«تەڭىزشەۆرويلدان» ەكولوگيالىق زاڭنامانى بۇزعانى ءۇشىن ايىپپۇل ءوندىرىلدى

ايماقتار • 26 اقپان، 2021

«تەڭىزشەۆرويلدان» ەكولوگيالىق زاڭنامانى بۇزعانى ءۇشىن ايىپپۇل ءوندىرىلدى

11 رەت كورسەتىلدى

«تەڭىزشەۆرويلدان» ەكولوگيالىق زاڭنامانى بۇزعانى ءۇشىن 726 ملن-نان استام تەڭگە ءوندىرىلدى، دەپ حابارلايدى Egemen.kz

اتىراۋ وبلىسى بويىنشا ەكولوگيا دەپارتامەنتى ءباسپاسوز قىزمەتىنىڭ مالىمەتىنشە، بۇعان دەيىن «تەڭىزشەۆرويل» جشس-نە قاتىستى ەكولوگيالىق زاڭنامانىڭ ساقتالۋى بويىنشا باقىلاۋ سۋبەكتىسىنە (وبەكتىسىنە) بارۋ ارقىلى پروفيلاكتيكالىق باقىلاۋ جانە جوسپاردان تىس تەكسەرۋ جۇرگىزىلگەن. ناتيجەسىندە كومپانيا تاراپىنان قورشاعان ورتاعا لاستاۋشى زاتتار شىعارىندىلارىن، ونىڭ ىشىندە الاۋ قوندىرعىلارىندا گاز جاعۋ سالدارىنان نورماتيۆتەن تىس ەميسسيالار جۇزەگە اسىرىلعانى انىقتالعان.

«وسىعان بايلانىستى «تەڭىزشەۆرويل» جشس-نە ەلىمىزدىڭ ەكولوگيالىق زاڭناماسىن بۇزۋ ناتيجەسىندە كەلتىرىلگەن زالالداردى وتەۋ تۋرالى 145 988 808 تەڭگە، 60 985 880 تەڭگە جانە 519 477 172 تەڭگە كولەمىندە نۇسقامالار بەرىلدى. الايدا، «تەڭىزشەۆرويل» جشس تاراپىنان جوعارىدا كورسەتىلگەن نۇسقامالار ەرىكتى تۇردە ورىندالمادى. سول سەبەپتەن،دەپارتامەنت نۇر-سۇلتان قالاسىنىڭ سوتىنا «تەڭىزشەۆرويل» جشس-نەن مەملەكەت كىرىسىنە زالالداردى ءوندىرىپ الۋ تۋرالى تالاپ ارىزبەن جۇگىندى. نۇر-سۇلتان قالالىق سوتىنىڭ 2020 جىلعى 21 قازانداعى جانە 2 قاراشاداعى شەشىمدەرىمەن دەپارتامەنتتىڭ «تەڭىزشەۆرويل» جشس-نە قاتىستى تالاپ ارىزدارى قاناعاتتاندىرىلدى»، دەپ حابارلادى دەپارتامەنتتتىڭ ءباسپاسوز حاتشىسى اسلان جەڭىس ۇلى.

«تەڭىزشەۆرويل» جشس سوت شەشىمدەرىمەن كەلىسپەگەن. ءسويتىپ، دەپارتامەنتتىڭ نۇسقامالارى مەن سوت شەشىمدەرىنىڭ كۇشىن جويۋ، تالاپ-ارىزداردى قاناعاتتاندىرۋدان باس تارتۋ، جاڭا شەشىمدەردى قابىلداۋ تۋرالى اپەللياتسيالىق شاعىم بەرگەن. قر جوعارعى سوتىنىڭ مامانداندىرىلعان سوت القاسى «تەڭىزشەۆرويل» جشس-ءنىڭ اپەللياتسيالىق شاعىمدارىن قاناعاتتاندىرۋدان باس تارتقان. سوت شەشىمدەرى زاڭدى كۇشىنە ەندى.

«وسىلايشا، «تەڭىزشەۆرويل» جشس-نەن جالپى سوماسى 726 451 860 تەڭگە كولەمىندە جوعارىدا اتالعان زالالدار مەملەكەت كىرىسىنە ءوندىرىپ الىندى»، دەدى اسلان جەڭىس ۇلى.

ەسكە سالا كەتەلىك، بۇدان بۇرىن كۇكىرتى مول گازدى جاققان «ەمبىمۇنايگاز» اق-دان 1،3 ملرد تەڭگە وندىرىلگەنىن جازعان بولاتىنبىز.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز