نۇر-سۇلتاندا جاستاردى جۇمىسپەن قامتۋعا ارنالعان مەموراندۋم جاسالدى

قوعام • 26 اقپان، 2021

نۇر-سۇلتاندا جاستاردى جۇمىسپەن قامتۋعا ارنالعان مەموراندۋم جاسالدى

222 رەت كورسەتىلدى

«قازاقستان رەسپۋبليكاسىنىڭ جاستاردى قولداۋ جونىندەگى 2021-2025 جىلدارعا ارنالعان كەشەندى جوسپارىن» ىسكە اسىرۋ اياسىندا «نۇر-سۇلتان قالاسىنىڭ جاستار ساياساتى ماسەلەلەرى باسقارماسى» مم «استانا جاستارى» جاستار رەسۋرستىق ورتالىعى مەن نۇر-سۇلتان قالاسىنىڭ ۇيىمدارى سەرىكتەستىك تۋرالى مەموراندۋمعا قول قويدى. بۇل تۋرالى Egemen.kz قالا اكىمدىگىنىڭ رەسمي سايتىنا سىلتەمە جاساپ حابارلايدى.

Marzhan Tileubekova

ناقتىراق ايتقاندا، «تسەسنا-استىق» كونتسەرنى» جشس، «مەديكەر استانا» جشس، «SaNa-K-education» ءبىلىم بەرۋ ورتالىعى، «سامۇرىق-قازىنا» اق، «Samruk Qyzmet» بىرىڭعاي رەكرۋتينگ ونلاين پلاتفورماسى، «استانا ورمانى» جشس، «نۇربانك» اق، اف «قازپوشتا» اق «استانا پوشتامتى» «Magnum Cash & Carry» جشس، «قارجى ورتالىعى» اق سياقتى كومپانيالارمەن جۇمىسقا ورنالاستىرۋ سالاسىندا بىرقاتار كەلىسىمشارت جاسالدى.

مەموراندۋمدارعا قول قويۋدىڭ نەگىزگى ماقساتى - جۇمىسقا ورنالاستىرۋ سالاسىندا ارىپتەستىك قاتىناستار ورناتۋ، تاجىريبە الماسۋ، 18-29 جاس ارالىعىنداعى جاستاردى دامىتۋ جانە قولداۋ.

ءىس-شارا نۇر-سۇلتان قالاسىنىڭ جاستار ساياساتى ماسەلەلەرى باسقارماسىنىڭ باسشىسىنىڭ العى سوزىمەن باستالدى.

ء«بىز 2016 جىلى Job_Astana_jastary ينستا پاراقشاسىن جۇرگىزۋدى قولعا العانبىز. سول كەزدەن باستاپ 300-گە جۋىق كومپانيامەن مەموراندۋمعا قول قويىلىپ، قازىرگى تاڭدا دەيىن 3000-عا جۋىق جاستى جۇمىسقا ورنالاستىردىق. مىنە بۇگىن تاعى دا بىرنەشە كومپانيامەن مەموراندۋم جانداندىرماقپىز»، – دەدى قايرات قامباروۆ.

ونىڭ ايتۋىنشا، جاستار ساياساتىنىڭ باستى ماقساتى - جاستاردى جۇمىسقا ورنالاستىرۋ. ال مەموراندۋمعا قول قويعان كومپانيالار ولارعا بوس جۇمىس ورىندارىن ۇسىنادى.

مەموراندۋمعا قول قويعان كومپانيالار اراسىنان «Samruk Qyzmet» جوباسىنىڭ ساراپشىسى جاستاردى جۇمىسقا تارتۋ ارقىلى بىلىكتى مامان يەلەرى شىعاتىنىنا سەنىمدىلىك ءبىلدىردى.

«كورپوراتيۆتىك ۋنيۆەرسيتەت دارىندى جاستاردى «سامۇرىق-قازىنا» ۇلتتىق ءال-اۋقات قورى» كومپانيالار توبىنا تارتۋعا مۇددەلى. قوردىڭ اتىنان وكىلدىك ەتىپ وتىرعاندىقتان بوس جۇمىس ورىندارىنا ورنالاستىرۋ جانە قازاقستان بويىنشا تالانتتاردى ىزدەۋ ارقىلى بىلىكتى ماماندار، ستۋدەنتتەر مەن الەۋەتتى جاستاردىڭ بىزبەن بىرگە جۇمىس ىستەگەنىن قالايمىز»، – دەدى «Samruk Qyzmet» جوباسىنىڭ ساراپشىسى ەلميرا ساليموۆا.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز