وبلىستىق پوليتسيا دەپارتامەنتى كينولوگيا قىزمەتىنىڭ ورتالىعىندا 25 قىزمەتتىك ىزدەستىرۋ ءيتى بار ەكەن. ولاردىڭ اراسىندا نەمىستىڭ ماقتاۋلى وۆچاركاسى, سونداي-اق, تۇقىمى ءتاۋىر لابرادور-رەتريۆەرلەر دە كەزدەسەدى. بۇلاردىڭ بارلىعى كۇشىك كەزىنەن جاقسىلاپ تاربيەلەسە, تاپتىرمايتىن كومەكشى. ەرتەرەكتە جەتى قازىنانىڭ ءبىرى سانالاتىن يت اتاۋلىنى اڭ قاعۋعا, مال باعۋعا پايدالانسا, بۇگىنگى كۇنى قىلمىستى ىزدەستىرۋ, اشۋ باعىتىندا دا كادەگە جاراتىپ ءجۇر. ماماندار تاراپىنان جاقسى باعا الىپ جۇرگەن قىزمەتتىك ءيتتىڭ ءبىرى – مۋحا. قازىر وننان استام توبەت. بويىنا بىتكەن قاسيەتتىڭ ارقاسىندا الدەنەشە قىلمىس اشقان.
– ءار ءيتتىڭ وزىنە ءتان جاراتىلىسى, مىنەزى بولادى, – دەيدى يتبەگى ولجاس سەيىتجانوۆ, – ماسەلەن, مۋحا ماقتاعاندى جاقسى كورەدى. ءاربىر وپەراتسيادان كەيىن تابانىن تازالاپ, كوزى مەن ءتىسىن بايقاپ, باقىلاۋ جاسايمىز. وتكەن جىلى وسىنداي يتتەردىڭ ارقاسىندا 547 قىلمىس اشىلدى. ەسىرتكى زاتتارىنا قاتىستى قىرىقتان استام قىلمىستىڭ ءىزى كەسىلدى. كوپ-كورىم كومەك ەمەس پە؟
قىزمەتتىك يتتەر ءتارتىپ بۇزۋشىلارعا دا پسيحولوگيالىق تۇرعىدان اسەر ەتەدى ەكەن. ماسەلەن, پوليتسيا قىزمەتكەرلەرىنە قارسىلىق كورسەتپەك بولعاندارعا نەمەسە قىلمىس جاسالعان ورىننان جالتارىپ كەتپەك بولعانداردى ازۋىن ايعا بىلەگەن ايبارلى يتتەردىڭ مىسى باسسا كەرەك. وسىلايشا ارنايى كۇتىلىپ باپتالاتىن قىزمەتتىك يتتەر ءتارتىپ ساقشىلارىنىڭ يىعىنا تۇسەتىن جۇكتى كوتەرىسۋدە. قىلمىستى اشۋ بارىسىندا دا سەزىمتال يتتەردىڭ سەپتىگى مول.
