ايماقتار • 26 اقپان، 2021

ءۇمىت وتىن لاۋلاتقان...

6 رەت كورسەتىلدى

وبلىس ورتالىعىنداعى ەڭ جاس كاسىپكەر – 12 جاستا. ايتسە دە، ءسوزى مەن ءىسى قۇددى ەس ءبىلىپ، ەتەك جاپقان ەرەسەك ادامداي. وي-تولعامى دا، ۇستانىمى دا. تىرنەكتەپ تاپقان قاراجاتىن قاراقان باسىنا جاراتپاي، قايىرىمدىلىققا جۇمسايدى، انىعىراق ايتقاندا، مايماق دەرتىنە شالدىققان بالالارعا ورتوپەديالىق اياق كيىم مەن باسقا دا قاجەتتى زاتتار ساتىپ اپەرەدى.

زاۋربەك يانديەۆ ارقيلى ىدىس­تار مەن جەيدەلەردىڭ سىرتىن كوزتارتارلىق ەتىپ بەزەندىرەدى ەكەن. كوركەم سۋرەتتەي قۇلپىرعان بۇيىمدار سىرتقى پىشىنىمەن-اق تۇتىنۋشىلاردىڭ نازارىن وزىنە اۋدارادى. سوندىقتان دا ءوتىمدى. ال الۋان مازمۇنداعى ديزايندى الەۋمەتتىك جەلىدەن ىزدەپ تابادى. ءوزىنىڭ بالعىن قيالىنان تۋىندايتىن كەسكىندەمەلەر دە بار. تاۋارى ءوتىپ تۇرعان سوڭ ءتاپ-ءتاۋىر تابىس تا ورالۋدا. ءوز باسىنا ءبىر تيىنىن دا جۇمساماي، بارلىعىن تولايىم دەرتكە شالدىققان بالالارعا باعىتتايدى. ولار قۋانسا، نازىك جانى ماسايراپ، توبەسى كوككە ءبىر-اق ەلى جەتپەي قالعانداي سەزىنەدى. وزگەنى قۋان­تۋدىڭ، جانىندا جۇرگەن، قامقورلىققا مۇقتاج ادام­نىڭ شاتتانعانىن كورۋدىڭ ءوزى ەستىگەن جاننىڭ جان دۇنيەسىن ۋىلجىتىپ جىبەرەتىن ءبىر ادەمى سەزىم. جاس كاسىپكەر وسىلايشا تۇيسىنەدى. قۇربىلارىنىڭ بو­يىنداعى قاسىرەتتىڭ سالماعىن قاپىسىز ۇعادى. ويتكەنى ءبىر كەزدە ءوزى دە ءدال وسىنداي دەرتكە دۋشار بولعان. بىراق قايسار مىنەزدى بالا ەش مويىماي كۇرەسسە كەرەك. جاس قايىڭداي سولقىلداعان قۇرىش دەنە مەن قايتپاس قايسار مىنەزى ءتۇپتىڭ تۇبىندە دەرتتى جەڭىپ شىعىپتى. ەندى وزگەلەرگە دەم بەرمەك، قول­تىعىنان دەمەمەك. ومىرگە دەگەن سۇيىسپەنشىلىگىن ارتتىرىپ، جابىسقان دەرتتى جاعاسىنان الىپ لاقتىرىپ جىبەرۋگە بولاتىنىن سانالارىنا جەتكىزە وتىرىپ ۇعىندىرماق.

