى بويىنشا ءبىلىم بەرۋ ۇيىمدارىندا سانيتارلىق-ەپيدەمييالىق تالاپتاردىڭ بۇزىلۋ فاكتىلەرى كوپ تىركەلگەن ماڭعىستاۋ, قوستاناي جانە جامبىل وبلىستارىن قوسپاعاندا, بارلىق وبلىستا 1 ناۋرىزدان باستاپ 1-5 سىنىپتاردىڭ, حالىقارالىق مەكتەپتەردە 1-7 سىنىپتاردىڭ وقۋشىلارىن ارالاس وقىتۋعا رۇقسات ەتىلەدى.
سونداي-اق يندۋستريا جانە ينفراقۇرىلىمدىق دامۋ مينيسترلىگىنىڭ تۇركيامەن (قوسىمشا 4 رەيس), وزبەكستانمەن (+4 رەيس), قىرعىزستانمەن (+2 رەيس) جانە ۋكراينامەن (+1 رەيس) حالىقارالىق اۋە رەيستەرىنىڭ سانىن ارتتىرۋ تۋرالى ۇسىنىسى كوميسسيانىڭ قولداۋىنا يە بولدى.
جالپى, جامان ىندەتتىڭ قۇرساۋىنان ءبىرجولا قۇتقاراتىن, قالىپتى ومىرگە ورالۋعا سەپتىگىن تيگىزەتىن امال – ۆاكتسينالاۋ ەكەنى تۇسىنىكتى. ەلىمىزدە اقپان ايىنان باستاپ اق جەلەڭدى ابزال جانداردىڭ ءوزى باستاپ, ءبىراز ازامات كوروناۆيرۋسقا قارسى ەكپە الدى. جوسپار بويىنشا جىل سوڭىنا دەيىن 6 ملن-نان اسا قازاقستاندىق ۆاكتسينالانباق. بۇل رەتتە وڭىرلەر يممۋنوپروفيلاكتيكا بويىنشا حالىققا اقپاراتتىق-ءتۇسىندىرۋ جۇمىستارىن كۇشەيتۋى قاجەت. بۇل تۋرالى دەنساۋلىق ساقتاۋ مينيسترلىگىنىڭ كەڭەيتىلگەن القا وتىرىسىندا ۆەدومستۆو باسشىسى الەكسەي تسوي ايتتى.
ونىڭ ايتۋىنشا, ە-gov mobile «ۆاكتسينالاۋ» جانە «تسيفرلى قۇجاتتار» قىزمەتىندەگى كوروناۆيرۋسقا قارسى ۆاكتسينالاۋ پاسپورتى ارقىلى ەگىلگەندەردىڭ ەسەبىن جۇرگىزۋ جانە يممۋندىق جاعدايدى باقىلاۋ جوسپارلانۋدا. بۇل ۆاكتسينالاۋ كولەمىن جانە اۋرۋدىڭ بولجامىن جوسپارلاۋعا كومەكتەسەدى. ۆاكتسينالاۋدىڭ قولدا بار ناتيجەلەرىن ەسكەرە وتىرىپ, وسى جىلدىڭ ەكىنشى جارتىجىلدىعىنا دەيىن ەپيدەميالىق جاعدايعا بولجام جاسالدى.
«بۇكىل الەم ۆاكتسينالاۋ عانا قالىپتى ومىرگە كارانتينسىز ورالۋعا مۇمكىندىك بەرەتىنىن ءتۇسىندى. وسىعان بايلانىستى وڭىرلەر يممۋنوپروفيلاكتيكا بويىنشا حالىققا اقپاراتتىق-ءتۇسىندىرۋ جۇمىستارىن كۇشەيتۋى قاجەت», دەدى ا.تسوي. مينيستر وپتيميستىك جانە شىنايى بولجامعا سايكەس, جاپپاي ماسكا تاعۋ رەجىمى, سونداي-اق الەۋمەتتىك اراقاشىقتىقتى ساقتاۋ ناتيجەسىندە ەلدەگى ەپيدەميالىق جاعداي تۇراقتالاتىنىن جانە قاتاڭ كارانتيندىك شەكتەۋگە ۆاكتسينا عانا بالاما بولاتىنىن اتاپ ءوتتى.
ناۋرىز ايىنان باستاپ ۆاكتسينالاۋدىڭ كەلەسى كەزەڭى باستالدى. 1 ناۋرىزدان باستاپ نۇر-سۇلتان قالاسىندا دا كۆي-عا قارسى ەكپەنى مۇعالىمدەر, بالاباقشا تاربيەشىلەرى, قۇقىق قورعاۋ ورگاندارىنىڭ قىزمەتكەرلەرى الا باستادى.
ەلوردانىڭ قوعامدىق دەنساۋلىق ساقتاۋ باسقارماسىنىڭ مالىمەتى بويىنشا بۇل توپقا 15 مىڭنان اسا ادام كىرەدى. وسى ساناتتاعى ادامداردى ۆاكتسينالاۋ ءۇشىن نۇر-سۇلتانداعى 36 العاشقى مەديتسينالىق-سانيتارلىق كومەك ۇيىمدارىندا ەكپە ەگۋ بولمەلەرى ۇيىمداستىرىلدى. سونداي-اق ەكپە سالدىرتۋدا ۆەدومستۆوارالىق ۇيىمدار دا قاتىسادى. مۇعالىمدەر مەن تاربيەشىلەرگە ۆاكتسينالاۋ بمسك ۇيىمدارىنا ءبىلىم بەرۋ ۇيىمى بەكىتىلگەن جەرى بويىنشا جاسالادى. ۆاكتسينا الاتىنداردىڭ تىزىمدەرى جاسالدى, ءتيىستى ەمحانالارعا جىبەرىلدى.
اقپان ايىنىڭ باسىنان بەرى نۇر-سۇلتاندا بارلىعى 2 126 ادام كوروناۆيرۋس ينفەكتسياسىنا قارسى ەكپە الدى. وتكەن دەمالىس كۇندەرى باسقارمانىڭ قويمالارىنا 7 مىڭنان اسا جاڭا ۆاكتسينا ءتۇستى.
