ب. ساعىنتاەۆ Instagram-داعى پاراقشاسىندا كوكتەمنىڭ العاشقى كۇنى, العىس ايتۋ كۇنىندە بارشا قالا تۇرعىندارىنىڭ اتىنان دارىگەرلەر مەن سانەپيدەميولوگتارعا, پوليتسيا مەن اسكەري قىزمەتكەرلەرگە, ەرىكتىلەر مەن دەزينفەكتسيالاۋشىلارعا راحمەت ايتتى.
«سىزدەردىڭ قاجىرلى ەڭبەكتەرىڭىزدىڭ ارقاسىندا ءبىز كوروناۆيرۋس پاندەمياسىنا قارسى توتەپ بەرە الدىق. قاۋىپتى ىندەت كەزىندە ءۇي كورمەي, بەل جازباي جۇمىس ىستەپ, شەگىنۋدى بىلمەدىڭىزدەر. تارازىنىڭ باسىندا بۇكىل مەگاپوليس تۇرعىندارىنىڭ دەنساۋلىعى تۇرعانىن ءتۇيسىنىپ, سەزىندىڭىزدەر», دەپ اتاپ ءوتتى الماتى اكىمى ب. ساعىنتاەۆ.
ونىڭ ايتۋىنشا, ۇيىمشىلدىق پەن ىنتىماقتىڭ, ءوزارا قولداۋ مەن السىزدەرگە كومەكتەسۋدىڭ ارقاسىندا قالا سىن-قاتەردى ەڭسەردى. قالا تۇرعىندارى ءبىر-بىرىنە جۇرەك جىلۋىن سىيلاپ, جىلى سوزبەن جان جىلىتتى.
«پاندەميامەن كۇرەس ءالى اياقتالعان جوق. دەگەنمەن ءبىزدىڭ ەڭ اۋىر سىناققا توتەپ بەرە الاتىنىمىز, بۇدان دا كۇشتىرەك, مەيىرىمدى ءارى باتىل بولا الاتىنىمىز انىق», دەپ جازدى قالا اكىمى.
ب.ساعىنتاەۆ تۇسىنىستىك پەن قولداۋ بىلدىرگەن ءاربىر الماتىلىققا العىس ايتىپ, الماتىلىقتارعا زور دەنساۋلىق, اماندىق, باق-بەرەكە جانە قالانىڭ وركەندەۋىن تىلەدى.
