ونلاين رەجىمدە وتكەن دوڭگەلەك ۇستەلدى العىسوزىمەن اشقان كوستيتۋتسيالىق كەڭەس توراعاسى قايرات ءمامي بۇگىندە بۇل ينستيتۋتتىڭ بىرقاتار ەۋروپالىق جانە باسقا دا ەلدەردە كەڭىنەن قولدانىلاتىنىن ايتا كەلىپ: «تۇتاستاي العاندا, وسى تەتىك قۇقىق ۇستەمدىگىن قامتاماسىز ەتۋگە جانە رەسپۋبليكا كونستيتۋتسياسىنىڭ جەتەكشىلىگىمەن ەلدىڭ قۇقىقتىق جۇيەسىن دامىتۋعا باعىتتالعان», دەدى.
دوڭگەلەك ۇستەلدە ۆەنەتسيا كوميسسياسىنىڭ پرەزيدەنتى دجانني بۋكيككيو جانە قازاقستانداعى ەۋروپالىق وداق وكىلدىگىنىڭ ىنتىماقتاستىق ءبولىمىنىڭ باسشىسى يوحاننەس ستەنبەك مادسەن قۇتتىقتاۋ ءسوز سويلەدى.
كەزدەسۋگە كونستيتۋتسيالىق كەڭەس مۇشەلەرى, پرەزيدەنت اكىمشىلىگىنىڭ قىزمەتكەرلەرى, پارلامەنت دەپۋتاتتارى, جوعارعى سوت, باس پروكۋراتۋرا, ادىلەت مينيسترلىگىنىڭ وكىلدەرى, سونداي-اق ادۆوكاتتار مەن قۇقىقتانۋشى عالىمدار قاتىستى.
ال ۆەنەتسيا كوميسسياسى تاراپىنان جيىنعا وسى كوميسسيانىڭ ۆيتسە-پرەزيدەنتى, فرانتسيا كونستيتۋتسيالىق كەڭەسىنىڭ مۇشەسى كلەر بازي-مالوري, وڭىرلىك ىنتىماقتاستىق ءبولىمىنىڭ باسشىسى سەرگەي كۋزنەتسوۆ, كونستي-
تۋتسيالىق سوت تورەلىگى ءبولىمىنىڭ باسشىسى شنۋتس ديۋرر, ساراپشىلار – مولدوۆا كونستيتۋتسيالىق سوتىنىڭ ەكس-توراعاسى الەكساندر تەناسە جانە كورەيا كونستيتۋتسيالىق سوتى باس حاتشىسىنىڭ ورىنباسارى چون-ۆون كيم قاتىسىپ, ءسوز سويلەدى.
دوڭگەلەك ۇستەلدە ۆەنەتسيا كوميسسياسى جانە فرانتسيا, يتاليا, كورەيا, مولدوۆا جانە باسقا ەلدەردىڭ كونستيتۋتسيالىق باقىلاۋ ورگاندارىنىڭ وكىلدەرى مەن زاڭ ساراپشىلارى بايانداما جاسادى.
ونلاين جيىندا ۆەنەتسيا كوميسسياسىنىڭ ساراپشىلارى سوتتاردىڭ وتىنىشتەرى بويىنشا زاڭداردىڭ ەل كونستيتۋتسياسىنا سايكەستىگىن تەكسەرۋ ماسەلەلەرى بويىنشا ويلارىن ورتاعا سالدى. سۋديالاردىڭ پروكۋرور, ادۆوكات جانە سوت ءىسىن جۇرگىزۋگە باسقا دا قاتىسۋشىلاردىڭ ءوتىنىش حاتتارىن قاراۋ ماسەلەلەرى جونىندە پىكىر الماسىپ, جەكەلەگەن داۋلى جانە وزەكتى سۇراقتارعا قاتىستى تالقىلاۋ جۇرگىزدى.
قۇقىق قورعاۋ ۇيىمدارىنىڭ وكىلدەرى زاڭداردىڭ كونستيتۋتسيالىلىعىن تەكسەرۋ ادامنىڭ قۇقىقتارى مەن بوستاندىقتارىن قورعاۋدىڭ ماڭىزدى كەپىلى ەكەنىن اتاپ ءوتتى. كونستيتۋتسياعا سايكەس مۇنداي ءراسىم سوتتاردىڭ وتىنىشتەرى بويىنشا قوزعالادى جانە ولاردىڭ الدىندا سوت پروتسەسىنە قاتىسۋشىلار ءتيىستى وتىنىشتەردى مالىمدەي الادى.
كونستيتۋتسيالىق كەڭەس وسى ينستيتۋتتىڭ تيىمدىلىگىن ارتتىرۋعا باعىتتالعان ناقتى ۇسىنىستار ەنگىزدى. ولار سوتتاردىڭ ءوتىنىش حاتتاردى ەگجەي-تەگجەي قاراۋى ءتارتىبىن, ولارعا قويىلاتىن تالاپتاردى بەلگىلەۋدىڭ, سۋديا انىقتايتىن ماسەلەلەر شەڭبەرىن جانە ولاردى قاناعاتتاندىرۋدان باس تارتۋدىڭ ناقتى نەگىزدەرىن ايقىنداۋدى كوزدەيدى.
ۇسىنىستاردى جۇمىس توبى ناقتى جۇمىس ىستەۋ كەزىندە ەسكەرەدى. كەزدەسۋ سوڭىندا تاراپتار بىرلەسكەن جۇمىستى جالعاستىرۋدىڭ ماڭىزدىلىعىن اتاپ ءوتىپ, ىنتىماقتاستىقتىڭ تابىستى جالعاساتىنىنا سەنىم ءبىلدىردى.
«ۆەنەتسيا كوميسسياسى وتىز جىل بويى كونستيتۋتسيالىق باقىلاۋ سالاسىندا ساراپتامالىق-ادىسنامالىق كومەك كورسەتۋگە مامانداندى. سوندىقتان ونىڭ پىكىرى كونستيتۋتسيالىق سوتتار جانە بالامالى ورگاندار تۋرالى زاڭنامانى جاڭعىرتۋدا ماڭىزدى ءرول اتقارادى», دەپ اتاپ ءوتتى حالىقارالىق ساراپشىلار.
بۇعان دەيىن اتالعان كوميسسيا 2017 جىلعى كونستيتۋتسيالىق رەفورما, اكىمشىلىك راسىمدىك-پروتسەستىك كودەكس جانە قازاقستاننىڭ باسقا دا زاڭنامالىق اكتىلەرىنىڭ جوبالارى بويىنشا ءوز قورىتىندىلارىن بەرگەن بولاتىن.
جالپى, بۇل حالىقارالىق ءىس-شارانى كونستيتۋتسيالىق كەڭەس ۆەنەتسيا كوميسسياسىمەن بىرلەسىپ, ەۋروپالىق وداق پەن ەۋروپا كەڭەسىنىڭ ورتالىق ازياداعى قۇقىق ۇستەمدىگى جونىندەگى 2020-2023 جىلدارعا ارنالعان بىرلەسكەن باعدارلاماسى شەڭبەرىندە ۇيىمداستىرعان.