شىنتۋايتىندا جاس كاسىپكەر ۇزاق جىل بويى اۋرۋحانا توسەگىنە تاڭىلىپ جاتىپتى. الدەنەشە رەت وتا جاساتقان. العاشقىلارى ءساتسىز اياقتالىپتى. سوندا دا ءۇمى­تىن ۇزبەگەن. كەيىنگىسى قوس­تاناي قالاسىندا جاسالعان سوڭعى وتا­سى ساتىمەن ساباقتالىپ، ايا­عىن قاز باسىپ كەتكەن. بىراق، سول ءبىر قاسىرەت قابىرعاسىن قا­يىستىرعان، دەنەسىن دەرت مەڭ­دەگەن شاق ەسىنەن ءبىر ءسات كەتكەن ەمەس. نەتكەن سۇ­راپىل سۇمدىق دەسەڭىزشى؟! تو­سەككە تاڭىلىپ قالامىن با دەپ قورىققان. ماڭگىلىك مۇگەدەك بولۋ كىمگە وڭاي دەيسىڭ. ءوزى دە يلانا الماي تۇرسا دا، ءتۇپتىڭ تۇبىندە جە­ڭىپ شىعاتىنىنا كامىل سەنگەن. باسىنا تونگەن قايعىنىڭ قارا بۇلتىن نازىك قولدارىمەن سەرپىپ تاستاۋعا تالاي ۇمتىلعان. اقىرى تىلەگى قابىل بولدى. ەندىگى تىلەگى ءوزى ءتارىزدى مۇڭايعان، ومىردەن باز كەشە جازداپ جۇرگەن بالعىندارعا كومەكتەسۋ. ولاردىڭ جايىن وزىندەي كىم ۇقسىن؟ ال مۇنداي بالالار از ەمەس. وبلىس بويىنشا 900-گە جۋىق. سولاردىڭ ءبىرى – بۋراباي اۋدانىنداعى كەنە­سارى اۋىلىنىڭ تۇرعىنى باحتيار بەسپاەۆ نەبارى 11 جاستا. باحتياردان بۇل دەرتتىڭ بەل­گىلەرى ومىرگە كەلگەن كەزدەن بىلىنە باستاعان. سودان بەرى جانىن جەگەن دەرتپەن ارپالىسىپ كەلەدى. بالعىن كاسىپكەر زاۋربەك يانديەۆ ەڭ العاشقى سىيلىعىن وسى باحتيارعا جاسادى. ءۇمىت وتىن تۇتاتۋ ءۇشىن ءوزىنىڭ باسىنان كەشكەن وقيعاسىن دا ايتىپ بەردى. رۋحاني اعاسىنىڭ جان سىرىن ەستىگەن باحتياردىڭ دا جانارى جاي­ناپ كەتتى. ەندى ۇزىلگەن ءۇمىت جالعانعانداي، كوكىرەكتەگى ءسونىپ بارا جاتقان وتى قايتا لاۋلاپ جانعانداي.

– مەنىڭ بالاما وسى كەزگە دەيىن ءۇش مارتە وتا جاسالدى، – دەيدى اناسى راحيما ابدى­عاپاروۆا، – شىنىن ايتقاندا، قا­جەتتى ورتو­پەديالىق اياق كيىم­دەردىڭ قۇنى وتە قىمبات. سوڭ­عى بىرەۋىن رەسەيدەن 90 مىڭ تەڭ­گەگە الدىرتتىم. ەن­دى مىنە، زاۋر­بەك ق ۇلىنىم تەگىن سىيلاپ وتىر. باحتيارعا ايت­قان ءوزىنىڭ ءومىر تاجىريبەسى اياق كيىم­نەن دە قىمبات. كۇندەردىڭ ءبىر كۇنىن­دە مەنىڭ بالام دا زاۋربەك سياق­تى قاتارعا ءىلىنىپ كەتە مە دەپ ۇمىتتەنەمىن.

بار بولاشاعى الدا باحتيار وتباسىنداعى ءتورت پەرزەنتتىڭ كەنجەسى ەكەن. كەنجە بالا كۇنى ەرتەڭ زاۋربەك ءتارىزدى قاز باسىپ كەتەرىنە سەنىمدى. قاراپايىم اياق كيىمدەر اياعىن قاجاپ ءجۇر ەدى، مىنا سىيلىق كوڭىلدەن شىعىپ-اق تۇر. بالعىن كاسىپكەردىڭ باس­تاماسىن اقىل تارازىسىنا سالىپ وتىرىپ، ەل ىشىندەگى مۇق­تاج جانداردىڭ ەش ۋاقىتتا قامقورلىقسىز قالمايتىنىنا كامىل سەندىك. نەبارى ون ەكىگە جاڭا تولعان ورىمدەي جاس ەلىنىڭ ەل­دىگىن، بالالاردىڭ باقىتتى بولاشاعىن ويلاپ جۇرسە، ءبىزدىڭ ەل كىمنەن كەم بولماق؟! العا قويعان بار ماقسات-مۇرات تا، جان جادىراتار جاقسىلىق تا وسى ەمەس پە؟!

 

كوكشەتاۋ

 

سوڭعى جاڭالىقتار

ەلداناعا ەل ريزا

سپورت • كەشە

جۇمەكەننىڭ «بالاۋساسى»

رۋحانيات • كەشە

سۇيىسپەنشىلىك ساباعى

ايماقتار • كەشە

ۇقساس جاڭالىقتار