2013 جىلى وقۋىمدى بىتىرگەن سوڭ تۋعان اۋىلىما ورالىپ, ەڭبەك جولىمدى باستادىم. اۋەلى №1 شۇبارقۇدىق مەكتەپ-گيمنازياسىندا سىزۋ پانىنەن ساباق بەرىپ, ەكى جىلدان سوڭ تەمىر اۋداندىق كوركەمسۋرەت مەكتەبىنىڭ ديرەكتورى بولىپ تاعايىندالدىم. سودان بەرى اۋدان بالالارىنا سۋرەت ونەرى, كەسكىندەمە, ديزاين بويىنشا قوسىمشا ءبىلىم بەرەمىز. كوركەمسۋرەت مەكتەبىندە 150 بالا ءبىلىم الادى, 8 ۇيىرمە جۇمىس ىستەيدى. ءبىز وقۋشىلارعا سۋرەت, ديزاين, كەسكىندەمە, ءمۇسىن ونەرىنىڭ قىر-سىرى تۋرالى مۇمكىندىگىمىزشە تەرەڭدەتە ۇيرەتەمىز. وقۋشىلارىمىز وتە ىنتالى, شىعارماشىلىقپەن جۇمىس ىستەگەندى جاقسى كورەدى. ءبىر اتتەگەن-ايى, اۋداندارداعى شىعارماشىلىق ورتالىقتارىنىڭ ماتەريالدىق-تەحنيكالىق بازاسى سىن كوتەرمەيدى. بىزگە سۋرەت تەحنيكاسىن جان-جاقتى ۇيرەتەتىن كومپيۋتەرلەر, ءتۇرلى جابدىقتار قاجەت. ماسەلەن, ساز بالشىقپەن قۇمىرا, باسقا دا كەراميكالىق زاتتار جاساۋ تەحنيكاسىن ۇيرەتكىمىز كەلەدى. بىراق وعان ارنايى كاسىبي قۇرالدار مەن ارنايى دايىندالعان شيكىزات كەرەك, وعان اۋىلداعى قۇم-ساز جارامايدى. مىنە, وسىنداي ءتۇرلى جابدىقتار بولماعاننان كەيىن بالانىڭ بارلىق مۇمكىندىگىن اشا الماي جاتامىز.
دەگەنمەن, كوركەمسۋرەت مەكتەبىنىڭ ۇستازدارىنىڭ ارقاسىندا تەمىر اۋدانىنىڭ بالالارى جان-جاققا كونكۋرستارعا قاتىسادى. ءبىزدىڭ مەكتەپتىڭ وقۋشىلارى سۋرەت, كەسكىندەمە ونەرى بويىنشا حالىقارالىق جارىستارعا بارىپ, جۇلدەلى ورىندارعا يە بولىپ ءجۇر. ۋكراينا, بەلارۋس, تۇركياعا بارىپ قاتىسىپ كەلدى. 2018 جىلى وسى ءبىلىم ورداسى قازاقستانداعى يۋنەسكو كلۋبى مارتەبەسىن الدى. جالپى, تەمىر اۋدانىندا 4 قوسىمشا ءبىلىم بەرۋ مەكتەبى جۇمىس ىستەيدى.
اۋىل بالالارى وتە تالانتتى, زەرەك, قايىرىمدى, سەنگىش. ولاردى جاستايىنان ونەرگە, سپورتقا, بىلىمگە باۋلىسا, بالالارمەن ەرىنبەي جۇمىس ىستەسەك, تالاي جاستىڭ باعىن اشار ەدىك. جاستايىنان شىعارماشىلىقپەن اينالىسقان بالالار وتە مەيىرىمدى, كوپشىل, جاڭا ورتاعا تەز بەيىمدەلگىش, وسكەندە دە تىعىرىقتان جول تاۋىپ شىعا بىلەتىن بولىپ وسەدى. ويتكەنى كەز كەلگەن شىعارماشىلىق ورتا, قوسىمشا ءبىلىم بەرۋ مەكەمەسى بالانى تۇلعا رەتىندە قالىپتاستىرادى ءارى بولاشاق ماماندىعىنا جول اشادى. مۇنداي بالا ءوزىن كەز كەلگەن ورتادا قالاي ۇستاۋدى بىلەدى, بوس جۇرىسكە سالىنبايدى, ۋاقىتىن ۇنەمدەيدى. جانە ءبىر بايقاعانىم, قوسىمشا ءبىلىم بەرۋ ۇيىمدارىندا ءدارىس الاتىن بالانىڭ مەكتەپتەگى وقۋ ۇلگەرىمى دە بىردەن جاقسارادى.
مەن ناعاشىلارىمدى جاقسى كورەمىن, ءوز تەگىمدى دە ۇمىتقان جوقپىن. اتا-انامىزدان كىشكەنتايىمىزدان ۇلتقا ءبولىنۋ دەگەن ءسوزدى ەستىگەن جوقپىن. ەڭ باستىسى – ءوز وتانىڭا, ەلىڭە ادال قىزمەت ەتۋ كەرەك دەپ ويلايمىن. بيىلعى قاڭتاردا وتكەن سايلاۋدا تەمىر اۋداندىق ءماسليحاتىنا دەپۋتات بولىپ سايلاندىم. بۇل ماعان ارتىلعان ۇلكەن سەنىم, ۇلكەن جاۋاپكەرشىلىك. دەپۋتاتتىق قىزمەتىمدە بالا تاربيەسى, وقۋشىلاردىڭ شىعارماشىلىعىن دامىتۋ باعىتىندا اۋقىمدى جۇمىستار اتقارعىم كەلەدى. ەڭ باستىسى ەلدى مەكەندەردە تۇراتىن بالالاردىڭ وقۋى مەن زاماناۋي ءبىلىم الۋى ءۇشىن مۇمكىندىكتەر جاساۋ كەرەك دەپ ويلايمىن.
تەمىر اۋدانىنىڭ وركەندەپ-كوركەيۋى ءۇشىن قولدان كەلگەندى ايامايمىن. ءبىزدىڭ ادامدار وتە مەيىرىمدى, دوسقا ادال, قولىمنان كەلمەي جاتقان ىسكە قولعابىس جاسايدى. سول ءۇشىن دە ءوز ەلىمدى, ءوز جەرىمدى, جەرلەستەرىمدى جاقسى كورەمىن.
ماكسيم چيركوۆ,
تەمىر اۋداندىق كوركەمسۋرەت مەكتەبىنىڭ ديرەكتورى, اۋداندىق ءماسليحاتتىڭ دەپۋتاتى
اقتوبە وبلىسى
