بىلتىر سقو-دا 7 مىڭعا جۋىق نارەستە دۇنيەگە كەلگەن

ايماقتار • 01 ناۋرىز، 2021

بىلتىر سقو-دا 7 مىڭعا جۋىق نارەستە دۇنيەگە كەلگەن

2 رەت كورسەتىلدى

سولتۇستىك قازاقستان وبلىسىندا بىلتىر 6 886 ءسابي ءومىر ەسىگىن اشتى، الايدا 7 577 ادام قايتىس بولعان.

سقو ستاتيستيكا دەپارتامەنتىنىڭ مالىمەتىنشە، بىلتىر وڭىردە 6 886 ءسابي دۇنيەگە كەلسە، سونىڭ 41،5 %-ى پەتروپاۆلدا تۋعان. نارەستەلەردىڭ 3 604-ءى ۇل، 3 282-ءسى قىز. دەموگرافيالىق كورسەتكىش بويىنشا شال اقىن، ش.ءۋاليحانوۆ جانە اقجار اۋداندارى الدا كەلەدى.

ەڭ تومەن بالا تۋ كورسەتكىشى م.جۇماباەۆ اۋدانىندا. 2020 جىلدىڭ قاڭتار-جەلتوقسان ارالىعىندا 7 577 ادام قايتىس بولدى. ونىڭ 19،8 %-ىندا تىنىس الۋ مۇشەلەرى اۋرۋىنان، 14،6 %-ىندا قان اينالىمى جۇيەسى، 8،9 % اسقورىتۋ مۇشەلەرى اۋرۋلارىنان جانە 7،6 %-ىندا قاتەرلى ىسىكتەن كوز جۇمعان.

جازاتايىم وقيعالاردان، جاراقاتتانۋ مەن ۋلانۋدان قايتقانداردىڭ ۇلەسى – 7،5 %. جالپى بىلتىر 2 932 نەكە قيىلعان، بۇل – 2019 جىلمەن سالىستىرعاندا شامامەن 15 %-عا تومەن. 860 وتباسى اجىراسقان.

وتكەن جىلى سقو-عا 6 061 ادام كوشىپ كەلدى. بۇل، مامانداردىڭ ايتۋىنشا، 2019 جىلمەن سالىستىرعاندا 23،4 %-عا تومەن. كوشىپ كەتكەندەر سانى دا 24،7 %-عا تومەن بولعانىمەن، وڭىردەن 10 446 ادام قونىس اۋدارعان. سونىڭ ىشىندە ەل ىشىندەگى ميگراتسيا 2 627 ادام.

ال سىرتقا، كوپ جاعدايدا تمد ەلدەرىنە كوشەدى ەكەن. سونىڭ ىشىندە نەگىزىنەن رەسەيگە كەتىپ، وسى كورشى ەلدەن قونىس اۋدارادى. الەمنىڭ باسقا ەلدەرىنە وبلىستىڭ 237 تۇرعىنى كوشىپ كەتكەن. تۇراقتى تۇرۋ ءۇشىن 80 ادام كەلگەن. ەميگراتسيا ەلدەرى نەگىزىنەن – پولشا مەن گەرمانيا. كوشىپ كەتكەندەردىڭ 95،8 %-ى وسى مەملەكەتتەرگە تيەسىلى. ال كەلگەندەردىڭ 67،5 %-ى قىتاي مەن موڭعوليادان قونىس اۋدارعان.

باسقا وڭىرلەردەن 5467 ادام كەلىپ، 8094 ادام كەتكەن. كەلىپ-كەتۋشىلەردىڭ نەگىزگى ۇلەسىن اقمولا وبلىسى مەن نۇر-سۇلتان قالاسى الادى. وسىلايشا، سقو تۇرعىندارىنىڭ سانى بۇگىندە 543،7 مىڭ ادام.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز