جەكە زەينەتاقى شوتىنىڭ جاي-كۇيى تۋرالى اقپاراتتى بجزق كەڭسەلەرىنە تىكەلەي ءوزى كەلگەندە, سونداي-اق, ءداستۇرلى پوشتا ارقىلى ءۇزىندى كوشىرمە الۋ جانە ەلەكتروندىق ءتاسىل ارقىلى بىلۋگە بولادى. قازىرگى ۋاقىتتا جەكە زەينەتاقى شوتىنىڭ جاي-كۇيى تۋرالى اقپاراتتاندىرۋدىڭ ەڭ تانىمال ءتاسىلى – ەلەكتروندىق ءتاسىل. 2021 جىلدىڭ 1 اقپانىنا ونى 6,7 ملن استام جەكە زەينەتاقى شوتى يەلەرى تاڭدادى. بۇل رەتتە 5 876 269 شوتتىڭ جاي-كۇيى تۋرالى سالىمشىلار مەن الۋشىلار enpf.kz سايتىنداعى جەكە كابينەت ارقىلى نەمەسە ENPF ءموبيلدى قوسىمشاسىندا بىلە الادى. وسىنداي حابارلاۋ ءتاسىلىن تاڭداعاندار سانى ءبىر جىل ىشىندە 248 531 ادامعا كوبەيدى.
بجزق-عا ۇسىنىلعان ەلەكتروندىق پوشتا مەكەن-جايى ارقىلى ءۇزىندى كوشىرمەنى 836 399 سالىمشى الادى. ەستەرىڭىزگە سالا كەتەيىك, اقپاراتتاندىرۋدىڭ وسى ادىسىنە سايكەس جەكە زەينەتاقى شوتىنان ءۇزىندى-كوشىرمە سالىمشىعا تاڭدالعان كەستەگە ساي ەلەكتروندىق پوشتا ارقىلى كەلەدى.
ءداستۇرلى پوشتا ارقىلى اقپاراتتاندىرۋ ءوز تانىمالدىلىعىن بىرتىندەپ جوعالتۋدا. 2021 جىلدىڭ 1 اقپانىنداعى جاعداي بويىنشا وسى تاسىلمەن 1 268 206 سالىمشى ءوز جەكە زەينەتاقى شوتىن باقىلايدى ەكەن. بۇل وتكەن 2020 جىلعى 1 اقپانعا قاراعاندا 81,9 مىڭعا از. ەگەر سالىمشى جزش-دان ءۇزىندى كوشىرمەنى جىلىنا ءبىر رەت ءداستۇرلى پوشتا ارقىلى الۋدى قالاپ, بىراق تۇرعىلىقتى مەكەنجايىن وزگەرتكەن بولسا, وندا ول بۇل تۋرالى قورعا حابارلاۋى ءتيىس ەكەنىن ەستەرىڭىزگە سالامىز. ايتقانداي, «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» قر زاڭىندا مۇنى مەكەنجايى وزگەرگەننەن كەيىنگى 10 كۇن ىشىندە جۇزەگە اسىرۋ قاجەت دەپ كورسەتىلگەن. ولاي بولماعان جاعدايدا, پوشتا وپەراتورى جەكە زەينەتاقى شوتىان ءۇزىندى كوشىرمەنى مەكەنجاي يەسىنە جەتكىزە المايدى جانە ول قورعا قايتىپ ورالادى, ياعني قور جەكە زەينەتاقى شوتىنان ءۇزىندى-كوشىرمەنى كەلەسى جىلى مۇنداي سالىمشىعا جىبەرمەيدى.
بجزق زەينەتاقى شوتىن كەز-كەلگەن ىڭعايلى تاسىلمەن ۇنەمى قاداعالاپ وتىرۋ قاجەتتىلىگىن ەسكە سالادى. سەبەبى, ول شوتتىڭ ۇنەمى تولىقتىرىلىپ وتىرعانىنا جانە بولاشاق زەينەتاقىنى جوسپارلاۋعا سەنىمدى بولۋ ءۇشىن كەرەك.
