ەكونوميكا • 02 ناۋرىز، 2021

وزبەكستان نارىعىنا شىعادى

قازاقستان مەن وزبەكستان 2021 جىلى ساۋدا سەرىكتەستىگىن نىعايتىپ، ەكونوميكالىق مۇمكىندىكتەردى بىرلەسىپ يگەرۋگە نيەتتى. «QazTrade» اق باس ديرەكتورى ازامات اسقار ۇلى وزبەكستان رەسپۋبليكاسىنا جۇمىس ساپارى اياسىندا ينۆەستيتسيالار جانە سىرتقى ساۋدا ءمينيسترىنىڭ ورىنباسارى بادريددين ابيدوۆپەن كەزدەسۋ وتكىزدى.

اباي قازبەك ۇلى

قازاقستان وزبەكستاننىڭ جەتەكشى سىرتقى ەكونوميكالىق ارىپتەستەرىنىڭ بەستىگىنە كىرەدى، بۇل رەتتە تاشكەنت قازاقستاننىڭ ورتالىق ازيا وڭىرىندەگى نەگىزگى ساۋدا سەرىكتەسى سانالادى. ازامات اسقار ۇلى ەكى ەلدىڭ ۇكىمەتى ەكىجاقتى تاۋار اينالىمىن 10 ملرد دوللارعا دەيىن ارتتىرۋدى جوسپارلاعانىن ەسكە سالدى.

– وكىنىشكە قاراي، پاندەمياعا بايلانىستى 14 پايىزعا تومەندەدى. بىراق بيىل ەلدەرىمىزدىڭ تاۋار اينالىمىن قالپىنا كەلتىرىپ، ارتتىرا الاتىنىنا سەنىمدىمىز، – دەدى «QazTrade» باسشىسى.

ءدال قازىر قازاقستان وزبەكستاننىڭ جەمىس-كوكونىس جانە جەڭىل ونەركاسىبىنە مۇددەلى جانە اۋىل شارۋاشىلىعى تاۋارلارىن، فارماتسەۆتيكالىق تاۋارلار مەن قۇرىلىس ماتەريالدارىن ۇسىنۋعا دايىن. كەلىسسوز بارىسىندا ءىرى قازاقستاندىق Magnum ريتەيلەرىنىڭ وزبەكستان نارىعىنا كىرۋى دە ءسوز بولدى. ساۋدا ورتالىعى 2021 جىلدىڭ قىركۇيەگىندە وزبەكستاندا العاشقى گيپەرماركەتتى اشۋدى، ال 2023 جىلعا قاراي تاعى 11 دۇكەن اشۋدى جوسپارلاپ وتىر. ونىڭ ۇشەۋى گيپەرماكەت بولماق. ازامات اسقار ۇلى بۇل ريتەيلەردىڭ قازاقستاندا كەڭ دارەجەدە تانىمال ەكەنىن دە ايتىپ ءوتتى.

وزبەكستانداعى Magnum سورەلەرىنىڭ 30 پايىزى قازاقستاندىق ءوندىرىس ونىمدەرىمەن تولىقپاق. ونىڭ ىشىندە بۇرىن وزبەكستان نارىعىنا شىقپاعان قازاقستاندىق برەندتەر دە بار.

كەلىسسوزدەر كەزىندە تاراپتار ەكى ەلدىڭ وندىرۋشىلەرىن قولداۋ جانە ولاردىڭ ونىمدەرىن قازاقستاننىڭ مۇمكىندىكتەرىن پايدالانا وتىرىپ، ءۇشىنشى ەلدەردىڭ نارىقتارىنا شىعارۋ بويىنشا بىرلەسكەن ءىس-شارالار قۇرۋ مۇمكىندىگىن دە تالقىلادى.

– قازاقستاننىڭ دامىعان كولىك ينفراقۇرىلىمى، سونىڭ ىشىندە ترانزيتتىك ينفراقۇرىلىمى بار. بىرلەسكەن كاسىپورىندار قۇرۋ ارقىلى، ونىڭ ىشىندە «بولاشاق» حالىقارالىق ساۋدا-ەكونوميكالىق ىنتىماقتاستىق ورتالىعى شەڭبەرىندە بىرلەسكەن قازاق-وزبەك كاسىپورىندارىنىڭ ونىمدەرى ەۋرازيالىق وداق ەلدەرىنىڭ نارىعىنا كەدەنسىز قول جەتكىزە الادى. بۇدان باسقا ءبىز بىرلەسىپ وندىرىلگەن تاۋارلاردى لوگيستيكالىق ورتالىقتارىمىز ارقىلى قىتاي نارىعىنا دا، ەو ەلدەرىنە دە ىلگەرىلەتە الامىز، – دەپ اتاپ ءوتتى ازامات اسقار ۇلى وزبەكستان رەسپۋبليكاسىنىڭ ساۋدا-ونەركاسىپ پالاتاسى توراعاسىنىڭ ورىنباسارى فاريزشوح ۋسمانوۆپەن بولعان كەزدەسۋدە.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز