قازاقستان • 01 ناۋرىز، 2021

ارمەنيادان اكەلگەن كولىكتەردى تىركەۋ مەرزىمى ۇزارتىلدى

907 رەت كورسەتىلدى

قازاقستاندىقتاردىڭ ارمەنيادان اكەلگەن كولىكتەرىن تىركەۋ مەرزىمى ۇزارتىلدى، دەپ حابارلايدى Egemen.kz

ىشكى ىستەر مينيسترلىگى مەملەكەت باسشىسىنىڭ تاپسىرماسىن ورىنداۋ شەڭبەرىندە ارمەنيا رەسپۋبليكاسىنىڭ ۋاكىلەتتى ورگاندارىندا قازاقستان رەسپۋبليكاسىنىڭ ازاماتتارىنا تىركەلگەن جانە 2020 جىلعى 1 اقپانعا دەيىن قازاقستان رەسپۋبليكاسىنا اكەلىنگەن كولىك قۇرالدارىن تىركەۋ بويىنشا جۇمىس جۇرگىزۋدە. قازىرگى ۋاقىتتا تىركەۋ شارتتارىنا سايكەس 20 مىڭنان استام اۆتوموبيل ەسەپكە قويىلدى.

1 مىڭنان استام اۆتوكولىك يەلەرىنە ءوز اۆتوموبيلدەرىن تىركەۋگە نەمەسە ولاردى ەلدەن تىس جەرلەرگە اكەتۋگە مۇمكىندىك بەرمەگەن بىرقاتار وبەكتيۆتى سەبەپتەر بار.

اتاپ ايتقاندا، كۇردەلى ەپيدەميولوگيالىق جاعدايعا جانە كارانتيندىك شەكتەۋلەردىڭ ۇزاققا سوزىلۋىنا بايلانىستى مەملەكەتتىك شەكارانى كەسىپ ءوتۋ شەكتەۋلەرىنىڭ سالدارىنان اۆتوكولىكتى ارمەنياعا كەرى اكەتۋ پروبلەمالارى تۋىندادى.

سونداي-اق كارانتينگە جانە اككرەديتتەلگەن زەرتحانالاردىڭ بارلىق وڭىرلەردە بولماۋىنا بايلانىستى كەيبىر اۆتوكولىك يەلەرى قايتا جابدىقتالعان اۆتوموبيلدەردى ۋاقتىلى سىناقتان وتكىزە المادى. «قارجى پيراميدالارى» بويىنشا قىلمىستىق ىستەردى تەرگەۋگە بايلانىستى يەلەرىنىڭ باسىم بولىگى ادال ساتىپ الۋشىلار بولىپ تابىلاتىن بىرقاتار اۆتوموبيلدەردى (اۆتوكولىك لومباردتارداعى، ميكروكرەديتتىك ۇيىمدارداعى كەپىلدىك م ۇلىك بولىپ تابىلادى) پايدالانۋ شەكتەلگەن.

وسى پروبلەمالاردى ەسكەرە وتىرىپ، ۇكىمەت بيىلعى جىلدىڭ 27 اقپانىندا وسىنداي اۆتوموبيلدەردى تىركەۋ مەرزىمدەرىن 2022 جىلعى 1 ناۋرىزعا دەيىن ۇزارتۋ تۋرالى شەشىم قابىلدادى (ۇكىمەتتىڭ №104 قاۋلىسى). وسىلايشا، ارمەنيا رەسپۋبليكاسىندا تىركەلگەن جانە ءبىزدىڭ ەلگە 2020 جىلعى 1 اقپانعا دەيىن اكەلىنگەن كولىك قۇرالدارىنىڭ يەلەرى – قازاقستان ازاماتتارىنا ءوز اۆتوموبيلدەرىن ەسەپكە قويۋ ماسەلەلەرىن شەشۋ ءۇشىن قوسىمشا ۋاقىت بەرىلدى.

سونىمەن قاتار قازىرگى ۋاقىتتا ارمەنيا ۇكىمەتىمەن كەلىسىم بويىنشا قازاقستاندا تىركەۋدەن وتكەن وسىنداي اۆتوموبيلدەردىڭ يەلەرىن ارمەنياداعى سالىق مىندەتتەمەلەرىنەن بوساتۋ تۋرالى ۇكىمەتارالىق كەلىسىم ىشكى جانە مەملەكەتارالىق راسىمدەردەن وتۋدە. بۇل شارالار اۆتوكولىك يەلەرى ءۇشىن (ارمەنيا مەن قازاقستاندا) «قوسارلانعان» سالىق سالۋدى بولدىرماۋعا باعىتتالعان. مەملەكەتتىك ورگاندار قازاقستان رەسپۋبليكاسى ۇكىمەتىنىڭ اتالعان شەشىمدەرىن ىسكە اسىرۋ بويىنشا ءتيىستى شارالار قابىلدايتىن بولادى.

سوڭعى جاڭالىقتار

ءسوزدىڭ جەتى بوياۋى

تانىم • كەشە

ورازانىڭ ءار ءساتى ساۋاپ

رۋحانيات • كەشە

ۇقساس جاڭالىقتار