بۇل جول كارتاسى ۇلتتىق تۋريستىك ءونىمدى ازىرلەۋ, جەكەلەگەن تۋريزم تۇرلەرىن (بالالار-جاسوسپىرىمدەر ءتۋريزمى, مەديتسينا جانە ساۋىقتىرۋ ءتۋريزمى) جانە قولونەردى دامىتۋ, ەلدىڭ تۋريستىك الەۋەتىن ارتتىرۋ بويىنشا ەلەۋلى ءىس-شارالاردى قامتيدى.
جول كارتاسى شەڭبەرىندە قاراستىرىلعان ءىس-شارالاردى جۇزەگە اسىرۋ ەلىمىزدەگى تۋريستىك ءونىمنىڭ ازىرلەنۋىنىڭ مەحانيزمدەرىن جان-جاقتى تالداۋ جانە وزەكتەندىرۋگە, قولونەر شەبەرلەرىنىڭ جۇمىسىن رەتكە كەلتىرۋ جانە تۇيتكىلدى ماسەلەلەردى شەشۋگە, تۋريزم تۇرلەرىن دامىتۋدىڭ تۇجىرىمدامالىق شەشىمدەرىن انىقتاۋعا مۇمكىندىك بەرەدى.
جيىندا مادەنيەت جانە سپورت ۆيتسە-ءمينيسترى عابيدوللا ءابدىراحىموۆ بۇل جول كارتا تۋريزم سالاسىن جانداندىرۋعا سەپىن بەرەتىنىن, ينفراقۇرىلىم ماسەلەسىن جانە وزگە دە ماسەلەلەردى شەشۋگە جول اشاتىنىنا سەنىم ءبىلدىردى.
«جول كارتاسى سالانىڭ دامۋ مەحانيزمىن دايىنداۋعا زور مۇمكىندىك بەرەدى. مىسالى, وتكەن جىلى ءدال وسىنداي جول كارتاسى تيىمدىلىگىن كورسەتىپ, نارىقتا قولداۋ تاپتى. وسى ارقىلى ءبىز تۋريزم سالاسىنىڭ دەڭگەيىن پاندەمياعا باستالعانعا دەيىنگى كەزەڭگە جەتكىزىپ, دامىتۋعا جاعداي جاساعىمىز كەلەدى»,-دەدى عابيدوللا ءابدىراحىموۆ.
ايتا كەتەيىك, وسىعان ۇقساس جول كارتاسى 2020 جىلى «اتامەكەن» ۇكپ مەن «Kazakh Tourism» ۇك» اق اراسىندا جاسالعان بولاتىن. جول كارتاسى ۇلتتىق تۋريستىك ءونىمدى قالىپتاستىرۋعا باعىتتالدى. جول كارتاسى شەڭبەرىندە ساناتوريا, كۋرورت نىساندارىن تۇگەندەۋ بويىنشا اۋقىمدى جۇمىس, قولونەر جانە اگروتۋريزم بويىنشا كەشەندى ەكسپەديتسيا جۇرگىزىلىپ, وقۋشىلار ءۇشىن ءبىلىم بەرۋ ەكسكۋرسيالارىن ۇيىمداستىرۋ بويىنشا «جاندى ساباقتار» قاناتقاقتى جوبا ىسكە اسىرىلدى. سونىمەن قاتار تانىمال تۋر باعىتتار بويىنشا قاجەت ينفراقۇرىلىم ايقىندالدى. وسى ورايدا ۇلتتىق تۋريستىك ءونىمدى قالىپتاستىرۋ ءۇشىن بىرىگىپ جۇمىس ىستەۋ جونىندەگى باستاما نارىقتا وڭ باعاسىن العانىن اتاپ وتكەن ءجون.
